• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Prangyan Parimita

ଦାମୀ ଫୋନ୍‌ ପାଇଁ ଡ୍ୟାମ୍‌ରୁ ପାଣି ଖଲାସ କରିଥିବା ବାବୁଙ୍କ ମୁଣ୍ଡରେ ଚଡ଼କ । ଏବେ ପାଣି ନଷ୍ଟ କରି ସମସ୍ତ ଖର୍ଚ୍ଚ ବହନ କରିବେ । ଛତିଶଗଡ଼ରେ ସାମାନ୍ୟ ଏକ ଫୋନ୍‌ ପାଇଁ ଘଟିଥିଲା ଅଜବ ଘଟଣା ।  ଜଣେ ସରକାରୀ ଅଧିକାରୀ ସେଲଫି ନେବାବେଳେ ଡ୍ୟାମ୍‌ରେ ଫୋନ୍‌ ପଡ଼ିଯିବାରୁ ପୂରା ଡ୍ୟାମ୍‌ ଶୁଖାଇ ଦେଇଥିଲେ । ୩ ଦିନ ଧରି ମୋଟର୍‌ ଲଗାଇ ଡ୍ୟାମ୍‌ରୁ ୨୧ ଲକ୍ଷ ଲିଟର ପାଣି ବାହାର କରିଦେବା ପରେ ବାବୁଙ୍କ ମିଳିଥିଲା । ହେଲେ ତାଙ୍କର ଏଭଳି କାମ ପାଇଁ ଅଭିଯୋଗ ହେବାରୁ ସେ ନିଲମ୍ବିତ ହୋଇଛନ୍ତି । ଆଉ ଏବେ ତାଙ୍କୁ ୨୧ ଲକ୍ଷ ଲିଟର୍‌ ପାଣିର ମୂଲ୍ୟ ଦେବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି ।

ଛତିଶଗଡ଼କାଙ୍କେର ଜିଲ୍ଲା କୋଇଲିବେଡ଼ା ବ୍ଲକ୍‌ର ଖାଦ୍ୟ ନିରୀକ୍ଷକ ଅଧିକାରୀ ରାଜେଶ ବିଶ୍ୱାସ । ସାଙ୍ଗ ମାନଙ୍କ ସହ ମିଶି ମେ ୨୧ରେ ‌ପଙ୍ଖାଜୁରର ପରାଲକୋଟ ଡ୍ୟାମ୍‌କୁ ବୁଲିବା ପାଇଁ ଯାଇଥିଲେ ଏହି ୩୨ ବର୍ଷିୟ ସରକାରୀ ବାବୁ । ହେଲେ ସେଲ୍ଫି ନେବା ସମୟରେ ତାଙ୍କର ୯୫ ହଜାର ଟଙ୍କା ମୂଲ୍ୟର ସାମସଙ୍ଗ ଏସ୍‌-୨୩ ଫୋନ୍‌ ୧୦ ଫୁଟ୍‌ ଗଭୀର ଜଳାଶୟକୁ ଖସି ପଡ଼ିଥିଲା । ଫୋନ୍‌ ପାଣିରେ ଖସିପଡ଼ିବା ପରେ ତାଙ୍କ ସାଙ୍ଗସାଥୀ ଓ ସ୍ଥାନୀୟ ଲୋକେ ବହୁ ଖୋଜାଖୋଜି କରିଥିଲେ । କିନ୍ତୁ ଅନେକ ଖୋଜାଖୋଜି ପରେ ମଧ୍ୟ ବାବୁଙ୍କର ଫୋନ୍‌ ମିଳିନଥିଲା । ଶେଷରେ ଖାଦ୍ୟ ନିରୀକ୍ଷକଙ୍କ ମୁଣ୍ଡକୁ ଏକ ଦୁର୍ବୁଦ୍ଧି ଜୁଟିଥିଲା ।

ତା’ପର ଦିନ ଜଳସେଚନ ବିଭାଗ ଫୋନ୍‌ କେମିତି କାଢ଼ିହେବ ସେନେଇ ଆଲୋଚନା କରିଥିଲେ । ଜଣେ ବରିଷ୍ଠ ଅଧିକାରୀ ଡ୍ୟାମ୍‌ରୁ ପାଣି ଖାଲି କରିବା ପାଇଁ ତାଙ୍କୁ ଅନୁମତି ମଧ୍ୟ ଦେଇଥିଲେ । ଆଉ ତା’ପରେ ଆରମ୍ଭ ହୋଇଥିଲା ଡ୍ୟାମ୍‌ରୁ ପାଣି ଶୁଖାଇବା କାମ ।

ସୋମବାର ସନ୍ଧ୍ୟାରୁ ଡ୍ୟାମ୍‌ରୁ ପାଣି ଖାଲି କରିବା ଆରମ୍ଭ ହେଲା । ଗୁରୁବାର ପର୍ଯ୍ୟନ୍ତ ଡ୍ୟାମ୍‌ରୁ ୨୧ ଲକ୍ଷ ଲିଟର ପାଣି ଖାଲି କରାଯାଇଥିଲା । ୧୫୦୦ ଏକର ଚାଷଜମିକୁ ଜଳସେଚନ ପାଇଁ ଏତିକି ପାଣି ଯଥେଷ୍ଟ ହୋଇଥା’ନ୍ତା । ଏନେଇ ଅଭି‌ଯୋଗ ହେବାପରେ ଜଳସମ୍ପଦ ବିଭାଗର ଜଣେ ଅଧିକାରୀ ଘଟଣା ସ୍ଥଳରେ ପହଞ୍ଚିଥିଲେ ଏବଂ ପାଣି ଖାଲି କରିବା କାର୍ଯ୍ୟ ବନ୍ଦ କରାଯାଇଥିଲା । ହେଲେ ସେତେବେଳକୁ ଡ୍ୟାମ୍‌ରୁ ୨୧ ଲକ୍ଷ ଲିଟର ପାଣି ଖାଲି ହୋଇସାରିଥିଲା ।

ଏହି ଘଟଣା ପାଇଁ ତାଙ୍କୁ ନିଲମ୍ବିତ କରାଯାଇଥିବା ବେଳେ ସେ ଅପଚୟ କରିଥିବା ପାଣିର ମୂଲ୍ୟ ବହନ କରିବାକୁ  ନିର୍ଦ୍ଦେଶ ହୋଇଛି । ଏହି ଆଧାରରେ ଖାଦ୍ୟ ନିରୀକ୍ଷକ ଅଧିକାରୀଙ୍କୁ ୫୩ହଜାର ଟଙ୍କାର ଜରିମାନା ଆଦାୟ ପାଇଁ ନୋଟିସ ଜାରି କରାଯାଇଛି ।