ବାରାଣାସୀ ଜ୍ଞାନବ୍ୟାପୀ ମସଜିଦ ସର୍ଭେ ନେଇ କୋର୍ଟଙ୍କ ବଡ଼ ନିଷ୍ପତ୍ତି

ବାରାଣାସୀର ଜ୍ଞାନବ୍ୟାପୀ ମସଜିଦ ସର୍ଭେ ସମ୍ପର୍କରେ କୋର୍ଟଙ୍କ ବଡ ନିଷ୍ପତ୍ତି । ମସଜିଦର ସର୍ଭେ ପାଇଁ ନିଯୁକ୍ତ ଆଡଭୋକେଟ୍ କମିଶନର ଅଜୟ କୁମାର ମିଶ୍ରଙ୍କୁ ହଟାଇବାକୁ କୋର୍ଟ ମନା କରି ଦେଇଛନ୍ତି । ଅଜୟ ମିଶ୍ରଙ୍କ ବ୍ୟତୀତ କୋର୍ଟ ବିଶାଲ କୁମାର ସିଂ ଏବଂ ଅଜୟ ସିଂଙ୍କୁ କୋର୍ଟ କମିଶନର ଭାବରେ ନିଯୁକ୍ତ କରିଛନ୍ତି । ଏହାସହ ମସଜିଦ ସର୍ଭେ ସମୟରେ ଉଭୟ କିମ୍ବା ଉଭୟଙ୍କ ମଧ୍ୟରୁ ଜଣେ ଉପସ୍ଥିତ ରହିବେ ବୋଲି ମଧ୍ୟ କୋର୍ଟ କହିଛନ୍ତି ।

କେବଳ ଏତିକି ନୁହେଁ ମେ ୧୭ ପୂର୍ବରୁ ମସଜିଦ ଉପରେ ସର୍ଭେ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ମେ ୧୭ରେ ସର୍ଭେର ପରବର୍ତ୍ତୀ ରିପୋର୍ଟ ଦାଖଲ କରିବାକୁ କୋର୍ଟ କହିଛନ୍ତି ।

ଏନେଇ ଅଭିଯୋଗକାରୀଙ୍କ ଓକିଲ କହିଛନ୍ତି ଯେ, ‘ସମଗ୍ର ମସଜିଦ କମ୍ପ୍ଲେକ୍ସ ଉପରେ ସର୍ଭେ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଉତ୍ତରପ୍ରଦେଶ ସରକାର ଏବଂ ପ୍ରଶାସନକୁ ଏହି କାର୍ଯ୍ୟ ଶେଷ ହେବା ପାଇଁ ନିର୍ଦ୍ଦେଶ ଦିଆଯାଇଛି । ଯେଉଁମାନେ ଏଥିରେ ହସ୍ତକ୍ଷେପ କରନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ ।’

ସୂଚନା ଅନୁସାରେ, ଆଡଭୋକେଟ୍ କମିଶନର ଅଜୟ କୁମାର ମିଶ୍ରଙ୍କ ହଟାଇବାକୁ ଦାବି କରି ଅଞ୍ଜୁମାନ ଇନ୍ତେଜାମିୟା ମସଜିଦ୍ କମିଟି ପକ୍ଷରୁ ଏକ ପିଟିସନ ଦାଖଲ କରାଯାଇଥିଲା । ଏହା ଉପରେ ୩ ଦିନ ବିତର୍କ ପରେ ବାରାଣାସୀ ସିଭିଲ୍ ଜଜ୍ ସିନିୟର ଡିଭିଜନ୍ ରବି କୁମାର ଦିଓ୍ୱାକର ଗତକାଲି ଏହି ରାୟ ସଂରକ୍ଷଣ କରିଥିଲେ । ପୂର୍ବରୁ ମଧ୍ୟ ଏହି ମସଜିଦରେ ସର୍ଭେ ଟିମ୍ ପହଞ୍ଚି ଯାଞ୍ଚ କରିଥିବାବେଳେ ମସଜିଦର କେୟାର ଟେକର କମିଟି ଓ ଆଇନଜୀବୀ ମସଜିଦ ମଧ୍ୟରେ ଭିଡିଓଗ୍ରାଫିକୁ ବିରୋଧ କରିଛନ୍ତି ।

ବାରାଣସୀର କାଶୀ ବିଶ୍ୱନାଥ ମନ୍ଦିର ନିକଟରେ ଏହି ଜ୍ଞାନବ୍ୟାପୀ ମସଜିଦ ରହିଛି । ଗତବର୍ଷ ୫ ଜଣ ମହିଳା ସ୍ଥାନୀୟ କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ସେମାନେ ମସଜିଦର ପଶ୍ଚିମ କାନ୍ଥର ପଛ ପଟେ ଥିବା ମା ଶ୍ରୀଗଙ୍ଗା ଗୌରୀଙ୍କ ଦର୍ଶନ ପାଇଁ କଟକଣା ମୁକ୍ତ ଓ ସବୁ ସମୟରେ ଯାତାୟାତ ସୁବିଧା ପ୍ରଦାନ କରିବାକୁ ଦାବି କରିଥିଲେ। ବର୍ତ୍ତମାନ ବର୍ଷକୁ ଗୋଟିଏ ଥର ଉକ୍ତ ଧର୍ମପୀଠକୁ ଦର୍ଶନ ଓ ପୂଜାପାଠ ପାଇଁ ଖୋଲା ଯାଉଛି । ଆବେଦନକାରୀ ମହିଳାମାନେ ପୁରୁଣା ମନ୍ଦିର ଭିତରେ ଥିବା ଅନ୍ୟ ଦେବଦେବୀଙ୍କ ପୂଜାର୍ଚ୍ଚନା କରିବାକୁ ମଧ୍ୟ ଅନୁମତି ଦେବାକୁ କୋର୍ଟରେ ନିବେଦନ କରିଥିଲେ ।