କମାଲ କଲା DRDO : ୪୫ ଦିନରେ ଛିଡ଼ା ହୋଇଗଲା ୭ ମହଲା କୋଠା

ମାସେ ନୁହେଁ କି ବର୍ଷ ନୁହେଁ, ୪୫ ଦିନରେ ନିର୍ମାଣ ହେଲା ୭ ମହଲା କୋଠା । ଏକଥା ବିଶ୍ୱାସ ନେହେଲେ ମଧ୍ୟ ସତ । ତେବେ ଏହି କୋଠାରେ ବାୟୁସେନା ପକ୍ଷରୁ ଯୁଦ୍ଧ ବିମାନ ବିକଶିତ ଓ ଅନୁସନ୍ଧାନ କରିବାର ସମସ୍ତ ସୁବିଧା ଉପଲବ୍ଧ ହେବ ବୋଲି ଜଣାପଡ଼ିଛି । ବେଙ୍ଗାଲୁରୁଠାରେ ବିମାନ ବିକାଶ ପ୍ରତିଷ୍ଠାନର ଉଡ଼ାଣ ନିୟନ୍ତ୍ରଣ ପ୍ରଣାଳୀର ବ୍ୟବହାର କରାଯାଇ ଏହି କୋଠା ନିର୍ମାଣ ହୋଇଥିବା କଥା କୁହାଯାଇଛି।

୪୫ ଦିନରେ ପୂରା ତିଆରି ହୋଇଗଲା ୭ ମହଲା କୋଠା ଘର । ଆଉ ଏବେ ଘର ଦେଖିବାକୁ ଲୋକଙ୍କ ଜମୁଛି ଭିଡ଼। ବେଙ୍ଗାଲୁରୁର ଏହି ଘରକୁ ନେଇ ଏବେ ପୂରା ଭାରତରେ ଚର୍ଚ୍ଚା । କାରଣ ଏତେ କମ୍ ସମୟରେ ଘର ତିଆରି ହୋଇଯିବା ସହଜ କଥା ନୁହେଁ । କାରଣ ନିଅଁ ଖୋଳିବା, ପିଲର ପକାଇବା, ଛାତ, ୱାରିଂ, ପଲସ୍ତରା,ରଙ୍ଗ ଏବଂ କବାଟ ଝରକା ଲଗଉ ବହୁତ ସମୟ ଲାଗେ । ହେଲେ ଘର ମାତ୍ର ୪୫ ଦିନ ଅର୍ଥାତ୍‌ ଦେଢ ମାସରେ ତିଆରି ହେଲା କେମିତି ? ସମସ୍ତଙ୍କ ମନରେ ପ୍ରଶ୍ନ ଉଠୁଛନ୍ତି ।

ତେବେ ଡିଆରଡିଓର ଜଣେ ଅଧିକାରୀଙ୍କ କହିବା ଅନୁସାରେ, ହାଇବ୍ରିଡ ଟେକ୍ନୋଲୋଜି ମାଧ୍ୟମରେ ମାତ୍ର ୪୫ ଦିନ ମଧ୍ୟରେ ଏହି ୭ ମହଲା କୋଠା ନିର୍ମାଣ କରାଯାଇଛି । ଏହି କମ୍ପେଲକ୍ସ ଉନ୍ନତ ଓ ମଧ୍ୟମ ଯୁଦ୍ଧ ବିମାନ ପ୍ରକଳ୍ପ ଅଧିନରେ ଆସୁଥିବା ବେଳେ ବିମାନ ନିୟନ୍ତ୍ରଣ ପ୍ରଣାଳୀ ପାଇଁ ଏହା ନୂତନ ମାନଦଣ୍ଡର ବିକାଶକୁ ସୁଗମ କରିବ ବୋଲି ସେ କହିଛନ୍ତି।

ଭାରତୀୟ ବାୟୁସେନାକୁ ସଶକ୍ତ କରିବା ପାଇଁ କେନ୍ଦ୍ର ସରକାର ଅନେକ ଯୋଜନା କରୁଛନ୍ତି । ଆଉ ସେହି ଯୋଜନା ଅନୁସାରେ ଏହି ଘର ତିଆରି ହୋଇଛି । ସୂଚନା ଅନୁସାରେ ଏହି ପ୍ରକଳ୍ପର ପ୍ରାରମ୍ଭିକ ବିକାଶ ମୂଲ୍ୟ ୧୫ ହଜାର କୋଟି ଟଙ୍କା ବୋଲି ଆକଳନ କରାଯାଇଛି । ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ଏହି କୋଠାର ଉଦଘାଟନ କରିଛନ୍ତି ।