LIVE TV
କିଏ ଘର ଲିପା ପୋଛା କଲାଣି ତ ଆଉ କିଏ ଚଉରା ମୂଳକୁ ଘସି ଘସି ସଫା କଲାଣି । ପୁଣି କିଏ ଘରର ଡବା ସହ ଅନ୍ୟାନ୍ୟ ଜିନିଷକୁ ଧୋଇ ସଫା କଲାଣି । ସମସ୍ତେ ସଫା ସଫିରେ ବ୍ୟସ୍ତ । ଖାଲି ଏତିକି ନୁହେଁ ବରଂ ଗାଁ ଠାକୁରାଣୀ ପୀଠରୁ ଗାଁ ମନ୍ଦିର ପର୍ଯ୍ୟନ୍ତ ସବୁଠି ଚାଲିଛି ଧୁଆପଖାଳା କାମ । ମହିଳାଙ୍କଠୁ ପିଲା, ବଡଠୁ ବୁଢା ସମସ୍ତେ ଘର ସଫାରେ ବ୍ୟସ୍ତ । ପଶ୍ଚିମ ଓଡ଼ିଶାର ଗଣପର୍ବ ନୂଆଖାଇ ପାଇଁ ଚାଲୁଛି ପ୍ରସ୍ତୁତି ।
ଏଭଳି ଦୃଶ୍ୟ ନୂଆପଡା ଜିଲ୍ଲା କୋମନା ବ୍ଲକ କୋନାବିରା ଗାଁରେ ଦେଖିବାକୁ ମିଳିଛି । ଖାଲି ଏ ବର୍ଷ ନୁହେଁ ବରଂ ପ୍ରତିବର୍ଷ ନୂଆଖାଇ ଆସିଲେ ଏମିତି ଆରମ୍ଭ ହୋଇଯାଏ ଧୁଆପଖଳା କାମ । କିନ୍ତୁ ଯେତେବେଳେ ଏ ଗାଁର ଲୋକ ଜାଣିସାରିଛନ୍ତି କି ଏସନ ନୂଆଖାଇ ଏ ଗାଁରେ ଏମାନଙ୍କର ଶେଷ ନୂଆଖାଇ ବୋଲି, ସେମାନଙ୍କ ମନ ମାନୁନି କି ମନ ବୁଝୁନି । ସେଇ ପୁରୁଣା ସ୍ମୃତିକୁ ମନେ ପକାଇ ବୁଢୀ ମାଉସୀ ଜଣକ ବି କଣ କହିବ ସେ ନିଜେ ବି ଜାଣିପାରୁନି । ନୂଆଖାଇ କଥା କହିଲା ବେଳକୁ ପାଟି ଖନି ମାରିଦେଉଛି ।
Also Read
ଦିନେ ନୂଆଖାଇ ପାଇଁ ଯେଉଁଠି କୋଳାହଳ ହେଉଥିଲା ଆଜି ସେଇଠି ଖେଳିଗଲାଣି ଶୂନ୍ୟ ନିରବତା । କାରଣ ଲୋୟର ଇନ୍ଦ୍ର ଜଳସେଚନ ପ୍ରକଳ୍ପ ଏମାନଙ୍କ ପାଇଁ ଯେଉଁ ଦୁଃଖ ଆଣିଛି ତାହାକୁ କହିବା ପାଇଁ ଆମ ପାଖରେ ବୋଧହୁଏ ଶବ୍ଦର ଅଭାବ ହୋଇଯିବ । କିନ୍ତୁ ଏମାନମଙ୍କ ବେଦନାର ଅନ୍ତ ହେବନି । ଏହି ଅଂଚଳଟି ସଂପୂର୍ଣ୍ଣ ବୁଡି ଗାଁ ହେବା ପରେ ୯୦ ପ୍ରତିଶତ ଲୋକ ଗାଁ ଛାଡି ଚାଲି ଗଲେଣି । ଏବେ ଗାଁ ଚାରି ପଟେ ଲୋୟର ଇନ୍ଦ୍ର ଜଳସେଚନ ପ୍ରକଳ୍ପର ପାଣି ବି ଘେରି ଗଲାଣି । ଘର ଭିତରକୁ ବି ପାଣି ପଶିଗଲାଣି । ଆଉ ଏତିକି ବେଳେ ଆସି ପହଞ୍ଚିଛି ନୂଆଖାଇ।
ମନରେ ତ ଅନେକ ଦୁଃଖ ରହିଛି କିନ୍ତୁ ସବୁକୁ ପଛରେ ପକାଇ ନୂଆଖାଇବା ପାଇଁ ସଜବାଜ ହେଉଛନ୍ତି ଏହି ଗାଁ ଲୋକେ । ସେଥିପାଇଁ ତ ଏତେ ତରତର ହୋଇ ଚାଲିଛି ନୂଆଖାଇ ପ୍ରସ୍ତୁତି ପର୍ବ । ସମସ୍ତଙ୍କ ମନରେ ଗୋଟିଏ କଥା ଯେ, ଶହଶହ ବର୍ଷ ପୂର୍ବେ ଏଇ ଗାଁରେ ପୂର୍ବପୁରୁଷମାନେ ନୂଆ ଖାଉଥିଲେ, ଗୀତ ଗାଉଥିଲେ ଆଉ ନାଚରେ ବି ମସଗୁଲ ହେଉଥିଲେ । ହେଲେ ସମୟ ବଦଳିଛି, ସ୍ଥିତି ବି ବଦଳିଛି। ବାସ୍ ପରମ୍ପରାକୁ ବଜାୟ ରଖିବା ପାଇଁ ନୂଆଖାଇର ସିନା ପ୍ରସ୍ତୁତି ଚାଲିଛି । ହେଲେ ଗାଁ ଭାସିଯିବା ଦୁଃଖ କିନ୍ତୁ ମନରୁ ଭୁଲିହେଉନି। ସତରେ ଆଖି ସାମ୍ନାରେ ଯେବେ ପାଣିରେ ଲୀନ ହୋଇଯାଉଛି ପିଲାଦିନ ସହିତ ଅତୀତ, ତାହା ନିଶ୍ଚୟ କଷ୍ଟ ତ ଦେବ । କିନ୍ତୁ ଏମାନେ ପରମ୍ପରାକୁ ବଂଚାଇବା ପାଇଁ ଯେଉଁ ପରିଶ୍ରମ କରୁଛନ୍ତି, ତାହାକୁ ନେଇ ସେମାନଙ୍କୁ ସହେ ସଲାମ୍ ।
ରିପୋର୍ଟର- ନୂଆପଡାରୁ ମାୟାଧର ସରାଫ
