Auto Driver Attacked:ଏଠି ବି ଉଠିଲାଣି ଅସ୍ମିତା ପ୍ରସଙ୍ଗ, ମାଡ଼ ଖାଇ କ୍ଷମା ମାଗିଲେ ଅଟୋ ଡ୍ରାଇଭର୍

ଖୋଜି ଖୋଜି ଜଣେ ଅଟୋ ଡ୍ରାଇଭରଙ୍କୁ ମାଡ଼ ମାରିଲେ ଶିବସେନା ( ଉଦ୍ଧବ ଠାକରେ) କର୍ମୀ । ଭୁଲ୍ ମଗାଇଲେ । ଏହି ଡ୍ରାଇଭର ଜଣକ କହିଥିଲେ, ମୁଁ ହିନ୍ଦୀ କହୁଛି ମରାଠୀ ନୁହେଁ । ଏହାକୁ ନେଇ ଉତକ୍ଷିପ୍ତ ହୋଇଥିଲେ ଶିବସେନା କର୍ମୀ ।

ମହାରାଷ୍ଟ୍ରର ପାଲଘର ଜିଲ୍ଲାର ବିରାର ଅଞ୍ଚଳରେ ଭାଷା ବିବାଦକୁ ନେଇ ଏକ ଚାଞ୍ଚଲ୍ୟକର ଘଟଣା ଘଟିଛି । ଯେଉଁଥିରେ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (UBT) ଜଣେ ଅଟୋ ଡ୍ରାଇଭରଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ଏହି ଘଟଣା ଗତ ୧୨ ତାରିଖରେ ବିରାର ରେଳ ଷ୍ଟେସନ ନିକଟରେ ଘଟିଛି ଏବଂ ଏହାର ଏକ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି । ଯାହା ରାଜ୍ୟରେ ଭାଷା ବିବାଦକୁ ଆହୁରି ତୀବ୍ର କରିଛି।

ବିରାର ଅଞ୍ଚଳରେ ରହୁଥିବା ବାହାର ରାଜ୍ୟର ଜଣେ ଅଟୋ ଡ୍ରାଇଭରଙ୍କୁ ମରାଠୀ ଭାଷାରେ କଥା ହେବାକୁ କୁହାଯିବା ପରେ ସେ ମନା କରିଥିଲେ। ସେ କହିଥିଲେ, “ମୁଁ ହିନ୍ଦୀ କହୁଛି, ଭୋଜପୁରୀ କହୁଛି, ମରାଠୀ ନୁହେଁ।” ଏହି ବୟାନର ଏକ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ଶିବସେନା (UBT) କର୍ମୀମାନେ ତାଙ୍କୁ ଖୋଜି ଖୋଜି ବାହାର କରି ଶନିବାର ଦିନ ବିରାର ରେଳ ଷ୍ଟେସନ ନିକଟରେ ଜନଗହଳିପୂର୍ଣ୍ଣ ରାସ୍ତାରେ ପାଇ ଆକ୍ରମଣ କରିଥିଲେ।

ଭାଇରାଲ ଭିଡିଓରେ ଦେଖାଯାଉଛି ଯେ ଶିବସେନା (UBT) କର୍ମୀମାନେ, ଯେଉଁମାନଙ୍କ ମଧ୍ୟରେ ମହିଳା ମଧ୍ୟ ଥିଲେ, ଅଟୋ ଡ୍ରାଇଭରଙ୍କୁ ମାଡ଼ ମାରୁଛନ୍ତି ଏବଂ ତାଙ୍କୁ ମରାଠୀ ଭାଷା ଓ ମହାରାଷ୍ଟ୍ର ଲୋକଙ୍କୁ କ୍ଷମା ମାଗିବାକୁ ବାଧ୍ୟ କରୁଛନ୍ତି। ଏହି କର୍ମୀମାନଙ୍କ ମଧ୍ୟରେ ମହିଳା କର୍ମୀ ମଧ୍ୟ ଅଛନ୍ତି । ଡ୍ରାଇଭର ଜଣଙ୍କ ହାତ ଯୋଡ଼ି କ୍ଷମା ମାଗୁଥିବା ଦୃଶ୍ୟ ମଧ୍ୟ ଭିଡିଓରେ ଦେଖାଯାଉଛି । ସେ କହୁଛନ୍ତି, “ମୁଁ ମରାଠୀ ଲୋକଙ୍କୁ ଏବଂ ମହାରାଷ୍ଟ୍ରକୁ କ୍ଷମା ମାଗୁଛି।”

ଶିବସେନା (UBT)ର ବିରାର ସହର ମୁଖ୍ୟ ଉଦୟ ଯାଦବ ଏହି ମାଡ଼ ବେଳେ ଘଟଣାସ୍ଥଳରେ ଉପସ୍ଥିତ ଥିଲେ । ସେ ଏହି ଆକ୍ରମଣକୁ ସମର୍ଥନ କରିଛନ୍ତି। ସେ କହିଛନ୍ତି, “ଯଦି କେହି ମରାଠୀ ଭାଷା, ମହାରାଷ୍ଟ୍ର କିମ୍ବା ମରାଠୀ ମାନଙ୍କୁ ଅପମାନ କରନ୍ତି, ତାଙ୍କୁ ଶିବସେନା ଶୈଳୀରେ ଜବାବ ଦିଆଯିବ।” ଏହି ବୟାନ ସାମାଜିକ ଗଣମାଧ୍ୟମରେ ଏବଂ ରାଜନୈତିକ ମହଲରେ ବିବାଦ ସୃଷ୍ଟି କରିଛି । କେହି କେହି ଏହାକୁ ସମର୍ଥନ କରୁଥିବା ବେଳେ ଅନେକ ଏହାକୁ ଖୋଲାଖୋଲି ଗୁଣ୍ଡାଗିରି ବୋଲି କହି ସମାଲୋଚନା କରୁଛନ୍ତି।

ଏହି ଘଟଣା ମହାରାଷ୍ଟ୍ରରେ ଭାଷାଗତ ବିବାଦର ଏକ ଅଂଶ ଭାବେ ଦେଖାଯାଉଛି। ଏହା ପୂର୍ବରୁ ଜୁଲାଇ ୧ ତାରିଖରେ ଥାନେ ଜିଲ୍ଲାର ଭାୟାଣ୍ଡରରେ MNS କର୍ମୀମାନେ ଜଣେ ଖାଦ୍ୟ ଷ୍ଟଲ ମାଲିକଙ୍କୁ ମରାଠୀରେ କଥା ନ ହେବା କାରଣରୁ ମାଡ଼ ମାରିଥିଲେ। ଏହା ବିରୁଦ୍ଧରେ ସ୍ଥାନୀୟ ବ୍ୟବସାୟୀମାନେ ବିକ୍ଷୋଭ ପ୍ରଦର୍ଶନ କରିଥିଲେ। ଏହାର ଜବାବରେ ଜୁଲାଇ ୮ ତାରିଖରେ MNS ଏବଂ ଅନ୍ୟ ଦଳ ମରାଠୀ ‘ଅସ୍ମିତା’ ରକ୍ଷା କରିବା ପାଇଁ ମୀରା-ଭାୟାଣ୍ଡରରେ ଏକ ରାଲି କରିଥିଲେ । ସେଥିରେ ଶିବସେନା (UBT) ଏବଂ ଶରଦ ପାୱାରଙ୍କ ନେତୃତ୍ୱାଧୀନ NCP (SP) କର୍ମୀମାନେ ଯୋଗ ଦେଇଥିଲେ। ଏହି ପଦଯାତ୍ରାରେ ପୋଲିସ କିଛି କର୍ମୀଙ୍କୁ ଅଟକ ରଖିଥିଲା।

ପାଲଘରରେ ଅଟୋ ଡ୍ରାଇଭରଙ୍କୁ ଆକ୍ରମଣ ଘଟଣାରେ ପୋଲିସ ଏପର୍ଯ୍ୟନ୍ତ ବିଧିବଦ୍ଧଭାବେ କୌଣସି ଅଭିଯୋଗ ପାଇନାହିଁ । ତେବେ ସାମାଜିକ ଗଣମାଧ୍ୟମରେ ଘୂରି ବୁଲୁଥିବା ଜାଣିଛି ।

ରାଜ୍ୟ ସରକାରଙ୍କ ପ୍ରାଥମିକ ସ୍କୁଲଗୁଡ଼ିକରେ ହିନ୍ଦୀ ଶିକ୍ଷାକୁ ଅନ୍ତର୍ଭୁକ୍ତ କରିବା ପାଇଁ ପୂର୍ବରୁ ନିଷ୍ପତ୍ତି ନିଆଯାଇଥିଲା । ପରେ ଏହାକୁ ପ୍ରତ୍ୟାହାର କରାଯାଇଛି ।ଏହି ହିନ୍ଦୀ ଶିକ୍ଷା ନିଷ୍ପତ୍ତି ମରାଠୀ ସମର୍ଥକ ଗୋଷ୍ଠୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଥିଲା। ସେମାନେ ଏହାକୁ ଆଞ୍ଚଳିକ ପରିଚୟର ଅବମାନନା ବୋଲି ଅଭିଯୋଗ କରିଥିଲେ।

ଏହା ପରଠୁ ଶିବସେନା (UBT) ଓ MNS ମରାଠୀ ଭାଷା ଓ ସଂସ୍କୃତିର ଗୌରବ ରକ୍ଷା କରିବା ନାମରେ ଏପରି କାର୍ଯ୍ୟ କରୁଥିବା ଦେଖିବାକୁ ମିଳୁଛି ।

ଅଧିକ ପଢ଼ନ୍ତୁ: ନଦୀକୁ ଠେଲିଦେଲା ପତ୍ନୀ, ମରୁ ମରୁ ବଞ୍ଚିଗଲେ ସ୍ୱାମୀ