LPG Insurance in India: LPG ଗ୍ୟାସ ସଂଯୋଗ ନେଲେ ମିଳିବ ୫୦ ଲକ୍ଷର ଇନ୍ସ୍ୟୁରାନ୍ସ୍

ଭାରତର ପ୍ରାୟ ପ୍ରତ୍ୟେକ ଘରେ ଗ୍ୟାସ ସିଲିଣ୍ଡର ସଂଯୋଗ ଅଛି। କିନ୍ତୁ ଆମ ମଧ୍ୟରୁ ଅନେକ ସିଲିଣ୍ଡର ସହିତ ଜଡିତ ଗ୍ରାହକ ଅଧିକାର ବିଷୟରେ ସଚେତନ ନୁହଁନ୍ତି। ନିୟମ ଅନୁଯାୟୀ, ଯଦି ଆପଣ ଏଲପିଜି ସଂଯୋଗ ନେଉଛନ୍ତି ତେବେ ଆପଣଙ୍କୁ 50 ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ବୀମା ମିଳିଥାଏ। ଏହି ପଲିସିକୁ LPG ଇନସ୍ୟୁରାନ୍ସ୍ କଭର କୁହାଯାଏ।

ଗ୍ୟାସ ସିଲିଣ୍ଡର ଯୋଗୁଁ ଯେକୌଣସି ପ୍ରକାରର ଦୁର୍ଘଟଣାରେ ଜୀବନ ଏବଂ ସମ୍ପତ୍ତି କ୍ଷତି ପାଇଁ ଏହା ଦିଆଯାଇଥାଏ। ଆପଣ ଗ୍ୟାସ ସଂଯୋଗ ନେବା ମାତ୍ରେ, ଆପଣ ଏହି ପଲିସି ପାଇଁ ଯୋଗ୍ୟ ହୋଇଯାଆନ୍ତି । ତେବେ କିଛି ଜରୁରୀ କଥା ଜାଣି ରଖନ୍ତୁ, ସର୍ବଦା ସିଲିଣ୍ଡରର ଏକ୍ସପାରୀ ଡେଟ୍ ଯାଞ୍ଚ କରି କିଣନ୍ତୁ। କାରଣ ଏହି ବୀମା ସିଲିଣ୍ଡରର ଅବଧି ଶେଷ ହେବା ତାରିଖ ସହିତ ଜଡିତ।

ଗ୍ୟାସ ସଂଯୋଗ ନେବା ମାତ୍ରେ, ଆପଣଙ୍କୁ 40 ଲକ୍ଷ ଟଙ୍କାର ଦୁର୍ଘଟଣାଜନିତ ବୀମା ମିଳିବ। ଏହା ସହିତ, ଯଦି କୌଣସି ବ୍ୟକ୍ତି ସିଲିଣ୍ଡର ବିସ୍ଫୋରଣ ଯୋଗୁଁ ମୃତ୍ୟୁବରଣ କରନ୍ତି, ତେବେ 50 ଲକ୍ଷ ଟଙ୍କା ପର୍ଯ୍ୟନ୍ତ କ୍ଷତିପୂରଣ ଦାବି କରାଯାଇପାରିବ। ଏଥିପାଇଁ ଆପଣଙ୍କୁ କୌଣସି ମାସିକ ପ୍ରିମିୟମ୍ ଦେବାକୁ ପଡ଼ିବ ନାହିଁ। ମନେରଖନ୍ତୁ, ଯାହାଙ୍କ ନାମରେ ସିଲିଣ୍ଡର ପଞ୍ଜିକୃତ ହୋଇଛି କେବଳ ସେହି ବ୍ୟକ୍ତିଙ୍କୁ ହିଁ ବୀମା ରାଶି ମିଳିବ। ଏଥିରେ ଆପଣ କାହାକୁ ମଧ୍ୟ ନୋମିନୀ ରଖିପାରିବେ ନାହିଁ। ଏହି ପଲିସି ପାଇଁ ଆପଣଙ୍କ ସିଲିଣ୍ଡର ପାଇପ୍, ଚୁଲା ଏବଂ ରେଗୁଲେଟର ISI ମାର୍କର ହୋଇଥିବା ଦରକାର ।

ଏବେ ଆସନ୍ତୁ ଜାଣିବା କେମିତି ପାଇବେ ବୀମାରାଶି ? ଏଥିପାଇଁ ଦୁର୍ଘଟଣାର 30 ଦିନ ମଧ୍ୟରେ ଗ୍ରାହକଙ୍କୁ ତାଙ୍କ ବିତରକ ଏବଂ ନିକଟସ୍ଥ ପୋଲିସ ଷ୍ଟେସନକୁ ଏହା ଜଣାଇବାକୁ ପଡିବ। ଇନସ୍ୟୁରାନ୍ସ କ୍ଲେମ୍ ପାଇଁ ଆପଣଙ୍କୁ ଥାନାରେ FIR କପି, ମେଡିକାଲ୍ ରସିଦ୍, ହସ୍ପିଟାଲ୍ ବିଲ୍, ପୋଷ୍ଟମର୍ଟମ୍ ରିପୋର୍ଟ ଏବଂ ମୃତ୍ୟୁ ପ୍ରମାଣପତ୍ର ଆବଶ୍ୟକ ପଡିବ। ଏହା ପରେ ସିଲିଣ୍ଡର ବିତରକ ତେଲ କମ୍ପାନୀ ବୀମା କମ୍ପାନୀକୁ ଦୁର୍ଘଟଣା ବିଷୟରେ ସୂଚନା ଦେବେ ଆଉ ଆପଣଙ୍କ ପାଖକୁ ବୀମା ରାଶି ଆସିଯିବ। ସିଲିଣ୍ଡର ଯୋଗୁଁ ଦୁର୍ଘଟଣା ଘଟିଲେ ବୀମାର ସମ୍ପୂର୍ଣ୍ଣ ଖର୍ଚ୍ଚ ଇଣ୍ଡିଆନ ଅଏଲ୍, HPCL, BPCL ଭଳି ତୈଳ କମ୍ପାନୀଗୁଡ଼ିକ ବହନ କରନ୍ତି ।