ବିଷାକ୍ତ ମଦ ପିଇ ୧୩ ମୃତ ! ବନ୍ଧାହେଲେ ୯ ଜଣ, ୪ ପୋଲିସ୍‌ ନିଲମ୍ବିତ

ବିଷାକ୍ତ ମଦ ପିଇ ୧୩ ଜଣଙ୍କର ମୃତ୍ୟୁ । ତାମିଲନାଡ଼ୁର ଦୁଇଟି ଭିନ୍ନ ଭିନ୍ନ ସ୍ଥାନରେ ବିଷାକ୍ତ ମଦ ପାଇଁ ୩ଜଣ ମହିଳାଙ୍କ ସମେତ ୧୩ ଜଣଙ୍କର ମୃତ୍ୟୁ ଘଟିଛି । ଏପରି ଅଭାବନୀୟ ଘଟଣା ବିଲ୍ଲୁପୁରମ ଓ ଚେଗଲପଟୁ ଜିଲ୍ଲାରେ ଘଟିଛି । ବିଷାକ୍ତ ମଦ ପିଇ ବିଲ୍ଲୁପୁରମ ଜିଲ୍ଲାରେ ୯ ଓ ଚେଗଲପାଟୁରେ ୪ ଜଣଙ୍କ ମୃତ୍ୟୁ ହୋଇଛି । ସେହିଭଳି ୩୦ ଜଣଙ୍କ ଅବସ୍ଥା ଗୁରୁତର ରହିଛି ।

ବିଷାକ୍ତ ମଦ ମୃତ୍ୟୁ ଘଟଣା ସମଗ୍ର ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିବା ବେଳେ କାର୍ଯ୍ୟରେ ଅବହେଳା ପାଇଁ ୪ ଜଣ ପୋଲିସ ଅଧିକାରୀଙ୍କୁ ନିଲମ୍ବିତ କରାଯାଇଛି । ପୋଲିସ ୫୭ ଟି ମାମଲା ରୁଜୁ କରି ନଅ ଜଣଙ୍କୁ ଗିରଫ କରିଛି, ଯେଉଁମାନେ ବିଷାକ୍ତ ମଦ ତିଆରି କରି ଯୋଗାଣ କରିଥିଲେ ।

ଗତ ଶନିବାର ବିଲ୍ଲୁପୁରମ ଜିଲ୍ଲାରେ ମଦ ପିଇବା ପରେ କିଛି ଲୋକ ଅସୁସ୍ଥ ଅନୁଭବ କରିଥିଲେ । ସେମାନଙ୍କ ଅବସ୍ଥା ବିଗିଡ଼ିବା ପରେ ତୁରନ୍ତ ସମସ୍ତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଜଣକ ପରେ ଜଣେ କରି ୯ ଜଣଙ୍କ ମୃତ୍ୟୁ ଘଟିଛି । ସେହିପରି ଚେଗଲପଟୁ ଜିଲ୍ଲାରେ ବିଷାକ୍ତ ମଦ ପିଇ ୪ ଜଣ ଆଖି ବୁଜିଛନ୍ତି । ୩୦ ଜଣ ଏବେ ବି ଚିକିତ୍ସାଧୀନ ଅଛନ୍ତି ।

ମଦ ମୃତ୍ୟୁ ଘଟଣାର ତଦନ୍ତ ପାଇଁ ସ୍ପେଶାଲ ଟିମ୍‌ ଗଠିତ ହୋଇଛି । ଏହି ଟିମ୍‌ ଘଟଣାର ତଦନ୍ତ କରିବା ସହ ଏଥିରେ ଆଉ କିଏ ସମ୍ପୃକ୍ତ ଅଛି, ତାହା ବାହାର କରିବ ବୋଲି ଜଣାପଡ଼ିଛି ।

ବିଲ୍ଲୁପୁରମ ଓ ଚେଗଲପଟୁ ଉଭୟ ସ୍ଥାନରୁ ପୋଲିସ୍‌ ମଦର ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଇଛି । ଉଭୟ ଜିଲ୍ଲାରେ ବ୍ୟବହାର ହୋଇଥିବା ମଦର ନମୁନା ସମାନ ନା ଭିନ୍ନ ତାହା ତଦନ୍ତ ପରେ ଜଣାପଡ଼ିବ ବୋଲି ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।