ଅଡୁଆରେ ଦିଲ୍ଲୀ ମୁଖ୍ୟ ଶାସନ ସଚିବ; ପ୍ରମାଣ ନଷ୍ଟ ଅଭିଯୋଗରେ ମାମଲା ରୁଜୁ

ଅଡୁଆରେ ଦିଲ୍ଲୀ ମୁଖ୍ୟ ଶାସନ ସଚିବ ନରେଶ କୁମାର। ଉତ୍ତରପ୍ରଦେଶର ଆଲମୋରା ସହରର ଏକ କୋର୍ଟଙ୍କ ନିର୍ଦ୍ଦେଶ ପରେ ଦିଲ୍ଲୀର ମୁଖ୍ୟ ଶାସନ ସଚିବ ନରେଶ କୁମାର ଏବଂ ତାଙ୍କ ଅଧୀନରେ ଥିବା YVVJ ରାଜାଶେଖରଙ୍କ ବିରୋଧରେ ଏଫ୍ଆଇଆର୍ ପଞ୍ଜିକୃତ ହୋଇଛି। ପ୍ରମାଣ ନଷ୍ଟ ଅଭିଯୋଗରେ ଏହି ମାମଲା ରୁଜୁ ହୋଇଥିବା ଜଣାପଡିଛି।

ସୂଚନା ଅନୁସାରେ, ମାର୍ଚ୍ଚ ୨ରେ ଘରୋଇ ସଂଗଠନ ପ୍ଲିଜାଣ୍ଟ ଭ୍ୟାଲି ଫାଉଣ୍ଡେସନର ଅଭିଯୋଗ କ୍ରମେ ଏହି ଦୁଇ ଅଧିକାରୀଙ୍କ ବିରୋଧରେ ମାମଲା ରୁଜୁ କରାଯାଇଥିଲା। ଏଥିସହ ରାଜ୍ୟ ପୋଲିସକୁ ସେମାନଙ୍କ ବିରୋଧରେ ମାମଲା ରୁଜୁ କରିବା ସହ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ କୋର୍ଟ।

ପ୍ଲିଜାଣ୍ଟ ଭ୍ୟାଲି ଫାଉଣ୍ଡେସନ ଅଭିଯୋଗ ଅନୁଯାୟୀ, ଫେବୃଆରୀ ୧୪ରେ ଦାଦାକଡା ଗାଁରେ ଏନଜିଓ ଦ୍ୱାରା ପରିଚାଳିତ ସ୍କୁଲକୁ ହଠାତ ୪ଜଣ ଦୁର୍ବୃତ୍ତ ପଶିଆସିଥିଲେ।ସେମାନେ ଏନଜିଓର ସଂଯୁକ୍ତ ସଚିବଙ୍କ କାର୍ଯ୍ୟାଳୟ ଗୃହରେ ଭଙ୍ଗାରୁଜା କରିବା ସହ ପ୍ରମାଣ ଥିବା ଫାଇଲ୍, ରେକର୍ଡ, ଦସ୍ତାବିଜ ଓ ପେନଡ୍ରାଇଭ୍ ନେଇଯାଇଥିବା ଅଭିଯୋଗ ହୋଇଛି।

ଅଧିକ ପଢ଼ନ୍ତୁ: ‘ସୁପର-ମାଆର ସୁପର-ବୟ’, ଅଫିସ୍‌ରେ ପୁଅ ଖେଳାଇ ଚର୍ଚ୍ଚାରେ IAS ମାଆ

ଏଥିସହ ଯଦି ସ୍କୁଲ କର୍ତ୍ତୃପକ୍ଷ ଭିଜିଲାନ୍ସ ବିଭାଗ ଏବଂ ଅନ୍ୟାନ୍ୟ ଫୋରମରେ ସେମାନଙ୍କ ବିରୋଧରେ ଦାଖଲ ହୋଇଥିବା ଦୁର୍ନୀତି ଅଭିଯୋଗ ତୁରନ୍ତ ପ୍ରତ୍ୟାହାର ନକରନ୍ତି ତେବେ ସେମାନେ ଏନଜିଓର ଅଧିକାରୀଙ୍କୁ ଫସାଇବାକୁ ଧମକ ଦେଇଥିବା ଅଭିଯୋଗ ହୋଇଛି।ଏପରିକି ସେମାନେ ଟାଇପ୍ ରାଇଟ୍ ଡକ୍ୟୁମେଣ୍ଟରେ ଦସ୍ତଖତ କରିବାକୁ ବାଧ୍ୟ କରିବାକୁ ଚେଷ୍ଟା କରିଥିଲେ ବୋଲି ଅଭିଯୋଗ ହୋଇଛି।

ଯେତେବେଳେ ସ୍କୁଲ କର୍ତ୍ତୃପକ୍ଷ ଏହାକୁ ବିରୋଧ କରିଥିଲେ, ଆକ୍ରମଣକାରୀମାନେ ଡ୍ରୟାରରେ ରଖାଯାଇଥିବା ୬୩ହଜାର ଟଙ୍କା ମଧ୍ୟ ନେଇଯାଇଥିବା ବୋଲି ଅଭିଯୋଗ ହୋଇଛି।ଅଧିକାରୀଙ୍କ ବିରୋଧରେ ଏହି ମାମଲା ଗୋମୋଦପୁରର ରାଜସ୍ୱ ପୋଲିସ ସବ୍-ଇନ୍ସପେକ୍ଟରଙ୍କ ଦ୍ୱାରା ଆଲମୋରା ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ନିର୍ଦ୍ଦେଶରେ ପଞ୍ଜିକୃତ ହୋଇଥିଲା ବୋଲି ଆଲମୋରା ଜିଲ୍ଲା ମାଜିଷ୍ଟ୍ରେଟ ବିନିତ ତୋମାର କହିଛନ୍ତି।

ଅଭିଯୁକ୍ତଙ୍କ ବିରୋଧରେ ଆଇପିସିର ଧାରା ୩୯୨ (ଡକାୟତି), ୪୪୭ (ଅପରାଧିକ ଅପରାଧ), ୧୨୦ ବି (ଅପରାଧିକ ଷଡଯନ୍ତ୍ର), ୫୦୪ (ଶାନ୍ତି ଉଲ୍ଲଂଘନ ଉଦ୍ଦେଶ୍ୟରେ ଉଦ୍ଦେଶ୍ୟମୂଳକ ଅପମାନ) ଏବଂ ୫୦୬ ଅପରାଧିକ ଭୟଭୀତତା ଓ ଏସସି / ଏସଟି ଆକ୍ଟ ଅନୁଯାୟୀ ଏଫ୍ଆଇଆର୍ ପଞ୍ଜିକୃତ ହୋଇଛି।