Starlink: ଗାଁ ଗହଳିରେ ମିଳିବ ହାଇସ୍ପିଡ ଇଣ୍ଟରନେଟ୍ ସେବା, ଭାରତରେ ଏଲନ ମସ୍କଙ୍କୁ ଅନୁମତି !

ଭାରତରେ ବ୍ୟବସାୟ କରିବେ ଏଲନ ମସ୍କ । ଷ୍ଟାରଲିଙ୍କକୁ ଭାରତରେ ଲଞ୍ଚ କରିବା ପାଇଁ ଅନୁମତି ମିଳିଥିବା ଜାତୀୟ ଗଣମାଧ୍ୟମରେ ପ୍ରକାଶ ପାଇଛି । ୨୦୨୨ ମସିହାରୁ ଷ୍ଟାରଲିଙ୍କ ଲାଇସେନ୍ସ ପାଇଁ ଭାରତରେ ଆବେଦନ କରିଥିଲା । ବିଭିନ୍ନ କାରଣ ବିଶେଷ କରି ଜାତୀୟ ସୁରକ୍ଷା କାରଣରୁ ଏହାକୁ ଅନୁମତି ଦେବାରେ ବିଳମ୍ୱ ହେଉଥିଲା । ଏହି ଅନୁମତି ପରେ ଦେଶର ଅପହଞ୍ଚ ଇଲାକାରେ ବି ଇଣ୍ଟରନେଟ୍ ସୁବିଧା ମିଳିପାରିବ । ଏହାର ସ୍ପିଡ ମଧ୍ୟ ଭଲ ରହିବ ।

ଏହି ଅନୁମତି ପାଇବା ପାଇଁ ଏଲନ ମସ୍କଙ୍କୁ ଦୁଇ ବର୍ଷ ଅପେକ୍ଷା କରିବାକୁ ପଡିଲା । ଟେଲିକମ୍ୟୁନିକେସନ ବିଭାଗ ତରଫରୁ ଏହି ଲାଇସେନ୍ସ ପ୍ରଦାନ କରାଯାଇଛି । ଏହି ଲାଇସେନ୍ସ ପାଇବାରେ ଷ୍ଟାରଲିଙ୍କ ହେଉଛି ତୃତୀୟ କଂପାନି । ଅନ୍ୟ ଦୁଇଟି କଂପାନି ହେଉଛି ୟୁଟେଲସାଟର ୱାନୱେବ ଓ ରିଲାଏନ୍ସ ଜିଓ । ଏହାର ଅର୍ଥ ଷ୍ଟାରଲିଙ୍କ ଏବେ ସାଟେଲାଇଟ ନେଟୱର୍କ ବ୍ୟବହାର କରି ହାଇସ୍ପିଡ ଇଣ୍ଟରନେଟ୍ ସୁବିଧା ଯୋଗାଇଦେବ ।

ଆମାଜନର ସାଟେଲାଇଟ୍ ପ୍ରୋଜେକ୍ଟ କୁଇପର୍ ମଧ୍ୟ ଏଥିପାଇଁ ଭାରତରେ ଆବେଦନ କରିଛି । ଏହା ଏବେ ସରକାରଙ୍କ ବିଚାରାଧୀନ ଅଛି । ଭାରତରେ ସ୍ପେକ୍ଟ୍ରମ କେମିତି ବଣ୍ଟନ କରାଯିବ, ସେ ନେଇ ଷ୍ଟାରଲିଙ୍କ ଓ ରିଲାଏଲ୍ସ ଜିଓ ଭିନ୍ନ ଭିନ୍ନ ମତ ରଖିଥିଲେ । ସ୍ପେକ୍ଟ୍ରମ ହେଉଛି ସାଟେଲାଇଟ୍ କମ୍ୟୁନିକେସନ ପାଇଁ ବ୍ୟବହାର ହେଉଥିବା ରେଡିଓ ୱେଭ୍ । ମୋବାଇଲ୍ ନେଟୱର୍କ ଭଳି ଏହାକୁ ନିଲାମ କରାଯିବା ପାଇଁ ମତ ରଖିଥିଲା ରିଲାଏନ୍ସ ଜିଓ । ତେବେ ବିନା ବିଡିଂରେ ଏହା ଦିଆଯିବା ପାଇଁ ଯୁକ୍ତି ରଖିଥିଲା ଷ୍ଟାରଲିଙ୍କ । ଭାରତ ସରକାର ଷ୍ଟାରଲିଙ୍କର ମତ ଉପରେ ମୋହର ମାରିଛନ୍ତି ।

#ଷ୍ଟାରଲିଙ୍କ_କମ୍ପାନୀକୁ_ଗ୍ରୀନ_ସିଗନାଲ...
ସ୍ପେଶ ଏକ୍ସ ମାଲିକ ଏଲନ୍ ମସ୍କଙ୍କ ଷ୍ଟାରଲିଙ୍କ କମ୍ପାନୀକୁ ଭାରତରେ ସାଟେଲାଇଟ୍ କମ୍ୟୁନିକେସନ୍ ସେବା ଯୋଗାଇବା ପାଇଁ ଲାଇସେନ୍ସ ମିଳିଛି। ଜାତୀୟ ଗଣମାଧ୍ୟମରେ ଏନେଇ ଚର୍ଚ୍ଚା ହେଉଛି। ଏହା ସହିତ ଷ୍ଟାରଲିଙ୍କ ଭାରତରେ ସାଟେଲାଇଟ୍ ଇଣ୍ଟରନେଟ୍ ସେବା ପ୍ରଦାନ କରିବାରେ ତୃତୀୟ କମ୍ପାନୀ ହୋଇଛି !… pic.twitter.com/IEQe0wsMRc

— ଓଟିଭି (@otvkhabar) June 6, 2025

ଏହି ଲାଇସେନ୍ସ ସଂପର୍କରେ ଷ୍ଟାରଲିଙ୍କ କିମ୍ୱା ଟେଲିକମ୍ୟୁନିକେସନ ବିଭାଗ ପକ୍ଷରୁ କୌଣସି ବିବୃତି ପ୍ରକାଶ ପାଇନାହିଁ । ତେବେ ଏହି ଲାଇସେନସ ଦିଆଯିବା ପରେ ଦେଶର ଗ୍ରାମାଞ୍ଚଳରେ ଓ ଉପାନ୍ତ ଅଞ୍ଚଳରେ ସୁଲଭ ମୂଲ୍ୟରେ ଇଣ୍ଟରନେଟ୍ ସେବା ମିଳିପାରିବ । ଇଣ୍ଟରନେଟ୍ ପାଇଁ ଗାଁ ଲୋକଙ୍କୁ ଆଉ ସଂଘର୍ଷ କରିବାକୁ ପଡିବ ନାହିଁ । ଇଣ୍ଟରନେଟ୍ କ୍ଷେତ୍ରରେ ବିକଶିତ ହୋଇଯିବ ସାରା ଦେଶ ।

ଅଧିକ ପଢ଼ନ୍ତୁ: ଡୋନାଲ୍ଡ ଟ୍ରମ୍ପଙ୍କ ବଡ଼ ନିଷ୍ପତ୍ତି, ୧୨ ଦେଶର ଲୋକଙ୍କୁ ଆମେରିକାରେ ଏଣ୍ଟ୍ରି ନାହିଁ