ମହଙ୍ଗା ଉପରେ ମହଙ୍ଗା ମାଡ଼: କଣ୍ଟ୍ରୋଲ ହେଉନି ପେଟ୍ରୋଲ, ଡିଜେଲ ଦର; ପୁଣି ବଢ଼ିଲା CNG ଦାମ୍‌

ଆକାଶ ଛୁଆଁ ତେଲ ଦର। ପେଟ୍ରୋଲ, ଡିଜେଲଠୁ ଆରମ୍ଭ କରି ସିଏନ୍‌ଜି ପର୍ଯ୍ୟନ୍ତ ସବୁର ଦାମ୍‌ ହୁ ହୁ ହୋଇ ବଢ଼ିବାରେ ଲାଗିଛି। ପ୍ରତିଦିନ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଉଥିବା ବେଳେ CNG(Compressed Natural Gas) ମଧ୍ୟ ମହଙ୍ଗା ହୋଇଛି। ଦିଲ୍ଲୀରେ CNG ଦାମ୍‌ ପୁଣିଥରେ ବୃଦ୍ଧି ପାଇଛି। 

ଦିଲ୍ଲୀରେ CNG ଗ୍ୟାସ୍‌ ଦାମ୍‌ ପ୍ରତି କିଲୋକୁ ୨ ଟଙ୍କା ୫୦ ପଇସା ବୃଦ୍ଧି ପାଇଛି। ବର୍ଦ୍ଧିତ ଦର ପରେ ଏବେ ଦିଲ୍ଲୀରେ CNG ଦାମ୍‌ ପ୍ରତି କିଲୋକୁ ୬୬ ଟଙ୍କା ୬୧ ପଇସାରେ ପହଞ୍ଚିଛି। ଗତ ୫ ଦିନରେ CNG ପ୍ରତି କିଲୋକୁ ୬ ଟଙ୍କା ୬୦ ପଇସା ପର୍ଯ୍ୟନ୍ତ ବୃଦ୍ଧି ହୋଇସାରିଲାଣି। ସେପଟେ ଗତ ୧୬ ଦିନ ଭିତରେ ୧୪ ଥର ପାଇଁ ବଢ଼ିଲାଣି ତେଲ ଦର। ଆଜି ପେଟ୍ରୋଲ ଓ ଡିଜେଲ ଲିଟର ପିଛା ୮୦ ପଇସା ବୃଦ୍ଧି ପାଇଛି। ଗତ ୧୬ ଦିନ ମଧ୍ୟରେ ତୈଳ ଦର ଲିଟର ପ୍ରତି ୧୦ଟଙ୍କା ବୃଦ୍ଧି ପାଇସାରିଲାଣି। 

ଲଗାତାର ଭାବେ ତେଲ ଦର ବୃଦ୍ଧି ପାଉଥିବାରୁ ଜନସାଧାରଣ ଅତିଷ୍ଠ ହୋଇପଡ଼ିଲେଣି। ୪ ମାସ ପରେ ଗତ ମାର୍ଚ୍ଚ ୨୨ରେ ପେଟ୍ରୋଲ ଓ ଡିଜେଲ ଦର ବୃଦ୍ଧି ହୋଇଥିଲା। ସେବେଠୁ ଲଗାତାର ଭାବେ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇଛି। ଗତବର୍ଷ ନଭେମ୍ବର ୪ଠୁ ଚଳିତ ବର୍ଷ ମାର୍ଚ୍ଚ ୨୧ ପର୍ଯ୍ୟନ୍ତ ପେଟ୍ରୋଲ ଓ ଡିଜେଲ୍‌ ଦାମରେ କୌଣସି ପରିବର୍ତ୍ତନ ହୋଇନଥିଲା। ଏହାପରେ ମାର୍ଚ୍ଚ ୨୨ରେ ତୈଳ ଦର ଧୀରେ ଧୀରେ ବୃଦ୍ଧି ହୋଇଥିଲା। ଗତ ୧୬ ଦିନ ମଧ୍ୟରେ ତୈଳ ଦର ଲିଟର ପ୍ରତି ୧୦ଟଙ୍କା ବୃଦ୍ଧି ପାଇସାରିଲାଣି।