LIVE TV
କନ୍ୟା ଏବଂ ଚାକିରିର ପ୍ରଲୋଭନ ଦେଖାଇ ଦକ୍ଷିଣ ଏସୀୟ ଯୁବକମାନଙ୍କୁ ଜୋର ଜବରଦସ୍ତ ଋଷ ସେନାରେ ସାମିଲ କରାଯାଉଛି । ଯଦି ଯୁବକମାନେ ଋଷ ସେନାରେ ଯୋଗଦେବାକୁ ମନା କରନ୍ତି, ତେବେ ସେମାନଙ୍କୁ ନାନା ନିର୍ଯାତନା ଦିଆଯାଉଛି । ହରିୟାଣା, ପଞ୍ଜାବ ଏବଂ ହାଇଦ୍ରାବାଦ ସମେତ ଭାରତର ଅନେକ ରାଜ୍ୟର ଯୁବକମାନେ ଏହି ଠକେଇର ଶିକାର ହୋଇସାରିଛନ୍ତି । ହରିୟାଣାର ଦୁଇଜଣ ଯୁବକ ଏହି ଜାଲରୁ ଖସି ଭାରତ ଫେରିଛନ୍ତି । କରନାଲର ବାସିନ୍ଦା ୨୧ ବର୍ଷିୟ ମୁକେଶ ଏବଂ ୨୪ ବର୍ଷିୟ ସନ୍ନିଙ୍କ ଅଙ୍ଗେଲିଭା କଥା ଶୁଣି ସମସ୍ତେ ଆଶ୍ଚର୍ଯ୍ୟ । ସମ୍ପର୍କୀୟଙ୍କ ଅଭିଯୋଗ, ଭାଇମାନଙ୍କୁ ଇମିଗ୍ରେସନ ଏଜେଣ୍ଟମାନେ ଧୋକା ଦେଇ ଜର୍ମାନୀ ବଦଳରେ ବ୍ୟାଙ୍କକ ପଠାଇଥିଲେ । ସେଠାରେ ସେମାନଙ୍କୁ ଏକ ହୋଟେଲରେ ଚାକିରି ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା । ଏଭଳି ୨୦୦ ରୁ ଅଧିକ ଲୋକ ଏମିତି ଠକେଇର ଶିକାର ହୋଇଛନ୍ତି ବୋଲି ସେମାନେ ଦାବି କରିଛନ୍ତି।
Also Read
ସେନାରେ ଭର୍ତ୍ତି ପାଇଁ ମନା କରିବାକୁ ଜେଲ୍ ଦଣ୍ଡ
ସନ୍ନିଙ୍କ ସମ୍ପର୍କୀୟ ଆହୁରି କହିଛନ୍ତି, ବ୍ୟାଙ୍କକରୁ ସେମାନଙ୍କୁ ବିମାନରେ ବେଲାରୁଷ ନିଆଯାଇଥିଲା । ସେଠାରୁ ସେମାନେ ଜଙ୍ଗଲ ଦେଇ ଋଷରେ ପ୍ରବେଶ କରିଥିଲେ । ଯେଉଁଠାରେ ଅସ୍ଥାୟୀ ଶିବିର ତିଆରି କରାଯାଇଥିଲା । ସନ୍ନି ଓ ମୁକେଶଙ୍କ ଶରୀରରେ ଥିଲା କ୍ଷତ ଚିହ୍ନ ଦେଖାଇ ସେ କହିଛନ୍ତି ଯେ ଏହି ଶିବିରରେ ଥିବା ଏଜେଣ୍ଟମାନେ ତାଙ୍କୁ ଭୋକ ଉପାସରେ ରଖିଥିଲେ । କେବଳ ଏତିକି ନୁହେଁ, ତାଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦିଆଯାଇଥିଲା । ଅନ୍ୟପଟେ ଯେତେବେଳେ ସେମାନେ ଋଷ ସେନାରେ ଯୋଗଦେବାକୁ ମନା କରିଥିଲେ ଏବଂ ୟୁକ୍ରେନରେ ଯୁଦ୍ଧ କରିବାକୁ ଅମଙ୍ଗ ହୋଇଥିଲେ, ସେତେବେଳେ ବୈଧ ଅନୁମତି ବିନା ଋଷରେ ପ୍ରବେଶ କରିଥିବା ଅଭିଯୋଗରେ ସେମାନଙ୍କୁ ମସ୍କୋ ଜେଲକୁ ପଠାଇଦେଇଥିଲେ ।
ଜେଲରୁ ବାହାର କରିବା ପାଇଁ ଓକିଲ ୬ ଲକ୍ଷ ଟଙ୍କା ନେଲେ
ସେ କହିଛନ୍ତି ଯେ ମସ୍କୋର ଜଣେ ଓକିଲ ପିଲାମାନଙ୍କୁ ଜେଲରୁ ବାହାର କରିବା ପାଇଁ ଓ ଘରକୁ ଫେରିବାରେ ସାହାଯ୍ୟ କରିଛନ୍ତି। ଏହି କାମ ପାଇଁ ଋଷର ସେହି ଓକିଲ ୬ ଲକ୍ଷ ଟଙ୍କା ନେଇଥିଲେ । ମୁକେଶ ଏବଂ ସନ୍ନିଙ୍କ କହିବାନୁଯାୟୀ ସେମାନଙ୍କୁ ୧୫ ଦିନ ଯାଏଁ ଖାଦ୍ୟ ପାନୀୟ ଦିଆଯାଇନଥିଲା ।
୬୦ ଲକ୍ଷ ଟଙ୍କା ଖର୍ଚ୍ଚ କଲା ପରିବାର
ମସ୍କୋ ଓକିଲ କହିଛନ୍ତି ଯେ ଯେତେବେଳେ ଏହି ଏଜେଣ୍ଟମାନେ ଅନ୍ୟ ଦେଶର ଯୁବକମାନଙ୍କୁ ରୁଷ ସେନାରେ ଯୋଗଦେବା ଏବଂ ୟୁକ୍ରେନ ଯୁଦ୍ଧରେ ସାମିଲ ହେବାକୁ ଆଣିଥାନ୍ତି, ସେତେବେଳେ ସେମାନଙ୍କୁ ୨ ଲକ୍ଷ ଟଙ୍କା କମିଶନ ମିଳିଥାଏ । ଜର୍ମାନୀ ପଠାଇବାର ବିଫଳ ପ୍ରୟାସରେ ମୁକେଶ ଏବଂ ସନ୍ନିଙ୍କ ପରିବାର ପ୍ରଥମେ ୩୫ ଲକ୍ଷ ଏବଂ ପରେ ୨୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି ।
ମୁକେଶ ନିଜ ଶରୀରରେ କିଛି କ୍ଷତ ଚିହ୍ନ ଦେଖାଇ କହିଥିଲେ ଯେ ଆମକୁ ଏଭଳି ନିର୍ଯାତନା ଦିଆଯାଇଛି । ‘କେତେବେଳେ ଆମକୁ ନିଆଁ ଖୁଣ୍ଟାରେ ମାଡ଼ ମାରୁଥିଲେ ତ କେତେବେଳେ ବରଫ ଉପରେ ଶୁଆଉଥିଲେ । ଆମକୁ ବନ୍ଧୁକ ଏବଂ ଛୁରୀ ମଧ୍ୟ ଦେଖାଉଥିଲେ ।
