ରେଡ୍‌ ପାଇଁ ଯାଇଥିଲା ED; ଆକ୍ରମଣ କଲେ ୨ଶହ ଲୋକ, ଭାଙ୍ଗିଲେ ଗାଡ଼ି

ED ଟିମ୍ ଉପରେ ସଂଘବଦ୍ଧ ଆକ୍ରମଣ ହୋଇଛି । ଟିଏମସି ନେତାଙ୍କ ଘରେ ରେଡ୍‌ ପାଇଁ ଯାଇଥିବା ବେଳେ ଆକ୍ରମଣ କରିଛନ୍ତି ଲୋକେ । ଉତ୍ତର ୨୪ ପ୍ରଗଣାରେ ED ଟିମ୍ ଉପରେ ଆକ୍ରମଣ ହୋଇଥିବାବେଳେ ୨୦୦ରୁ ଅଧିକ ଲୋକ ଗାଡ଼ି ଭଙ୍ଗାରୁଜା କରିଛନ୍ତି ।

ପଶ୍ଚିମବଙ୍ଗର ସାଣ୍ଡେଶଖାଲିରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟର ଗୋଟିଏ ଟିମ୍ ଉପରେ ଏହି ଆକ୍ରମଣ ହୋଇଛି । ରେସନ ବଣ୍ଟନ ଦୁର୍ନୀତି ଅଭିଯୋଗରେ ଇଡି ଚଢ଼ାଉ କରିବାକୁ ଯାଇଥିବାବେଳେ ଏହି ଘଟଣା ଘଟିଛି । ଟିଏମ୍‌ସି ନେତା ଶାହ ଜାହାନ ଶେଖଙ୍କ ବାସଭବନ ନିକଟରେ ଇଡି ଟିମ୍‌ ପହଞ୍ଚିବା ପରେ ଆକ୍ରମଣ କରିଛନ୍ତି ଲୋକ ।

ସୂଚନା ଅନୁସାରେ ୨୦୦ରୁ ଅଧିକ ସ୍ଥାନୀୟ ଲୋକ ଇଡି ଟିମ୍‌କୁ ଘେରିଯାଇଥିଲେ । ପରେ ଇଡିର କର୍ମଚାରୀଙ୍କ ଗାଡି ଭଙ୍ଗାରୁଜା କରିଥିଲେ । ତେବେ ଏହି ଘଟଣାରେ କୌଣସି କର୍ମଚାରୀଙ୍କୁ ଆଘାତ ଲାଗିଥିବା ସୂଚନା ମିଳିନାହିଁ ।

ଏହି ଘଟଣାକୁ ନେଇ ପଶ୍ଚିମବଙ୍ଗ ବିଜେପି ମୁଖ୍ୟ ସୁକାନ୍ତ ମଜୁମଦାର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ସମସ୍ତଙ୍କ ବିରୋଧରେ ଦୁର୍ନୀତି ଅଭିଯୋଗ ରହିଛି । ତେଣୁ ସ୍ୱାଭାବିକ ଭାବେ ଏନଫୋର୍ସମେଣ୍ଟ ଡିପାର୍ଟମେଣ୍ଟ କାର୍ଯ୍ୟାନୁଷ୍ଠାନ ଗ୍ରହଣ କରିବେ । ଏହି ଆକ୍ରମଣ ରାଜ୍ୟର ଆଇନ ଶୃଙ୍ଖଳା ରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ରାସନ ବଣ୍ଟନ ଘୋଟାଲା ଘଟଣାରେ ମାସମାସ ଧରି ଇଡି ଚଢ଼ାଉ କରିଆସୁଛି ।