ପଞ୍ଜାବ ନିର୍ବାଚନ ପୂର୍ବରୁ ଅଡୁଆରେ ଅରବିନ୍ଦ କେଜ୍ରିଓ୍ୱାଲ : ସାଂଘାତିକ ଅଭିଯୋଗ ଆଣିଲେ ପୁରୁଣା ସହଯୋଗୀ

ଦୁଇ ଦିନ ପରେ ପଞ୍ଜାବ ବିଧାନସଭା ଭୋଟ୍ । ତେବେ ତାପୂର୍ବରୁ ଅଡୁଆରେ ଆମ୍ ଆଦମି ପାର୍ଟି ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ । କେଜ୍ରିଓ୍ୱାଲଙ୍କୁ ଟାର୍ଗେଟ କରିଛନ୍ତି ପୁରୁଣା ସହଯୋଗୀ କୁମାର ବିଶ୍ୱାସ । ତାଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି କବିରୁ ନେତା ବନିଥିବା ବିଶ୍ୱାସ । ପୁରୁଣା ବାର୍ତ୍ତାଳାପ ପ୍ରସଙ୍ଗ ଉଠାଇ ପଞ୍ଜାବ ମୁଖ୍ୟମନ୍ତ୍ରୀ ନଚେତ୍ ଏକ ସ୍ୱାଧୀନ ରାଷ୍ଟ୍ରର ପ୍ରଧାନମନ୍ତ୍ରୀ ହେବେ ବୋଲି ତାଙ୍କୁ କହିଥିଲେ କେଜ୍ରିଓ୍ୱାଲ । ଅର୍ଥାତ୍ ଖଲିସ୍ତାନ ପ୍ରଧାନମନ୍ତ୍ରୀ ହେବା ଲାଗି କେଜ୍ରିଓ୍ୱାଲଙ୍କ ଅଭିଳାଷ ଥିବା କୁମାର ବିଶ୍ୱାସ ପ୍ରକାଶ କରିବା ପରେ ସୃଷ୍ଟି ହୋଇଛି ରାଜନୈତିକ ଝଡ଼ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେଜ୍ରିଓ୍ୱାଲଙ୍କ ଉପରେ ବର୍ଷିଥିବା ବେଳେ କଂଗ୍ରେସ ବି ଜୋରଦାର ସମାଲୋଚନା କରିଛି ।

ନିଜର ପୂର୍ବତନ ଘନିଷ୍ଠ ସହଯୋଗୀ କୁମାର ବିଶ୍ୱାସଙ୍କ ଏହି ମନ୍ତବ୍ୟକୁ ନେଇ ଅଡୁଆରେ ଆପ୍ ମୁଖ୍ୟ । ପଞ୍ଜାବରେ ଆପ୍ କ୍ଷମତା ଦଖଲ କରିବା ସମ୍ଭାବନା ଭିତରେ ତାଙ୍କ ନାଁରେ ଏଭଳି ସଂଗୀନ ଅଭିଯୋଗ ଆଣିଛନ୍ତି ବିଶ୍ୱାସ । କେଜ୍ରିଓ୍ୱାଲ କେତେ କ୍ଷମତା ଲୋଭି ତାର ଉଦାହରଣ ଦେବାକୁ ଯାଇ କୁମାର କହିଛନ୍ତି ଯେ ପଞ୍ଜାବର ମୁଖ୍ୟମନ୍ତ୍ରୀ ନଚେତ୍ ସ୍ୱାଧୀନ ରାଷ୍ଟ୍ର ଖଲିସ୍ତାନର ପ୍ରଧାନମନ୍ତ୍ରୀ ହେବା ଲାଗି ରହିଥିଲା କେଜ୍ରିୱାଲଙ୍କ ଅଭିଳାଷ । ତାଙ୍କ ସହ କଥାବାର୍ତ୍ତା ସମୟରେ କେଜ୍ରିଓ୍ୱାଲ ନିଜ ଇଛା ତାଙ୍କ ଆଗରେ ପ୍ରକାଶ କରିଥିବା ଅଭିଯୋଗ ଆଛନ୍ତି ।

କୁମାରଙ୍କ ଏହି ସାଂଘାତିକ ଅଭିଯୋଗ ପରେ ସୃଷ୍ଟି ହୋଇଛି ରାଜନୈତିକ ଝଡ଼ । କୁମାର ବିଶ୍ୱାସ ଏତେ ଦିନ ଧରି କାହିଁକି ଚୁପ୍ ଥିଲେ ବୋଲି ପ୍ରଶ୍ନ କରିଛନ୍ତି ଆପ ମୁଖପାତ୍ର ରାଘବ ଚଢା । କେଜ୍ରିୱାଲଙ୍କ ଭଳି ଜଣେ ସଚ୍ଚୋଟ ନେତାଙ୍କ ରାସ୍ତା ରୋକିବାକୁ ଏହା ଅସାଧୁ ଶକ୍ତିଙ୍କ ଷଡଯନ୍ତ୍ର ବୋଲି ସେ ଅଭିଯୋଗ କରିଛନ୍ତି । ପଞ୍ଜାବରେ ଦଳର ବିଜୟ ସମ୍ଭାବନାକୁ ଦେଖି କେଜ୍ରିଓ୍ୱାଲଙ୍କ ନାଁରେ ମିଥ୍ୟାପ୍ରଚାର କରାଯାଉଥିବା ସେ କହିଛନ୍ତି । ତେବେ ସେ ଯାହା କହିଛନ୍ତି ତାହା ସଂପୂର୍ଣ୍ଣ ସତ ବୋଲି କହିଛନ୍ତି କୁମାର ବିଶ୍ୱାସ ।

ପଞ୍ଜାବରେ ଏଥର ବହୁମୁଖୀୟ ନିର୍ବାଚନ ହେବାକୁ ଯାଉଥିବା ବେଳେ କୁମାର ବିଶ୍ୱାସଙ୍କ ଅଭିଯୋଗ କେଜ୍ରିଓ୍ୱାଲଙ୍କ ପାଇଁ ଅଡୁଆ ସ୍ଥିତି ସୃଷ୍ଟି କରିଛି । ବିଜେପି ଓ କଂଗ୍ରେସ ସମେତ ଅକାଳୀ ଦଳ, ଆମ୍ ଆଦମି ପାର୍ଟି ଓ କେଜ୍ରିଓ୍ୱାଲଙ୍କୁ ଜୋରଦାର ସମାଲୋଚନା କରିଛନ୍ତି । କେଜ୍ରିଓ୍ୱାଲଙ୍କ ବିଚ୍ଛିନ୍ନବାଦୀ ଚିନ୍ତାଧାରାର ଉଦାହରଣ ଦେଇ ବର୍ଷିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଯନ୍ତ୍ରଣା ଅସହ୍ୟ ହେବାକୁ କୁମାର ବିଶ୍ୱାସ ମୁହଁ କୋଲିଥିବା କହି ମୋଦି ତାଙ୍କୁ ପ୍ରଶଂସା କରିଛନ୍ତି ।

ପୂର୍ବତନ ସହଯୋଗୀ କୁମାର ବିଶ୍ୱାସ କେଜ୍ରିଓ୍ୱାଲଙ୍କ ପୋଲ ଖୋଲିବା ପରେ ବିଜେପି ଓ କଂଗ୍ରେସ ଟାର୍ଗେଟରେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ । ଏଭଳି ଆଭିମୁଖ୍ୟ ଅତି ଭୟଙ୍କର ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କେଜ୍ରିୱାଲଙ୍କ ପୁରୁଣା ସାଥୀ ତାଙ୍କର ଯେଉଁ ଚରିତ୍ରକୁ ପଦାରେ ପକାଇଛନ୍ତି । ତାକୁ ପ୍ରତ୍ୟେକ ମତଦାତା ଗମ୍ଭୀର ତାର ସହ ନେବା ଲାଗି ନିର୍ବାଚନ ରାଲିରେ ମୋଦି ଭୋଟରଙ୍କୁ ନିବେଦନ କରିଛନ୍ତି । ଅନ୍ୟପକ୍ଷରେ କେଜ୍ରିଓ୍ୱାଲଙ୍କ ମନ୍ତବ୍ୟର ତଦମନ୍ତ ହେବା ଆବଶ୍ୟକ ବୋଲି ମତ ଦେଇଛନ୍ତି ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ।

ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନୀ କେଜ୍ରିୱାଲଙ୍କୁ ସମାଲୋଚନା କରିବା ସହ ଏହା ଆମ ଆଦମୀ ପାର୍ଟିର ପଞ୍ଜାବ ପାଇଁ ଅସଲି ଉଦ୍ଦେଶ୍ୟ ଓ ଯୋଜନା ବୋଲି ଟୁଇଟ୍ କରି କଟାକ୍ଷ କରିଛନ୍ତି। ପଞ୍ଜାବ ରାଜନୀତିରେ କଂଗ୍ରେସ, ବିଜେପି ଓ ଅକାଳୀ ଦଳର ଆଧିପତ୍ୟ ରହିଥିବା ବେଳେ ଆମ ଆଦମୀ ପାର୍ଟି ଏଥର ରାଜ୍ୟରେ କ୍ଷମତା ଦଖଲ କରିବା ସମ୍ଭାବନା ରହିଛି । ତେବେ ତାପୂର୍ବରୁ ପୁରୁଣା ସହଯୋଗୀ କୁମାର ବିଶ୍ୱାସ ଯେଉଁ ବିସ୍ଫୋରକ ବୟାନ ଦେଇଛନ୍ତି ଭୋଟରଙ୍କ ଉପରେ ତାର ପ୍ରଭାବ ପଡୁଛି ନା ନାହିଁ ତାହା ଦେଖିବା କଥା ।