ଛତିଶଗଡ଼ ସରକାରର ବଡ଼ ଘୋଷଣା : ଚାଷୀଙ୍କ ଠାରୁ କିଣାହେବ ଗାଈ ମୂତ୍ର

ଗୋମୂତ୍ର କିଣିବେ ଛତିଶଗଡ଼ର କଂଗ୍ରେସ ସରକାର । ରାଜ୍ୟ ସରକାରଙ୍କ ପକ୍ଷରୁ ଚାଲିଥିବା ଗୋଧନ ନ୍ୟାୟ ଯୋଜନାରେ ଚାଷୀଙ୍କଠୁ ଏଣିକି ଗାଈ ମୂତ୍ର କିଣାଯିବ । ଏଥିପାଇଁ ଲିଟର ପିଛା ସର୍ବନିମ୍ନ ୪ ଟଙ୍କା ଦର ଧାର୍ଯ୍ୟ କରାଯାଇଛି । ଅର୍ଥାତ୍ ଲିଟର ପିଛା ସର୍ବନିମ୍ନ ୪ଟଙ୍କା ଦରରେ ସରକାର ଚାଷୀଙ୍କ ଠାରୁ ଗାଈ ମୂତ୍ର କିଣିବେ ।

ଆସନ୍ତା ୨୮ ତାରିଖରେ ଛତିଶଗଡ଼ର ହରେଲି ପର୍ବ ଅବସରରେ ଏହି ଗୋମୂତ୍ର ସଂଗ୍ରହ ଯୋଜନାର ଶୁଭାରମ୍ଭ ହେବ । ରାଜ୍ୟର ଗୋ ପାଳକ ଓ ଜୈବିକ ପଦ୍ଧତିରେ ଚାଷ କରୁଥିବା ଚାଷୀଙ୍କୁ ରୋଜଗାର ଦେବା ସହ ଗ୍ରାମ୍ୟ ଅର୍ଥନୀତିକୁ ମଜଭୁତ୍ କରିବା ଲକ୍ଷ୍ୟରେ ରାଜ୍ୟ ସରକାର ଦୁଇ ବର୍ଷ ତଳୁ ଗୋଧନ ନ୍ୟାୟ ଯୋଜନା ଆରମ୍ଭ କରିଛନ୍ତି ।

ଏହି ଯୋଜନା ଅଧିନରେ ପୂର୍ବରୁ ଚାଷୀଙ୍କଠୁ ଗୋବର କିଣା ଯାଉଥିଲା ବେଳେ ଏବେ ଗୋମୂତ୍ର କିଣିବାକୁ ଯାଉଛନ୍ତି । ଛତିଶଗଡ଼ର ଭୂପେଶ ବାଘେଲ୍ ସରକାର ଗୋଧନ ନ୍ୟାୟ ଯୋଜନାରେ ଚାଷୀଙ୍କଠୁ ଏପର୍ଯ୍ୟନ୍ତ ୧୫୦ କୋଟି ଟଙ୍କାର ଗୋବର ସଂଗ୍ରହ କରାଯାଇଥିବା ଜଣାପଡ଼ିଛି ।