ମଣ୍ଡପ ଉପରେ ଶୋଇଲା ମଦୁଆ ବର : ବାହାଘର ଭାଙ୍ଗିଦେଲେ କନ୍ୟା

ଭଳିକି ଭଳି ଫୁଲ ଓ ରଙ୍ଗୀନ ଆଲୋକରେ ଝଲସୁଥିଲା ବାହା ମଣ୍ଡପ । କନ୍ୟା ପକ୍ଷ ଲୋକ ଭୋଜି ଆୟୋଜନରେ ମସଗୁଲ ଥିଲେ । ଆଉ ସଜବାଜ ହୋଇ ମନର ମଣିଷକୁ ଅପେକ୍ଷା କରିଥିଲା କନ୍ୟା । ଏହି ସମୟରେ ଡିଜେର ତାଳେ ତାଳେ ପ୍ରସେସନ୍‌ କରି କରି କନ୍ୟା ଘରେ ପହଞ୍ଚିଲେ ବରପକ୍ଷ । ହେଲେ ବରର ଅବସ୍ଥା ଦେଖି କନ୍ୟା ଓ କନ୍ୟା ପକ୍ଷ ଲୋକଙ୍କ ମୁଣ୍ଡ କାମ କଲାନି । ବରର ଆଦୌ ହୋସ୍‌ ନଥିଲା, ନା ସେ ଚାଲି ପାରୁଥିଲା , ନା ରୀତିନୀତି କରିବା ପାଇଁ ପ୍ରସ୍ତୁତ ଥିଲା । ଏହା ଦେଖି ମଦୁଆ ବରକୁ ବିବାହ କରିବା ପାଇଁ ରୋକ୍‌ଠୋକ୍‌ ମନା କରିଦେଲା କନ୍ୟା । ଆସାମର ନଲବାରୀ ଜିଲ୍ଲାରେ ଏପରି ଘଟଣା ଘଟିଛି ।

ନିଶାଗ୍ରସ୍ତ ବରଙ୍କ ନାମ ହେଲା ପ୍ରସେନଜିତ ହାଲୋଇ । ସେ ନଳବାରୀ ସହରର ବାସିନ୍ଦା । ବିବାହ ଦିନ ଅତ୍ୟଧିକ ମଦ୍ୟପାନ କରି ବିବାହ ପାଇଁ ଆସି ପହଞ୍ଚିବା ପରେ କନ୍ୟା ଜଣକ ତାଙ୍କ ବିବାହକୁ ଭାଙ୍ଗି ଦେଇଛନ୍ତି । ପ୍ରସେନଜିତ୍‌ ଏତେ ମଦ ପିଇଥିଲେ ଯେ ତାଙ୍କର ଆଦୌ ହୋସ୍‌ ନଥିଲା । ଝୁଲି ଝୁଲି ମଣ୍ଡପ ଉପରକୁ ଆସିବା ପରେ ସେଠାରେ ହିଁ ଶୋଇ ପଡ଼ିଥିଲେ । ଏପରିକି ବରପିତା ବି ମଦ ନିଶାରେ ମାତାଲ୍‌ ଥିଲେ । ବରର ଏପରି କାଣ୍ଡ କାରଖାନା ଦେଖିବା ପରେ ପରିସ୍ଥିତି ଗମ୍ଭୀର ହୋଇ ପଡ଼ିଥିଲା ।

ଅନ୍ୟପଟେ ବରପକ୍ଷ ପରିବାରର ପ୍ରାୟ ୯୫ ପ୍ରତିଶତ ବରଯାତ୍ରୀ ମଦ ନିଶାରେ ଥିଲେ । ଏପରି ଅବସ୍ଥା ଦେଖି ପୋଲିସକୁ ଘଟଣା ସଂପର୍କରେ ଖବର ଦେଇଥିଲେ କନ୍ୟା ପକ୍ଷ । ଏବେ କନ୍ୟାଙ୍କ ପରିବାର ଲୋକେ ବିବାହ ପ୍ରସ୍ତୁତି ପାଇଁ ହୋଇଥିବା ଖର୍ଚ୍ଚର କ୍ଷତିପୂରଣ ଦାବି କରିଛନ୍ତି ।