LIVE TV
ସ୍କୁଲର କାନ୍ଥ ଫାଟି ଆଁ କରିଛି, ତ ପୁଣି କୋଉଠି ଚଟାଣରେ ବିରାଟ ବିରାଟ ଗାତ ହୋଇଛି । ଆଉ କୋଉଠି ଛାତ ଉପରୁ ଟିଣ ମଧ୍ୟ ଉଠିଗଲାଣି । ସ୍କୁଲ ଘର ଭିତରେ ଥୁଆ ହୋଇଛି ପୁଳାପୁଳା କାଠ । ଝରକାରୁ ଲୁହା କବାଟ ବି ଗଳିପଡ଼ିଲାଣି । ଆଉ ଏହାରି ଭିତରେ ଚାଲିଛି ଆମ ସର୍ବଶିକ୍ଷା ଅଭିଯାନ ।
ସ୍କୁଲର ଅବସ୍ଥା ଦେଖିଲେ କହିବେ କେମିଚି ଚାଲିଛି ପାଠ ପଢା । ଆଉ ରୋଷେଇ ଘରର ଅବସ୍ଥା କଥା ନକହିଲେ ଭଲ । ଚିତ୍ରକୋଣ୍ଡା ବ୍ଲକ ସ୍ୱାଭିମାନ ଅଂଚଳ ଧୂଳିପୁଟ ପଂଚାୟତର ଏହି ସ୍କୁଲ ଆବାସିକ ବିଦ୍ୟାଳୟର ମାନ୍ୟତା ପାଇଛି । ସ୍କୁଲରେ ହଷ୍ଟେଲ ଥିବାରୁ ଅନେକ ପିଲା ହଷ୍ଟେଲରେ ରହି ପାଠ ପଢୁଛନ୍ତି । କିନ୍ତୁ ସ୍ଥିତି ଏମିତି ହେଲାଣି ଯେ, ଆବଶ୍ୟକଠାରୁ ଅଧିକ ପିଲା ହଷ୍ଟେଲରେ ରହୁଥିବାରୁ ଯେଉଁ ଘରେ ପିଲା ରହୁଛନ୍ତି ସେଇ ଘରେ ପିଲାଙ୍କ ପାଇଁ ଆସୁଥିବା ଚାଉଳ ବି ରହୁଛି ।
Also Read
ସ୍କୁଲ ନିର୍ମାଣ ହେବା ଦିନରୁ ନାହିଁ ନାହିଁରେ ଚାଲିଛି ଏହି ସ୍କୁଲ । ସ୍ଥିତି ଏମିତି ହେଲାଣି ଯେ, ଗୋଟିଏ ଶ୍ରେଣୀ ଗୃହରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପିଲା ବସି ପଢୁଛନ୍ତି ପାଠ । ଆଉ ପିଲାଙ୍କ ସଂଖ୍ୟା କିଛି କମ୍ ନୁହେଁ, ବର୍ତ୍ତମାନ ଧୂଳିପୁଟ ସ୍କୁଲରେ ୧୦୦ ଉପରେ ପିଲା । ଆଉ ଏତେ ସଂଖ୍ୟାରେ ପିଲା ଯେତେବେଳେ ଗୋଟିଏ ଶ୍ରେଣୀରେ ପଢିବେ, ସେତେବେଳେ କେମିତି ପାଠ ପଢା ହେଉଥିବ ତାହା ସ୍ପଷ୍ଟ ଅନୁମେୟ କରିପାରୁଥିବେ ।
ରୋଷେଇ ପରିବେଶ ଦେଖିଲେ ଖାଇବା ପାଇଁ ଇଚ୍ଛା ହେବନି । ହେଲେ ବାଧ୍ୟ ହୋଇ ସେଠି ରୋଷେଇ ଚାଲିଛି । ବିପଦସଙ୍କୁଳ ଅବସ୍ଥାରେ ସ୍କୁଲ ମଝିରେ ରହିଛି କୂଅ । ସ୍କୁଲର ଉନ୍ନତି ଓ ଶ୍ରେଣୀ ଗୃହର ମରାମତି ପାଇଁ ବାରମ୍ବାର ପ୍ରଶାସନକୁ ଅନୁରୋଧ କରିବା ପରେ ବି କେହି ଶୁଣୁନଥିବା ଅଭିଯୋଗ ହୋଇଛି ।
ସେପଟେ ଏନେଇ ଜିଲ୍ଲା ଶିକ୍ଷାଧିକାରୀ କହିଛନ୍ତି ଯେ, ସ୍କୁଲ ଘର ନିର୍ମାଣ ଚାଲିଛି । ପ୍ରକୃତରେ କଣ ହୋଇଛି ସେନେଇ ମୋ ପାଖରେ କୌଣସି ତଥ୍ୟ ନାହିଁ କହିବା ସହ ଦାୟିତ୍ୱହୀନ ମନ୍ତବ୍ୟ ଦେଇଥିଲେ । ତେବେ ସରକାର ବାରମ୍ବାର କହୁଛନ୍ତି ପିଲାଙ୍କ ଶିକ୍ଷାର ଉନ୍ନତି ପାଇଁ ଆମେ ସବୁ ପ୍ରକାର ବ୍ୟବସ୍ଥା କରୁଛୁ । ହେଲେ ବାସ୍ତବ ଚିତ୍ର କଣ ତାହା ଆପଣଙ୍କ ସାମ୍ନାରେ ।
ରିପୋର୍ଟର- ରତ୍ନାକାର ପ୍ରଧାନ
