LIVE TV
ଚଣ୍ଡୀଗଡ଼ : ପଞ୍ଜାବରେ ନିର୍ବାଚନ ଲଢିବ ଚାଷୀ ସଂଗଠନ । ସଂଯୁକ୍ତ କିଷାନ୍ ମୋର୍ଚ୍ଚାର ଅଂଶବିଶେଷ ଥିବା ତଥା ତିନିଟି ବିବାଦୀୟ କୃଷି ବିଲ୍ ବିରୋଧରେ ବର୍ଷସାରା ବିକ୍ଷୋଭ ପ୍ରଦର୍ଶନ କରୁଥିବା ପ୍ରାୟ ୨୨ଟି କୃଷକ ସଂଗଠନ ବର୍ତ୍ତମାନ ପଞ୍ଜାବ ବିଧାନସଭା ନିର୍ବାଚନ ଲଢ଼ିବାକୁ ଏକ ରାଜନୈତିକ ୟୁନିଟ୍ ଗଠନ କରିଛନ୍ତି । ଚାଷୀ ନେତା ବଲବୀର ସିଂ ରାଜେଓ୍ୱାଲ କୃଷକଙ୍କ ରାଜନ ନୈତିକ ସାମ୍ମୁଖ୍ୟର ନେତୃତ୍ୱ ନେବେ । ବ୍ୟବସ୍ଥାରେ ପରିବର୍ତ୍ତନ ଆଣିବା ପାଇଁ ସେ ଜନସମର୍ଥନ ଆହ୍ୱାନ କରିଛନ୍ତି । ଶନିବାର ଦିନ କୃଷକ ନେତାମାନେ ନିର୍ବାଚନ ଲଢ଼ିବା ନେଇ ସ୍ପଷ୍ଟ କରିଛନ୍ତି ।
କୃଷି ଆଇନ ବିରୋଧରେ ବର୍ଷସାରା ବିରୋଧ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହି ଆଇନ ପ୍ରତ୍ୟାହାର ବିଧାନସଭା ନିର୍ବାଚନ ପୂର୍ବରୁ ପଞ୍ଜାବର ଚାଷୀଙ୍କ ପାଇଁ ମଞ୍ଚ ସ୍ଥିର କରିଛି । ସବୁ ୧୧୭ ଆସନରେ ନିର୍ବାଚନ ଲଢ଼ିବାକୁ ୨୨ଟି ଚାଷୀ ସଂଗଠନର ନିଷ୍ପତ୍ତି ନେଇଛି । ଏନେଇ ସଂଯୁକ୍ତ ସମାଜ ମୋର୍ଚ୍ଚା ନାଁରେ ଦଳ ଗଠନ କରାଯାଇଛି । ଘୋଷଣା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ କୃଷକ ସଂଗଠନ ଆମ୍ ଆଦମୀ ପାର୍ଟି ସହ ଏକ ମେଣ୍ଟ କରିପାରେ ବୋଲି ଅନୁମାନ କରାଯାଉଛି । ମେଣ୍ଟ ସମ୍ପର୍କରେ ପରେ ଘୋଷଣା କରାଯିବ ବୋଲି କୃଷକ ନେତାମାନେ କହିଛନ୍ତି ।
୩୨ଟି କୃଷକ ସଂଗଠନ ମଧ୍ୟରୁ ୨୨ଟି ଦଳ ନିର୍ବାଚନ ବୈତରଣୀରେ ଓହ୍ଲାଇବାକୁ ନିଷ୍ପତ୍ତି
ନିର୍ବାଚନ ଲଢ଼ିବା ପାଇଁ ଘୋଷଣା କରିଥିବା ୨୨ଟି କୃଷକ ସଂଗଠନ ପଞ୍ଜାବର ୩୨ ଟି କୃଷକ ସଂଗଠନ ମଧ୍ୟରେ ସାମିଲ ଅଛନ୍ତି । ତିନିଟି କେନ୍ଦ୍ରୀୟ କୃଷି ଆଇନ ବିରୋଧରେ ଏକ ବର୍ଷରୁ ଅଧିକ ସମୟ ବିରୋଧ ପ୍ରଦର୍ଶନ କରିଥିଲା । ଆସନ୍ତା ବର୍ଷ ପ୍ରାରମ୍ଭରେ ପଞ୍ଜାବରେ ହେବାକୁ ଥିବା ବିଧାନସଭା ନିର୍ବାଚନରେ ଲଢ଼େଇ କରିବା ପାଇଁ ଏକ ସଂଯୁକ୍ତ ସମାଜ ମୋର୍ଚ୍ଚାର ଗଠନ କରାଯାଇଥିବା କହିଛନ୍ତି କୃଷକ ନେତା ହରମିତ ସିଂ କାଦିଆନ ।
