Drone Transports Emergency Blood: ଡ୍ରୋନ ବଞ୍ଚାଇଦେଲା ଜୀବନ, ମାତ୍ର ୧୫ ମିନିଟରେ ପହଞ୍ଚାଇଦେଲା ରକ୍ତ

ଆମ୍ବୁଲାନ୍ସକୁ ପଛରେ ପକାଇଲା ଡ୍ରୋନ୍ । ଡ୍ରୋନରେ ମାତ୍ର ୧୫ ମିନିଟରେ ୩୫ କିଲୋମିଟର ଅତିକ୍ରମ କରି ମେଡିକାଲରେ ପହଞ୍ଚିଲା ଡ୍ରୋନ୍ । ଏହି ସଫଳତା ଚିକିତ୍ସା ବିଜ୍ଞାନ କ୍ଷେତ୍ରରେ ଏକ ନୂଆ ଅଧ୍ୟାୟ ସୃଷ୍ଟି କରିଛି । ଜନଗହଳିପୂର୍ଣ୍ଣ ଦିଲ୍ଲୀରେ ଇତିହାସ ରଚିଛି ଡ୍ରେନ୍ । ନଥିଲା ଟ୍ରାଫିକ ସମସ୍ୟା । ଆକାଶମାର୍ଗରେ ଡ୍ରୋନରେ ଗୋଟିଏ ହସ୍ପିଟାଲରୁ ଆଉ ଗୋଟିଏ ହସ୍ପିଟାଲକୁ ଗଲା ରକ୍ତ । ନଥିଲା ଟ୍ରାଫିକର ଝିନଝଟ୍ । ଜୁନ୍ ମାସରେ ପ୍ରକାଶିତ ICMR ରିପୋର୍ଟରେ ଏହା ପ୍ରକାଶ ପାଇଛି । ଜୀବନ ରକ୍ଷାକାରୀ ରକ୍ତ ଓ ଅନ୍ୟାନ୍ୟ ସାମଗ୍ରୀ ଶୀଘ୍ର ପହଞ୍ଚାଇବାରେ ଏକ ବିକଳ୍ପ ଭାବେ ଆବିର୍ଭାବ ହୋଇଛି ଡ୍ରୋନ୍ ।

ଗ୍ରେଟର ନଏଡାସ୍ଥିତ ଜିଆଇଏମଏସ୍ ହସ୍ପିଟାଲରୁ କନ୍ନଟପ୍ଲେସସ୍ଥିତ ଲେଡି ହାର୍ଡିଙ୍ଗ ମେଡିକାଲ କଲେଜ ଓ ହସ୍ପିଟାଲକୁ ନିଆଯାଇଥିଲା ଏହି ରକ୍ତ । ଡ୍ରୋନରେ ଆମ୍ୱୁଲାନ୍ସ ତୁଳନାରେ ପ୍ରାୟ ଦେଢ଼ ଘଣ୍ଟା କମ୍ ସମୟ ଲାଗିଥିଲା ।

ଦିଲ୍ଲୀରେ ଡ୍ରୋନ୍ ସାହାଯ୍ୟରେ ରକ୍ତ ପରିବହନ ଏକ ଗୁରୁତ୍ୱପୂର୍ଣ୍ଣ ଓ ନୂତନ ପଦକ୍ଷେପ । ଗବେଷଣା ପରିଷଦ (ICMR) ଦ୍ୱାରା ସମ୍ପାଦିତ ହୋଇଛି। ଏହି ପ୍ରଯୁକ୍ତି ଜରୁରୀ ଚିକିତ୍ସା ପାଇଁ ସମୟ ବଞ୍ଚାଇବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ICMR ର ରିପୋର୍ଟ ଅନୁଯାୟୀ, ଡ୍ରୋନ୍ ବ୍ୟବହାର କରି ରକ୍ତ ଓ ରକ୍ତ ସମ୍ପର୍କୀୟ ଉପାଦାନଗୁଡ଼ିକୁ ନିରାପଦ ଓ ଦ୍ରୁତ ଗତିରେ ପରିବହନ କରାଯାଇପାରୁଛି।

ଅନ୍ୟ ଏକ ରିପୋର୍ଟ ଅନୁଯାୟୀ, ଅନ୍ୟ ଏକ ଘଟଣାରେ ୩୬ କିଲୋମିଟର ଦୂରତ୍ୱ ମାତ୍ର ୮ ମିନିଟ୍‌ରେ ଅତିକ୍ରମ କରିଥିଲା ଡ୍ରୋନ୍ । ଏହି ରାସ୍ତା ଦେଇ ଭ୍ୟାନ୍‌ରେ ୫୫ ମିନିଟ୍ ସମୟ ଲାଗିଥିଲା।

ICMR ର ଅଧ୍ୟୟନ, "Adopting Drone Technology for Blood Delivery: A Feasibility Study to Evaluate Its Efficiency and Sustainability" ଶୀର୍ଷକରେ ଜୁନ୍ ୨୦୨୫ରେ ପ୍ରକାଶିତ ହୋଇଥିଲା। ଏହା ଡ୍ରୋନ୍ ମାଧ୍ୟମରେ ରକ୍ତ ପରିବହନର ଦକ୍ଷତା ଓ ସ୍ଥାୟୀତ୍ୱ ଅପରେ ଆଲୋକପାତ କରାଯାଇଛି ।

ଡ୍ରୋନ୍‌ରେ ପରିବହନ ସମୟରେ ରକ୍ତର ତାପମାତ୍ରା ଓ ଅଖଣ୍ଡତା (integrity) ସଂରକ୍ଷିତ ରହିଥିଲା। ହେମୋଲାଇସିସ୍ (ରକ୍ତ କଣିକାର କ୍ଷତି) ହୋଇନଥିଲା, ଏବଂ ରକ୍ତର ଜୈବ ରାସାୟନିକ ଗୁଣବତ୍ତାରେ ସେଭଳି କୌଣସି ବଡ଼ ପରିବର୍ତ୍ତନ ଦେଖାଯାଇନଥିଲା। ଡ୍ରୋନ୍ ଓ ରାସ୍ତା ଦେଇ ପରିବହନ କରାଯାଇଥିବା ରକ୍ତ ନମୁନାରେ ସାମାନ୍ୟ ପାର୍ଥକ୍ୟ ଦେଖାଯାଇଥିଲେ ମଧ୍ୟ, ଏହା ରକ୍ତର ଉପଯୋଗୀତାକୁ ପ୍ରଭାବିତ କରିନଥିଲା।

ରକ୍ତ ପରିବହନ ପାଇଁ ନିର୍ଦ୍ଦିଷ୍ଟ ତାପମାତ୍ରା ସାଧାରଣତଃ ୨ରୁ ୮ ଡିଗ୍ରୀ ସେଲସିୟସ୍ ମଧ୍ୟରେ ରହିବା ଆବଶ୍ୟକ । ଏହି ତାପମାତ୍ରା ବଜାୟ ରହିଥିଲା । ଡ୍ରୋନ୍‌ରେ ବ୍ୟବହୃତ ସ୍ୱତନ୍ତ୍ର ତାପମାତ୍ରା-ନିୟନ୍ତ୍ରିତ ବାକ୍ସ ମାଧ୍ୟମରେ ଏହା ସମ୍ଭବ ହୋଇଥିଲା। ଏହା ରକ୍ତର ଅକ୍ସିଜେନ ବହନ କ୍ଷମତା ବଜାୟ ରଖିବା ସହ ବ୍ୟାକ୍ଟେରିଆ ସଂକ୍ରମଣରୁ ସୁରକ୍ଷାକୁ ନିଶ୍ଚିତ କରିଥିଲା।

‘i-DRONE’ ନାମକ ଏକ ଡ୍ରୋନ୍ ପ୍ରଥମେ କୋଭିଡ-୧୯ ମହାମାରୀ ସମୟରେ ଟିକା ବଣ୍ଟନ ପାଇଁ ବ୍ୟବହୃତ ହୋଇଥିଲା। ଏହା ନିମ୍ନ ତାପମାତ୍ରାରେ ରକ୍ତ ଓ ଅନ୍ୟାନ୍ୟ ଚିକିତ୍ସା ସାମଗ୍ରୀ ପରିବହନ କରିବା ପାଇଁ ସକ୍ଷମ।

ଏହି ପରୀକ୍ଷଣ ICMR, GIMS, LHMC, ଓ ଜୟପୀ ଇନଷ୍ଟିଟ୍ୟୁଟ୍ ଅଫ୍ ଇନଫରମେସନ୍ ଟେକ୍ନୋଲୋଜି (JIIT), ନଏଡା ମଧ୍ୟରେ ସହଯୋଗରେ କରାଯାଇଥିଲା। ଏହା ଭାରତ ସରକାରଙ୍କ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଓ ଅନ୍ୟାନ୍ୟ ସଂସ୍ଥାଙ୍କ ସହାୟତାରେ ସମ୍ପନ୍ନ ହୋଇଥିଲା।

ଡ୍ରୋନ୍‌ରେ ରକ୍ତ ପରିବହନ ଦ୍ୱାରା ପାରମ୍ପରିକ ରାସ୍ତା ପରିବହନ ଅପେକ୍ଷା ସମୟ ଅଧାରୁ ଅଧିକ କମିଛି । ଏହା ଜରୁରୀ ଅବସ୍ଥାରେ ଜୀବନ ରକ୍ଷା କରିବାରେ ସହାୟକ।

ଏହି ପ୍ରଯୁକ୍ତି ଦୁର୍ଗମ ଓ ଗ୍ରାମାଞ୍ଚଳରେ ଚିକିତ୍ସା ସାମଗ୍ରୀ ପହଞ୍ଚାଇବାରେ ବିଶେଷ ଭାବେ ଉପଯୋଗୀ। ଉଦାହରଣ ସ୍ୱରୂପ, ହିମାଚଳ ପ୍ରଦେଶ, ମଣିପୁର ଓ ନାଗାଲାଣ୍ଡ ଭଳି ଅଞ୍ଚଳରେ ଡ୍ରୋନ୍ ମାଧ୍ୟମରେ ଔଷଧ ଓ ନମୁନା ପରିବହନ କରାଯାଇଛି।

ତେବେ ଏଥିପାଇଁ ଅନେକ ଚାଲେଞ୍ଜ ମଧ୍ୟ ରହିଛି । ଡ୍ରୋନ୍ ଉଡ଼ାଣ ପାଇଁ ଏୟାର ଟ୍ରାଫିକ କଣ୍ଟ୍ରୋଲରୁ ଅନୁମତି ଆବଶ୍ୟକ, ଯାହା ଏକ ଚ୍ୟାଲେଞ୍ଜ। ପାଗ ଅବସ୍ଥା, ବ୍ୟାଟେରୀର ସ୍ଥାୟୀତ୍ୱ ଓ ଡ୍ରୋନ୍‌ର ରକ୍ଷଣାବେକ୍ଷଣ ମଧ୍ୟ ଗୁରୁତ୍ୱପୂର୍ଣ୍ଣ।

ରକ୍ତର ଗୁଣବତ୍ତା ଉପରେ ଡ୍ରୋନ୍ ପରିବହନର ପ୍ରଭାବ ସମ୍ପର୍କରେ ଅଧିକ ଗବେଷଣାର ଆବଶ୍ୟକତା ମଧ୍ୟ ରହିଥିବା ଅନେକ ମତ ଦେଉଛନ୍ତି । ଦିଲ୍ଲୀରେ କରାଯାଇଥିବା ପରୀକ୍ଷଣ ସଫଳ ହୋଇଛି । ଡ୍ରୋନ୍ ମାଧ୍ୟମରେ ରକ୍ତ ନିରାପଦ ଓ ଦ୍ରୁତ ଗତିରେ ପରିବହନ କରାଯାଇପାରିବ, ଏହା ସ୍ପଷ୍ଟ ହୋଇଛି ।

ଅଧିକ ପଢ଼ନ୍ତୁ: ଭାରତକୁ ମିଳିବ ୩ ଲଢ଼ୁଆ ଆପାଚି ହେଲିକପ୍ଟର; ପାକିସ୍ତାନ ସୀମାରେ ହେବ ମୁତୟନ...