LIVE TV
ତେଜୁଛି ହିଜାବ ବିବାଦ ପ୍ରସଙ୍ଗ । ହିଜାବ ବିବାଦ ପ୍ରସଙ୍ଗରେ ବେଙ୍ଗଳୁରୁ ପୋଲିସ କମିଶନରଙ୍କ ବଡ ଘୋଷଣା । ବେଙ୍ଗଳୁରୁର କୌଣସି ସ୍କୁଲ ଓ କଲେଜ ଆଖପାଖରେ ଆସନ୍ତା ୨ ସପ୍ତାହ ଯାଏଁ ବିକ୍ଷୋଭ ପ୍ରଦର୍ଶନ ହୋଇପାରିବନି । ଫେବୃଆରୀ ୨୨ ଯାଏଁ ସ୍କୁଲ ଓ କଲେଜ ଚାରିପଟେ ୧୪୪ ଧାରା ଜାରି କରାଯାଇଛି । ସେପଟେ କର୍ଣ୍ଣାଟକ ହାଇକୋର୍ଟରେ ହିଜାବ୍ ବିବାଦକୁ ନେଇ ଆବେଦନର ଶୁଣାଣି ହୋଇଛି ।
ତେବେ ଏକ ବଡ଼ ବେଞ୍ଚରେ ଏହି ମାମଲାର ଶୁଣାଣି କରିବାକୁ କର୍ଣ୍ଣାଟକ ହାଇକୋର୍ଟ ସୁପାରିଶ କରିଛନ୍ତି । ଜଷ୍ଟିସ୍ କ୍ରିଷ୍ଣା ଦୀକ୍ଷିତଙ୍କ ଜଣିକିଆ ବେଞ୍ଚ ଏହି ସୁପାରିଶ କରିଛନ୍ତି । କୋର୍ଟ ଏହି ମାମଲା ସହ ସମ୍ବନ୍ଧିତ ପକ୍ଷମାନଙ୍କୁ ମଙ୍ଗଳବାର ଦିନ ଶାନ୍ତି ବଜାୟ ରଖିବାକୁ ନିବେଦନ କରିଥିଲେ । ସୂଚନା ମୁତାବକ, କର୍ଣ୍ଣାଟକର ଅନେକ ଜିଲ୍ଲାରେ ଗତ କିଛି ଦିନ ହେବ ହିଜାବକୁ ସମର୍ଥନ ଏବଂ ବିରୋଧକୁ ନେଇ ଆନ୍ଦୋଳନ ଜାରି ରହିଛି । କର୍ଣ୍ଣାଟକରେ ସୃଷ୍ଟି ହୋଇଥିବା ହିଜାବ ବିବାଦ ଏବେ ଅନ୍ୟ ରାଜ୍ୟମାନଙ୍କୁ ମଧ୍ୟ ବ୍ୟାପିବାରେ ଲାଗିଛି ।
Also Read
ରାଜ୍ୟର ବିଭିନ୍ନ ଜିଲ୍ଲାରେ ଏନେଇ ପ୍ରତିବାଦ ଦେଖାଦେଇଥିବାବେଳେ ଏବେ ଅନ୍ୟ ରାଜ୍ୟରେ ମଧ୍ୟ ସଂଖ୍ୟାଲଘୁ ସଂପ୍ରଦାୟର ଛାତ୍ରୀ ଏନେଇ ରାସ୍ତାକୁ ଓହ୍ଲାଇ ପ୍ରତିବାଦ କରିଛନ୍ତି । ହାଇଦ୍ରାବାଦର ନିଜାମିଆ ତିବି କଲେଜର ଛାତ୍ରୀମାନେ ହାତରେ ପ୍ଲାକାର୍ଡ, ପୋଷ୍ଟର ଧରି ହିଜାବ୍ ପିନ୍ଧି ରାସ୍ତାରେ ବିକ୍ଷୋଭ ପ୍ରଦର୍ଶନ କରିଛନ୍ତି । ହିଜାବ୍ ଇଜ୍ ଆୱାର୍ ରାଇଟ୍ ନାରା ଦେଇ ପ୍ରତିବାଦ କରିଛନ୍ତି ଛାତ୍ରୀଗଣ ।
ସେଇଭଳି ପଶ୍ଚିମବଙ୍ଗ କୋଲକାତାରେ ମଧ୍ୟ ହିଜାବ୍ ବିବାଦକୁ ନେଇ ତେଜିଛି ପ୍ରତିବାଦ । ଆଲିଆ ୟୁନିଭର୍ସିଟିର ଛାତ୍ରଛାତ୍ରୀ ଉଭୟ ଏନେଇ ପ୍ରତିବାଦ ଶୋଭାଯାତ୍ରା କରିଥିଲେ । ହିଜାବ୍ ପିନ୍ଧିବା ଆମ ଅଧିକାର, ସମ୍ବିଧାନରେ ମଧ୍ୟ ନିୟମ ରହିଛି ବୋଲି ନାରା ଦେଇ ସଂଖ୍ୟାଲଘୁ ସଂପ୍ରଦାୟର ଛାତ୍ରୀମାନେ ଗଣ ଆନ୍ଦୋଳନ କରିଛନ୍ତି ।
