LIVE TV
ଅରୁଣାଚଳ ପ୍ରଦେଶରେ ବିଜେପି ସରକାର । ଚଳିତ ବିଧାନସଭା ନିର୍ବାଚନରେ ଅରୁଣାଚଳ ପ୍ରଦେଶରେ ବିଜେପି ବାଜି ମାରିଛି । ୬୦ ବିଧାନସଭା ଆସନରୁ ୪୬ଟିରେ ବିଜୟଲାଭ କରିଛି ଭାରତୀୟ ଜନତା ପାର୍ଟି । ଅରୁଣାଚଳ ପ୍ରଦେଶରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ହେଉଛି ୩୧ । ତେବେ ବିଜେପି ଚଳିତ ବିଧାନସଭା ନିର୍ବାଚନରେ ଏକାକୀ ୪୬ ଆସନ କବଜା କରିବା ସହ ସରକାର ଗଠନ ପାଇଁ ବହୁମତ ହାସଲ କରିସାରିଛି ।
Also Read
ବିଜେପି ବ୍ୟତୀତ ଅରୁଣାଚଳ ପ୍ରଦେଶରେ NPEP ୫ଟି ସିଟ୍, NCP ୩ଟି ସିଟ୍, PPA ୨ଟି ସିଟ୍, କଂଗ୍ରେସ ଗୋଟିଏ ଏବଂ ୩ଟି ଆସନରେ ସ୍ୱାଧିନ ବିଧାୟକ ବାଜି ମାତ କରିଛନ୍ତି । ତେବେ ଅରୁଣାଚଳ ପ୍ରଦେଶରେ ବିଜେପି ବାଜିମାତ୍ କରିବା ସହ ପେମା ଖାଣ୍ଡୁଙ୍କ ଦଳ ପୁଣି ସରକାର ଗଢିବାକୁ ଯାଉଛି। ଯାହାକୁ ନେଇ ରାଜ୍ୟର ବିଜେପି ଶିବିର ଉତ୍ସବ ମୁଖର ହୋଇ ଉଠିଛି। ଘୋଷଣା ପୂର୍ବରୁ ବିଜେପି କର୍ମୀ ଓ ନେତାମାନେ ବାଜା ବଜାଇ ବାଣ ଫୁଟାଇ ସେଲିବ୍ରେଶନ କରିଛନ୍ତି।
୨୦୧୬ ମସିହାରୁ ଅରୁଣାଚଳ ପ୍ରଦେଶର ମୁଖ୍ୟମନ୍ତ୍ରୀ ଅଛନ୍ତି ପେମା ଖାଣ୍ଡୁ । ୨୦୧୬ରେ ସେ ପ୍ରଥମ କରି ଅରୁଣାଚଳ ପ୍ରଦେଶର ମୁଖ୍ୟମନ୍ତ୍ରୀ ହେଇଥିଲେ । ଏହାପରେ ୨୦୧୯ରେ ପେମା ଖାଣ୍ଡୁଙ୍କ ନେତୃତ୍ୱରେ ବିଜେପି ଜବରଦସ୍ତ ବିଜୟ ହାସଲ କରିଥିଲା । ତାଙ୍କ ନେତୃତ୍ୱରେ ବିଜେପି ୨୦୧୯ରେ ୪୧ ଆସନ ହାସଲ କରିଥିଲା ଏବଂ ଦ୍ୱିତୀୟ ଥର ପାଇଁ ସେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଆଉ ଚଳିତ ନିର୍ବାଚନରେ ବିଜେପିର ବଡ଼ ବିଜୟ ପରେ ସେ ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେବେ ।
ସେପଟେ ସିକିମ୍ ବିଧାନସଭା ନିର୍ବାଚନ ଫଳାଫଳ ମଧ୍ୟ ଆଜି ପ୍ରକାଶ ପାଇଛି । ସିକିମ୍ ବାଜି ଜିତିଛି ସିକିମ୍ କ୍ରାନ୍ତିକାରୀ ମୋର୍ଚ୍ଚା । ମୋଟ୍ ୩୨ ଆସନରୁ ଏକାକୀ ୩୧ଟି ଜିତିଛି ସିକିମ୍ କ୍ରାନ୍ତିକାରୀ ମୋର୍ଚ୍ଚା । ସିକିମ୍ ଡେମୋକ୍ରାଟିକ୍ ଫ୍ରଣ୍ଟ ଗୋଟିଏ ସିଟରେ ବିଜୟୀ ହୋଇଛି।
ଅନ୍ୟପକ୍ଷରେ ଗତକାଲି ଶେଷ ହୋଇଛି ସାଧାରଣ ନିର୍ବାଚନ । ମୋଟ୍ ୭ ପର୍ଯ୍ୟାୟରେ ଏହି ନିର୍ବାଚନ ଅନୁଷ୍ଠିତ ହୋଇଥିଲା । ତେବେ ୫୪୩ ସାଂସଦ ଆସନ ସହ ଆନ୍ଧ୍ରପ୍ରଦେଶ ଓ ଓଡ଼ିଶା ବିଧାନସଭା ନିର୍ବାଚନ ଫଳାଫଳ ଆସନ୍ତା ଜୁନ୍ ୪ରେ ପ୍ରକାଶ ପାଇବ । ତେବେ ରେଜଲ୍ଟ ବାହାରିବା ପୂର୍ବରୁ ଗତକାଲି ପ୍ରକାଶ ପାଇଛି ଏକଜିଟ୍ ପୋଲ୍ । ବିଭିନ୍ନ ଗଣମାଧ୍ୟମ ପକ୍ଷରୁ ହୋଇଥିବା ଏହି ଏକଜିଟ୍ ପୋଲରେ ଭାରତୀୟ ଜନତା ପାର୍ଟିକୁ ବହୁମତ ମିଳିଥିବା ଦେଖିବାକୁ ମିଳିଛି ।
