LIVE TV
ନୂଆଦିଲ୍ଲୀ : ଆଜି ନୂଆଦିଲ୍ଲୀରେ CWC ବୈଠକ ହେଉଛି । କଂଗ୍ରେସ ସାଂଗଠନିକ ନିର୍ବାଚନ, ଆଗାମୀ ବିଧାନସଭା ନିର୍ବାଚନ, ଲଖିମପୁର ଖେରୀ ହିଂସା, କୃଷକ ଆନ୍ଦୋଳନ ଏବଂ ମୁଦ୍ରାସ୍ଫୀତି ଭଳି ପ୍ରସଙ୍ଗ ଆଦି ଏହି ବୈଠକର ମୁଖ୍ୟ ଏଜେଣ୍ଡା ରହିବ ବୋଲି କୁହାଯାଉଛି । ଆଜି ସକାଳ ୧୦ ଟାରୁ ଆରମ୍ଭ ହେବ ବୈଠକ । ବିଭିନ୍ନ ରାଜ୍ୟରେ ଲାଗିରହିଥିବା କଂଗ୍ରେସ କନ୍ଦଳ ତଥା ଅନ୍ୟାନ୍ୟ ପ୍ରସଙ୍ଗ ଉପରେ ଆଲୋଚନା ପାଇଁ ଏକ ବୈଠକ ଡକାଇବାକୁ ଦୀର୍ଘ ଦିନ ଧରି ଦାବି କରାଯାଉଥିଲା । ଏଭଳି ପରିସ୍ଥିତିରେ କଂଗ୍ରେସ ହାଇକମାଣ୍ଡ ବର୍ତ୍ତମାନ ବୈଠକ ଡାକିବାକୁ ନିଷ୍ପତ୍ତି ନେଇଛନ୍ତି ।
ବୈଠକ ଡକାଇବାକୁ ଦାବି କରୁଥିଲେ ଜି -୨୩ ନେତା
ବିଦ୍ରୋହୀ କଂଗ୍ରେସ ନେତାଙ୍କ ଗୋଷ୍ଠୀ ଜି -୨୩ କ୍ରମାଗତ CWC ବୈଠକ ଡକାଇବାକୁ ଦାବି କରୁଥିଲେ । ଗତ ମାସରେ ପଞ୍ଜାବରେ ହୋଇଥିବା ଅଶାନ୍ତି ମଧ୍ୟରେ କପିଲ ସିବଲ ପ୍ରଶ୍ନ କରିଛନ୍ତି ଯେ ପୂର୍ଣ୍ଣକାଳୀନ ଅଧ୍ୟକ୍ଷଙ୍କ ଅନୁପସ୍ଥିତିରେ କଂଗ୍ରେସରେ କିଏ ନିଷ୍ପତ୍ତି ନେଉଛନ୍ତି ?
ଉତ୍ତରପ୍ରଦେଶ, ପଞ୍ଜାବ, ଉତ୍ତରାଖଣ୍ଡ, ଗୋଆରେ ଆଗାମୀ ଦିନରେ ବିଧାନସଭା ନିର୍ବାଚନ ହେବାକୁ ଥିବାରୁ ସେଠାରେ ସଂଗଠନକୁ ମଜବୁତ କରିବାପାଇଁ ପଦକ୍ଷେପ ନିଆଯିବ ବୋଲି କୁହାଯାଉଛି । ଏହି ବୈଠକରେ ମୁଖ୍ୟତଃ ଲଖିମପୁର ହିଂସା ଉପରେ ଆଲୋଚନା କରାଯାଇପାରେ । ଅକ୍ଟୋବର ୩ରେ ଲାଖିମପୁରରେ ହୋଇଥିବା ହିଂସାରେ ଆଠ ଜଣଙ୍କର ମୃତ୍ୟୁ ଘଟିଥିଲା । ଏହି ମାମଲାରେ ମୁଖ୍ୟ ଅଭିଯୁକ୍ତ ପୁଅ ଆଶିଷ ମିଶ୍ର ଗିରଫ କରାଯାଇଛି । ଏହା ବ୍ୟତୀତ ମୁଦ୍ରାସ୍ଫୀତି, କୃଷକଙ୍କ ଆନ୍ଦୋଳନ ଏବଂ ଦେଶର ଆର୍ଥିକ ସ୍ଥିତି ଭଳି ପ୍ରସଙ୍ଗ ମଧ୍ୟ ଆଲୋଚନା କରାଯାଇପାରେ ।
କେବଳ ଏତିକି ନୁହେଁ, ଗତ ନିର୍ବାଚନରେ ପରାଜୟ ଏବଂ ତ୍ରୁଟି ସମ୍ପର୍କରେ ଦଳ ମଧ୍ୟରେ ଉଠିଥିବା ସ୍ୱର ଉପରେ ମଧ୍ୟ ଆଲୋଚନା ହେବାର ସମ୍ଭାବନା ରହିଛି । ଏହି ବୈଠକରେ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍, ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବାଗେଲ ଏବଂ ପଞ୍ଜାବର ମୁଖ୍ୟମନ୍ତ୍ରୀ ଚରଣଜିତ ସିଂ ଚାନ୍ନି ଉପସ୍ଥିତ ରହିବେ ବୋଲି ଆଶା କରାଯାଉଛି ।
Also Read
ପୂର୍ବରୁ କରୋନା କଟକଣା ଯୋଗୁଁ କଂଗ୍ରେସ କର୍ଯ୍ୟକାରୀ କମିଟି ଭର୍ଚୁଆଲ ମୋଡରେ ହେଉଥିବାବେଳେ ୧୮ ମାସ ପରେ ପ୍ରଥମ ଥର ପାଇଁ ନୂଆଦିଲ୍ଳୀ ମୁଖ୍ୟାଳୟରେ ଏହି ବୈଠକ ହେବ । ୨୦୧୯ ଲୋକସଭା ନିର୍ବାଚନରେ କଂଗ୍ରେସରେ ବିପର୍ଯ୍ୟୟ ପରେ ରାହୁଲ ଗାନ୍ଧି ସଭାପତି ପଦରୁ ଇସ୍ତଫା ଦେଇଥିଲେ । ଏହାପର ଠାରୁ ସୋନିଆ ଗାନ୍ଧି ସଭାପତି ପଦରେ ରହିଛନ୍ତି ।
