ସଲାମ୍ ସହିଦ: କାର୍ଗିଲ୍‌ ବିଜୟକୁ ପୂରିଲା ୨୩ ବର୍ଷ

ଆଜି କାରଗିଲ ବିଜୟ ଦିବସ । ଏହି ଅବସରରେ ସାରାଦେଶ ଦେଶମାତୃକାର ରକ୍ଷା ପାଇଁ ବୀର ଯବାନଙ୍କ ବଳିଦାନର ସ୍ମୃତିଚାରଣ କରୁଛି । କାରଗିଲ ଯୁଦ୍ଧ ୧୯୯୯ ମେ ୩ ରୁ ଆରମ୍ଭ ହୋଇ ଜୁଲାଇ ୨୬ ତାରିଖରେ ଶେଷ ହୋଇଥିଲା । ଯୋଜନାବଦ୍ଧ ଭାବେ ପାକିସ୍ତାନ ୧୯୯୮ରୁ ହିଁ ଯୁଦ୍ଧର ଆରମ୍ଭ କରିଥିଲା । ୫ ହଜାର ସୈନ୍ୟଙ୍କୁ କାରଗିଲ ଦଖଲ ପାଇଁ ପଠାଇଥିଲା ପାକିସ୍ତାନ ।

ଭାରତୀୟ ସେନା ଏହି ବିଷୟରେ ଅବଗତ ପରେ ଆରମ୍ଭ ହୋଇଥିଲା ଅପରେଶନ ବିଜୟ । ଯୁଦ୍ଧରେ ଭାରତର ୫୨୭ ଯବାନ ସହିଦ ହୋଇଥିଲେ । ସହିଦଙ୍କ ମଧ୍ୟରେ ଜମ୍ମୁ-କଶ୍ମୀରର ୭୧ ଜଣ ଥିଲେ । ଭାରତୀୟ ବାୟୁସେନାର ମିଗ୍-୨୭, ମିଗ୍-୨୯ ଯୁଦ୍ଧ ବିମାନରୁ ଶତ୍ରୁ ଶିବିର ଉପରେ ବୋମାମାଡ଼ କରିଥିଲା । ଯୁଦ୍ଧରେ ଭାରତୀୟ ଯବାନଙ୍କ ବୀରତ୍ୱ ସମ୍ମୁଖରେ ପରାଜୟ ସ୍ୱୀକାର କରିଥିଲା ପାକିସ୍ତାନ । ଆଜି ଏହି ବୀର ସହିଦ ମାନଙ୍କ ବଳିଦାନକୁ ସାରା ଦେଶ ମନେ ପକାଇ ଏହି ଦିବସ ପାଳୁଛି ।

କାରଗିଲ ଯୁଦ୍ଧରେ ସହିଦ ହୋଇଥିଲେ ଓଡ଼ିଆ ଯବାନ ଗୋପୀନାଥ:-

କାରଗିଲ ଯୁଦ୍ଧରେ ସହିଦ ହୋଇଥିଲେ ଅନେକ ଓଡ଼ିଆ । ବୀର ଯବାନ ବୀର ସହିଦ ଯବାନଙ୍କ ମଧ୍ୟରୁ ଜଣେ ହେଉଛନ୍ତି ଗୋପୀନାଥ ମହାରଣା । ପାକିସ୍ତାନକୁ ଧୂଳି ଚଟାଇ କାରଗିଲର ବିଜୟ ବାନା ଉଡାଇ ଦେଇଗଲେ । ଆଜି କାରଗିଲ ଦିବସରେ ସହିଦଙ୍କୁ ତାଙ୍କ ଗାଁ ମାଟି ସହ ସାରା ରାଜ୍ୟ ଓ ଦେଶ ମନେ ପକାଉଛି । ମାତ୍ର ୨୩ ବର୍ଷ ବୟସରେ ସେ ୧୯୯୯ ମସିହା ମେ ୧୯ ତାରିଖରେ ଦେଶ ପାଇଁ ଜୀବନ ଦେଇଥିଲେ । ସେହି ବୀର ସହିଦଙ୍କୁ ମନେ ପକାଇ ଆଜି ପର୍ଯ୍ୟନ୍ତ ବି ତାଙ୍କ ମାଆ ଆଖିରୁ ଲୁହ ସୁଖୁନି ।

ଦେଶମାତୃକାର ସେବାପାଇଁ ବଳିଦାନ ଦେଇଥିଲେ ସହିଦ ନିରଞ୍ଜନ :-

ଗୋପୀନାଥଙ୍କ ପରି ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ପାଙ୍ଗୁଡା ଗାଁର ଯବାନ ନିରଂଜନ ବେହେରା କାରଗିଲ ଯୁଦ୍ଧରେ ଦେଶମାତୃକାର ସମ୍ମାନରକ୍ଷା ପାଇଁ ପ୍ରାଣର ବଳି ଦେଇଥିଲେ । ସେ ପାକ୍ ସେନାକୁ ଦୃଢ ଜବାବ ଦେଇ ହାସଲ କରିଥିଲେ । ବୀରଗତି ବୀର ସନ୍ତାନକୁ ହରାଇଛନ୍ତି ସତ ମାତ୍ର ତାଙ୍କ ବଳିଦାନ ପାଇଁ ପରିବାର ଓ ଗାଁଲୋକଙ୍କ ଛାତି କୁଣ୍ଢେମୋଟ । ଆଜି କାରଗିଲ ବିଜୟ ଦିବସରେ ତାଙ୍କ ସ୍ମୃତିଚାରଣ ସହ ସମସ୍ତେ ଶ୍ରଦ୍ଧାଞ୍ଜଳୀ ଦେଇଛନ୍ତି ।