ବ୍ୟାଙ୍କ ଋଣ ମାମଲା, ବିଜୟ ମାଲ୍ୟାଙ୍କ ନାଁରେ ଜାରି ହେଲା NBW

ବଢ଼ିଲା ବିଜୟ ମାଲ୍ୟାଙ୍କ ଅଡ଼ୁଆ । ମୁମ୍ବାଇର ଏକ ସ୍ୱତନ୍ତ୍ର କୋର୍ଟ ପଳାତକ ବ୍ୟବସାୟୀ ବିଜୟ ମାଲ୍ୟାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରିଛନ୍ତି। ଏହି ଜାମିନ ବିହୀନ ୱାରେଣ୍ଟ ବିଜୟ ମାଲ୍ୟାଙ୍କ ବିରୋଧରେ ଭାରତୀୟ ଓଭରସିଜ୍ ବ୍ୟାଙ୍କ ସହ ଜଡିତ ୧୮୦ କୋଟି ଟଙ୍କା ଋଣ ପରିଶୋଧ ନ କରିବା ମାମଲା ସହିତ ଜଡିତ । ଜୁନ୍ ୨୯ରେ ସ୍ୱତନ୍ତ୍ର କୋର୍ଟ ମାଲ୍ୟାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରିଥିଲେ, କିନ୍ତୁ ସୋମବାର ଏହାର ଆଦେଶ ଉପଲବ୍ଧ ହୋଇଛି । ସିବିଆଇର ଯୁକ୍ତି ଶୁଣିବା ପରେ ଏବଂ ବିଜୟ ମାଲ୍ୟାଙ୍କ ପଳାତକ ସ୍ଥିତି ଆଧାରରେ କୋର୍ଟ କହିଛନ୍ତି ଯେ ମାଲ୍ୟାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରିବା ପାଇଁ ଏହି ମାମଲା ସମ୍ପୂର୍ଣ୍ଣ ଉପଯୁକ୍ତ ଅଟେ । ତାଙ୍କ ଉପସ୍ଥିତି ସୁନିଶ୍ଚିତ କରିବା ପାଇଁ ତାଙ୍କ ବିରୋଧରେ ଖୋଲାଖୋଲି ଏନବିଡବ୍ଲ୍ୟୁ ଜାରି କରିବା ଉଚିତ୍।

ଅଧିକ ପଢ଼ନ୍ତୁ: ନୂଆ ଆଇନ୍‌ ନେଇ ତେଜିଲା ରାଜନୀତି; ବିରୋଧ କଲା କଂଗ୍ରେସ, ଶାହ କହିଲେ...

କୋର୍ଟରେ ଏହି ମାମଲା ଶୁଣାଣି ସମୟରେ ସିବିଆଇ କହିଛି, ତଦନ୍ତରୁ ଜଣାପଡ଼ିଛି ଯେ ‘ଦେବାଳିଆ ଏୟାରଲାଇନ୍ସ କିଙ୍ଗଫିସର ପ୍ରମୋଟର ବିଜୟ ମାଲ୍ୟା ଜାଣିଶୁଣି ସରକାରୀ ବ୍ୟାଙ୍କରୁ ନିଆଯାଇଥିବା ୧୮୦ କୋଟି ଟଙ୍କା ଋଣ ପରିଶୋଧ କରିନାହାଁନ୍ତି। ଇଡି ଦ୍ୱାରା ଅନୁସନ୍ଧାନ କରାଯାଉଥିବା ମନି ଲଣ୍ଡରିଂ ମାମଲାରେ ବିଜୟ ମାଲ୍ୟାଙ୍କୁ ପଳାତକ ଘୋଷଣା କରାଯାଇଛି । ବର୍ତ୍ତମାନ ସେ ଲଣ୍ଡନରେ ଅଛନ୍ତି ଏବଂ ଭାରତ ସରକାର ତାଙ୍କୁ ବ୍ରିଟିଶ ସରକାରଙ୍କଠାରୁ ପ୍ରତ୍ୟର୍ପଣ କରିବାକୁ ଚେଷ୍ଟା କରୁଛନ୍ତି’ ।

ସୂଚନା ଅନୁଯାୟୀ ବିଜୟ ମାଲ୍ୟା ୨୦୦୭ ରୁ ୨୦୧୨ ମଧ୍ୟରେ ତତ୍କାଳୀନ ଚାଲୁଥିବା କିଙ୍ଗଫିସର ଏୟାରଲାଇନ୍ସ ପାଇଁ ଭାରତୀୟ ଓଭରସିଜ୍ ବ୍ୟାଙ୍କରୁ ୧୮୦ କୋଟି ଟଙ୍କା ଋଣ ନେଇଥିଲେ । ଏହି ମାମଲାରେ ବିଜୟ ମାଲ୍ୟାଙ୍କ ସମେତ ମୋଟ ୧୦ ଜଣ ଅଭିଯୁକ୍ତ ଅଛନ୍ତି। ଅଗଷ୍ଟ ୨୦୧୬ରେ ଏହି ମାମଲାରେ ଏଫ୍‌ଆଇଆର୍‌ ରୁଜୁ ହୋଇଥିଲା। ସମସ୍ତ ଅଭିଯୁକ୍ତଙ୍କୁ ହାଜର ହେବା ପାଇଁ ସମନ ଜାରି କରାଯାଇଛି। କିନ୍ତୁ ପଳାତକ ବିଜୟ ମାଲ୍ୟାଙ୍କ ପାଇଁ କୋର୍ଟ ଜାମିନ ବିହୀନ ୱାରେଣ୍ଟ ଜାରି କରିଛନ୍ତି।

ଅଧିକ ପଢ଼ନ୍ତୁ: ପଶ୍ଚିମବଙ୍ଗରେ ଅରାଜକତା; ସର୍ବ ସମ୍ମୁଖରେ ଯେତେ ପାରିଲେ ଛେଚିଲେ, ଭିଡିଓ ଭାଇରାଲ