IIT Kharagpur: ହଷ୍ଟେଲରେ ମିଳିଲା ଛାତ୍ରଙ୍କ ଝୁଲନ୍ତା ମୃତଦେହ, ପରିବାର ଲୋକଙ୍କ ସାଂଘାତିକ ଅଭିଯୋଗ

ଭାରତୀୟ ପ୍ରଯୁକ୍ତିବିଦ୍ୟା ସଂସ୍ଥା (ଆଇଆଇଟି), ଖଡ଼ଗପୁରରେ ବି.ଟେକ୍ ଚତୁର୍ଥ ବର୍ଷର ଜଣେ ଛାତ୍ର ଆତ୍ମହତ୍ୟା କରିବା ଘଟଣା ସାମନାକୁ ଆସିଛି। ଗତ ତିନି ବର୍ଷ ମଧ୍ୟରେ ଆଇଆଇଟି ଖଡ଼ଗପୁରରେ ରିପୋର୍ଟ ହୋଇଥିବା ସପ୍ତମ ଆତ୍ମହତ୍ୟା ମାମଲା।

ସୂଚନା ମୁତାବକ, ବିଟେକ ଛାତ୍ର ରିତମ ମଣ୍ଡଳ (୨୧) ତାଙ୍କ ହଷ୍ଟେଲ ରୁମରେ ଝୁଲନ୍ତା ଅବସ୍ଥାରେ ମିଳିଥିଲେ। ରିତମ ମଣ୍ଡଳ କୋଲକାତାରୁ ଆସିଥିବା ଜଣେ ମେକାନିକାଲ ଇଞ୍ଜିନିୟରିଂ ଛାତ୍ର ଥିଲେ ଏବଂ ସେ ରାଜେନ୍ଦ୍ର ପ୍ରସାଦ ହଲ ହଷ୍ଟେଲରେ ରହୁଥିଲେ। ପୁଲିସ ଏବଂ ଶିକ୍ଷାନୁଷ୍ଠାନ ଅଧିକାରୀଙ୍କ କହିବା ଅନୁସାରେ, ଗୁରୁବାର ରାତିରେ ରାତ୍ରିଭୋଜନ ପରେ ରିତମ ତାଙ୍କ ରୁମକୁ ଫେରିଥିଲେ ଏବଂ ତାଙ୍କ ବ୍ୟବହାରରେ କୌଣସି ଅସ୍ୱାଭାବିକତା ଦେଖାଯାଇ ନଥିଲା।

ଶୁକ୍ରବାର ସକାଳେ ତାଙ୍କ ରୁମର କବାଟ ବାରମ୍ବାର ବାଡେଇବା ସତ୍ତ୍ୱେ ସେ କବାଟ ଖୋଲି ନଥିଲେ। କୌଣସି ପ୍ରତିକ୍ରିୟା ନ ମିଳିବାରୁ, କ୍ୟାମ୍ପସରେ ଥିବା ପୁଲିସ ଆଉଟପୋଷ୍ଟ ଏବଂ ସଂସ୍ଥାର ସିକ୍ୟୁରିଟିଗାର୍ଡମାନେ କବାଟ ଭାଙ୍ଗି ରୁମ ଭିତରେ ପ୍ରବେଶ କରିଥିଲେ। ସେଠାରେ ରିତମଙ୍କୁ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା। ଏହା ପରେ କ୍ୟାମ୍ପସ ପରିସରରେ ଥିବା ହସ୍ପିଟାଲକୁ ତାଙ୍କୁ ନିଆ ଯାଇଥିଲେ ମଧ୍ୟ ମୃତ ଅବସ୍ଥାରେ ତାଙ୍କୁ ନିଆ ଯାଇଥିବା ଡାକ୍ତର କହିଥିଲେ।

ରିତମଙ୍କ ପରିବାରକୁ ଏ ବିଷୟରେ ସୂଚନା ଦିଆଯାଇଛି ଏବଂ ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି। ପ୍ରାଥମିକ ତଦନ୍ତରୁ ଏହା ଆତ୍ମହତ୍ୟା ମାମଲା ବୋଲି ଅନୁମାନ କରାଯାଉଛି, କିନ୍ତୁ ପରିବାର ଏହାକୁ ରାଗିଂ ସହ ଜଡ଼ିତ ବୋଲି ଅଭିଯୋଗ କରିଛନ୍ତି। ଆଇଆଇଟି ଖଡ଼ଗପୁରରେ ଏହା ପୂର୍ବରୁ ମଧ୍ୟ ଅନେକ ଅସ୍ୱାଭାବିକ ମୃତ୍ୟୁ ଘଟଣା ଘଟିଛି। ୨୦୨୨ରୁ ଏଯାଏଁ ଆଇଆଇଟି ଖଡ଼ଗପୁରରେ ୭ ଜଣ ଆତ୍ମହତ୍ୟା କରିଥିବା ବେଳେ କେବଳ ଚଳିତ ବର୍ଷ ଏହିଭଳି ୪ଟି ମାମଲା ସାମନାକୁ ଆସିଛି।

ଅଧିକ ପଢନ୍ତୁ: ପତ୍ନୀକୁ ହତ୍ୟା କରିବା ପରେ ଜଙ୍ଗଲରେ ଝୁଲି ପଡ଼ିଲେ