LIVE TV
ଗୋଟିଏ ଆଙ୍ଗୁଠିରେ ଛତାକୁ ୬ ଘଣ୍ଟା ଧରି ବାଲାନ୍ସ କରି ରେକର୍ଡ କରିଛନ୍ତି ଟିଟିଲାଗଡ ଅଞ୍ଚଳର ଜଣେ ଯୁବକ । ପିଲା ଦିନରୁ ପ୍ରତିଷ୍ଠିତ ଗିନିଜ୍ ୱାର୍ଲ୍ଡ ରେକର୍ଡରେ ନିଜ ନାଁକୁ ତାଲିକାଭୁକ୍ତ କରିବାକୁ ନିଶା ରଖିଥିବା ଯୁବକଙ୍କ ସ୍ୱପ୍ନ ଗତକାଲି ସାକାର ହୋଇଛି । ଛତାକୁ ଆଙ୍ଗୁଠିରେ ବାଲାନ୍ସ କରି ରଖିବାର ରେକର୍ଡ ଏହା ପୂର୍ବରୁ ସ୍ପେନର କ୍ରିଷ୍ଟିଆନ ରୋବେଲଟୋ ନାମକ ଜଣେ ବ୍ୟକ୍ତିଙ୍କ ନାମରେ ଥିଲା । ଏବେ ଟିଟିଲାଗଡ ଅଞ୍ଚଳର କାହ୍ନୁ ଭୋଇଙ୍କ ତାଙ୍କର ରେକର୍ଡ ଭାଙ୍ଗି ନିଜେ ସ୍ଥାନ ପାଇଛନ୍ତି ।
ଗତକାଲି ଟିଟିଲାଗଡ ମୁନସିପାଲିଟି କଲ୍ୟାଣ ମଣ୍ଡପରେ ଅନୁଷ୍ଠିତ ହୋଇଥିଲା Guinness World Records ପାଇଁ ଏକ ପ୍ରୟାସ । ଟିଟିଲାଗଡ ମୁନସିପାଲିଟି କଲ୍ୟାଣ ମଣ୍ଡପରେ ଆୟୋଜନ ହୋଇଥିବା ଏହି କାର୍ଯକ୍ରମରେ ପ୍ରଥମେ ଛତାର ଓଜନ ଓ ପରେ ଲମ୍ବ ମପାଯାଇଥିଲା । ବିଶେଷଜ୍ଞଙ୍କ ପ୍ରତ୍ୟକ୍ଷ ତତ୍ୱାବଧାନରେ ସବୁ କିଛି କରାଯାଇଥିଲା । ଆଉ ସେମାନଙ୍କ ଉପସ୍ଥିତିରେ କାହ୍ନୁ ଭୋଇ ଛତାକୁ ନିଜ ଆଙ୍ଗୁଠିରେ ୬:୦୬:୧୫ ସେକେଣ୍ଡ ବାଲାନ୍ସ କରି ରଖିପାରିଥିଲେ ।
ଛତାକୁ ଗୋଟିଏ ଆଙ୍ଗୁଠିରେ ବାଲାନ୍ସ କରି ରଖିବାର ରେକର୍ଡ ଥିଲା ସ୍ପେନର କ୍ରିଷ୍ଟିଆନ ରୋବେଲଟୋଙ୍କ ନାଁରେ । କ୍ରିଷ୍ଟିଆନ ରୋବେଲଟୋ ଦୀର୍ଘ ୩:୩୧:୪୩ ସେକେଣ୍ଡ ଏକ ଛତାକୁ ନିଜ ଆଙ୍ଗୁଠିରେ ବାଲାନ୍ସ କରି ଏହି ରେକର୍ଡ ସୃଷ୍ଟି କରିଥିଲେ । ହେଲେ ଗତ କାଲି କାହ୍ନୁ ଭୋଇ ଦୀର୍ଘ ୬:୦୬:୧୫ ସେକେଣ୍ଡ ଛତାକୁ ନିଜ ଆଙ୍ଗୁଠିରେ ବାଲାନ୍ସ କରି ରଖିଥିଲେ । ଗତ କାଲି ଏହି କାର୍ଯକ୍ରମ ୧୨ ଟାରୁ ଆରମ୍ଭ ହୋଇ ସନ୍ଧ୍ୟା ୭ ଟା ପର୍ଯ୍ୟନ୍ତ ଚାଲିଥିଲା । ଟିଟିଲାଗଡ ଅଞ୍ଚଳର ଗ୍ରାମାଞ୍ଚଳରେ ଥିବା ଲୁକାୟିତ ପ୍ରତିଭାକୁ ଖୋଜି ବାହାର କରୁଥିବା ସଂସ୍ଥା ଗୁରୁ କୃପା ମାର୍ଶଲ ଆର୍ଟ ଏକାଡେମି ଏହି କାର୍ଯକ୍ରମର ଆୟୋଜନ କରିଥିଲା ।
ଗତ କିଛି ଦିନ ପୂର୍ବରୁ କଣ୍ଟାବାଞ୍ଜିର ଜଣେ ଯୁବକ ଏଭଳି ଭିନ୍ନ ପ୍ରତିଭା ପାଇଁ ଗିନିଜ ୱାଲ୍ଡ ରେକର୍ଡ ହାସଲ କରିଥିବା ବେଳେ ଟିଟିଲାଗଡ ଅଞ୍ଚଳର ଆଉ ଜଣେ ଯୁବକ ଏହି worldrecord ରେ ସାମିଲ ହୋଇଥିବାରୁ ଖୁସିର ଲହରୀ ଖେଳି ଯାଇଛି । ଆଗାମୀ ଦିନରେ ମଧ୍ୟ ଏହି ଅଞ୍ଚଳର ଲୁକ୍କାୟିତ ପ୍ରତିଭାଙ୍କୁ ଖୋଜି ଜାତୀୟ ଓ ଆନ୍ତର୍ଜାତିୟ ସ୍ତରର ମଞ୍ଚ ପ୍ରଦାନ କରାଯିବ ବୋଲି ଆୟୋଜକ କହିଛନ୍ତି ।
ମାନସ ମହାନ୍ତି, ଟିଟିଲାଗଡ଼
