LIVE TV
ହିଜାବ ବିବାଦର ମଧ୍ୟରେ ଆଜିଠାରୁ କର୍ଣ୍ଣାଟକରେ ଦଶମ ଶ୍ରେଣୀ ପର୍ଯ୍ୟନ୍ତ ସ୍କୁଲ୍ ଖୋଲିଛି । ହେଲେ ରାଜ୍ୟରେ ଏବେ ବି ଦଶମରୁ ଦ୍ୱାଦଶ କଲେଜ ବନ୍ଦ ରହିଛି । ମୁସଲିମ ଛାତ୍ରୀମାନଙ୍କ ଦ୍ୱାରା ହିଜାବ ପିନ୍ଧିବା ମାମଲା ଏବେ କୋର୍ଟରେ ବିଚାରାଧୀନ ରହିଛି । ଏପଟେ ଆଜି ସକାଳେ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରୀମାନେ ସ୍କୁଲ ଯାଇଛନ୍ତି । ଏହି ବିବାଦର କେନ୍ଦ୍ର ସାଜିଥିବା ଉଡୁପିରେ ମଧ୍ୟ ଆଜି ସ୍କୁଲ ଖୋଲା ହୋଇଛି । କିନ୍ତୁ ସୁରକ୍ଷା ଦୃଷ୍ଟିରୁ ଉଡୁପି ପ୍ରଶାସନ ବିଦ୍ୟାଳୟର ଚାରିପାଖରେ ୧୪୪ ଧାରା ଲଗାଇଛି।
ସ୍କୁଲରେ ପିଲାମାନଙ୍କୁ ନିରାପଦରେ ରଖିବା ପାଇଁ ପ୍ରଶାସନ ଯଥାସମ୍ଭବ ଚେଷ୍ଟା କରୁଛି । ରବିବାର ଦିନ ପୋଲିସ ଶିବାମୋଗାରେ ଫ୍ଲାଗ ମାର୍ଚ୍ଚ କରିଥିଲା । ଏହାପୂର୍ବରୁ ଉଡୁପିରେ ମଧ୍ୟ ଫେବୃଆରୀ ୧୧ରେ ପୋଲିସ ଏକ ଫ୍ଲାଗ ମାର୍ଚ୍ଚ କରାଯାଇଥିଲା । ସୋମବାର ଦିନ ସ୍କୁଲ ଖୋଲିବା ସହିତ ସ୍କୁଲ ପରିସରରେ କୌଣସି ପ୍ରକାର ସମାବେଶକୁ ବାରଣ କରିବା ଉଦ୍ଦେଶ୍ୟରେ ପ୍ରଶାସନ ବିଭାଗ -୧୪୪ ଧାରା ଲାଗୁ କରିଛି।
ସୁରକ୍ଷାକୁ ଦୃଷ୍ଟିରେ ରଖି ସମସ୍ତ ସ୍କୁଲର ୨୦୦ ମିଟର ବ୍ୟାସାର୍ଦ୍ଧରେ ୧୪୪ ଧାରା ଲାଗୁ କରିବାକୁ ଉଡୁପି ଜିଲ୍ଲା ପୋଲିସ୍ ନିକଟରେ ଦାବି କରାଯାଇଥିଲା । ଆଉ ସେବେଠାରୁ କମିଶନର ଏହି ନିର୍ଦ୍ଦେଶ ଦେଇଛନ୍ତି । ବର୍ତ୍ତମାନ ସ୍କୁଲ ନିକଟସ୍ଥ ୨୦୦ମିଟର ବ୍ୟାସାର୍ଦ୍ଧରେ ୫ରୁ ଅଧିକ ଲୋକ ଏକାଠି ହୋଇପାରିବେ ନାହିଁ ।
ଜିଲ୍ଲା ପ୍ରଶାସନର ନିର୍ଦ୍ଦେଶ ଅନୁସାରେ ସ୍କୁଲ ଚାରିପାଖେ ପାଞ୍ଚ କିମ୍ବା ଅଧିକ ସଦସ୍ୟଙ୍କ ସମାବେଶ ଉପରେ ଅନୁମତି ନାହିଁ । ବିରୋଧ ପ୍ରଦର୍ଶନ ସମେତ ସମସ୍ତ ପ୍ରକାର ସମାବେଶ ଉପରେ ପ୍ରତିବନ୍ଧକ ଲଗାଯାଇଛି । କେବଳ ଏତିକି ନୁହେଁ, ସ୍ଲୋଗାନ, ଗୀତ ଗାଇବା ଏବଂ ଭାଷଣ ଦେବା ଉପରେ ସମ୍ପୂର୍ଣ୍ଣ ନିଷେଧାଦେଶ ରହିଛି । ଫେବୃଆରୀ ୧୯ ପର୍ଯ୍ୟନ୍ତ ୧୪୪ ଧାରା ଏହି ଅଞ୍ଚଳରେ ବଳବତ୍ତର ରହିବ ।
