LIVE TV
ହରିଣ ମାରି ଖାଇଲା ଚିତା । କୁନୋ ନ୍ୟାସନାଲ ପାର୍କରେ ଛଡ଼ା ଯାଇଥିବା ଚିତା ବାଘ ପ୍ରଥମ ଶିକାର କରିଛି । ନାମିବ୍ୟାରୁ ଆସିଥିବା ୮ଟି ଚିତା କ୍ୱାରେଣ୍ଟାଇନରେ ଥିବା ବେଳେ ଗତ ରବିବାର ଚିତା ଫ୍ରେଡି ଓ ଏଲଟନ୍କୁ ବଡ଼ ଏନକ୍ଲୋଜରରେ ଛଡା ଯାଇଥିଲା । ସେଠାରେ ଏହି ଚିତା ଯୋଡ଼ି ଏକ ହରିଣକୁ ଶିକାର କରିଥିବା ଜଣାପଡିଛି । ଗତ ସେପ୍ଟେମ୍ବର ୧୭ରେ ନାମିବ୍ୟାରୁ ୮ଟି ଚିତାଙ୍କୁ ଆଣି ମଧ୍ୟପ୍ରଦେଶର କୁନୋ ନ୍ୟାସନାଲ ପାର୍କରେ ଛଡ଼ାଯାଇଥିଲା । ସେମାନଙ୍କ ମଧ୍ୟରେ ୫ଟି ମାଈ ଚିତା ଥିବା ବେଳେ, ୩ଟି ଅଣ୍ଡିରା ଚିତା ଅଛନ୍ତି ।
Also Read
Great news! Am told that after the mandatory quarantine, 2 cheetahs have been released to a bigger enclosure for further adaptation to the Kuno habitat. Others will be released soon. I’m also glad to know that all cheetahs are healthy, active and adjusting well. 🐆 pic.twitter.com/UeAGcs8YmJ
— Narendra Modi (@narendramodi) November 6, 2022
ଅନ୍ୟପଟେ କିଛି ମାସ ପରେ ଯେତେବେଳେ ସେମାନଙ୍କୁ ୭୪୮ ବର୍ଗ କିଲୋମିଟର ଜଙ୍ଗଲରେ ଅବାଧ ଶିକାର ପାଇଁ ମୁକ୍ତ କରିଦିଆଯିବ, ସେତେବେଳେ ସେହି ଜଙ୍ଗଲରେ କାଳ କାଳରୁ ରହିଆସୁଥିବା କଲରାପତରିଆ ବାଘଙ୍କ ସହ ସେମାନଙ୍କର ମୁହାଁମୁହିଁ ସ୍ଥିତି ଉପୁଜିବ । ଏଭଳି ସ୍ଥିତିରେ ଚିତାଙ୍କ ପ୍ରତି କଲରାପତରିଆ ବିପଦ ସୃଷ୍ଟି କରିପାରନ୍ତି ବୋଲି ଆଶଙ୍କା କରୁଥିଲେ ବନ୍ୟଜନ୍ତୁ ବିଶେଷଜ୍ଞ ।
ଆଫ୍ରିକାରେ କଲରାପତରିଆ ବାଘ, ପ୍ରାପ୍ତବୟସ୍କ ଚିତାଙ୍କୁ ଆକ୍ରମଣ କରିବା, ଆହତ କରିବା ଏବଂ ଚିତା ଶାବକଙ୍କୁ ମାରିଦେଇଥିବା ନଜିର ରହିଛି । ହେଲେ ଏଠି କଲରାପତରିଆର ପଲ୍ଲା ଆହୁରି ଭାରି ରହିପାରେ । କାରଣ କୁନୋ ଜଙ୍ଗଲରେ କଲରାପତରିଆ ବାଘଙ୍କ ସଂଖ୍ୟା ଅଧିକ ରହିଛି । ସେମାନେ ସେଠାକାର ସ୍ଥାନୀୟ ଜନ୍ତୁ । ଅନ୍ୟପକ୍ଷରେ ଚିତା କୁନୋରେ ସ୍ୱଳ୍ପ ସଂଖ୍ୟାରେ ଥିବା ବେଳେ, ସେମାନେ ନାମିବ୍ୟାରୁ ଆସି ନୂଆ ଜଙ୍ଗଲ ସହ କେତେ ଖାପ ଖୁଆଇ ପାରୁଛନ୍ତି, ସେନେଇ ଏବେଠୁ କିଛି କହିହେବନି ।
ବନବିଭାଗର ସୂଚନା ଅନୁସାରେ, କୁନୋରେ ପ୍ରତି ଶହେ ବର୍ଗ କିଲୋମିଟର ଅଞ୍ଚଳରେ ହାରାହାରି ୯ଟି ଲେଖାଏଁ କଲରାପତରିଆ ବାଘ ଅଛନ୍ତି । ମୋଟ ସଂଖ୍ୟା ୯୮ । ତେଣୁ କଲରାପତରିଆ ସହ ପ୍ରତିଯୋଗିତା କରି ଚିତା ନିଜ ଶିକାର ଯୋଗାଡ଼ କରିପାରିବ କି ନାହିଁ ଏବଂ ଦୁଇ ଶିକାରୀ ଜନ୍ତୁ ମୁହାଁମୁହିଁ ହେଲେ କିଏ ଜିତିବ, କିଏ ହାରିବ ତାହା ସମୟ ହିଁ କହିବ ।
