ଆଜି କୋର୍ଟରେ ହାଜର ହେବେ ମନୀଷ ସିସୋଦିଆ : କେନ୍ଦ୍ର ସରକାରଙ୍କୁ କେଜ୍ରିୱାଲଙ୍କ ଭର୍ତ୍ସନା

ପ୍ରଥମେ ସିବିଆଇ(Central Bureau of Investigation) , ତା ପରେ ଇଡି( Enforcement Directorate) । ମଦ ଦୁର୍ନୀତି  ଅଭିଯୋଗ ( Excise Policy Case) ରେ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ଗିରଫ କରିଛି ଇଡି । ଦୁଇ ଦିନ ଧରି ଜେରା କରିବା ପରେ ମନି ଲଣ୍ଡ୍ରିଂ ଅଭିଯୋଗରେ ତାଙ୍କୁ ଗିରଫ କରାଯାଇଛି । ଆଜି  ମନୀଷ ସିସୋଦିଆ (Manish Sisodia)ଙ୍କୁ କୋର୍ଟରେ ହାଜର କରାଯିବ।

ସେପଟେ ସିବିଆଇ ଗିରଫ କରିବା ମାମଲାରେ ଆଜି ତାଙ୍କ ଜାମିନ ଆବେଦନ ଶୁଣାଣି ହେବାର ଅଛି । ତା ଆଗରୁ ହିଁ ସିସୋଦିଆଙ୍କୁ ଗିରଫ କରିଛି ଇଡି । ତେବେ ଏନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ (Chief Minister Arvind Kejriwal ) ଅଭିଯୋଗ କରିଛନ୍ତି, କୌଣସି ଉପାୟରେ ହେଉ ପଛେ ସିସୋଦିଆଙ୍କୁ ଜେଲରେ ରଖିବାକୁ ଚାହୁଁଛନ୍ତି କେନ୍ଦ୍ର ସରକାର । ତେଣୁ ତାଙ୍କୁ ଇଡି ଦ୍ୱାରା ଗିରଫ କରାଯାଇଛି ।

ଜବାବରେ ବିଜେପିର ମନୋଜ ତିୱାରୀ କହିଛନ୍ତି, ଇଡି ଗିରଫ କରିବା ଘଟଣାରୁ ଜଣାପଡୁଛି ଯେ, ସିସୋଦିଆ ଦୁର୍ନୀତିରେ ସଂପୃକ୍ତ ଅଛନ୍ତି । ସିସୋଦିଆ ଏବେ ତିହାର ଜେଲରେ ବିଚାର ବିଭାଗୀୟ ହାଜତରେ ଅଛନ୍ତି । ଗତ ଫେବ୍ରୁଆରି ୨୬ ତାରିଖରେ ସିବିଆଇ ସିସୋଦିଆଙ୍କୁ ଗିରଫ କରିଥିଲା ।