LIVE TV
୮ ଫୁଟ୍ ଉଚ୍ଚ, ୪ ଫୁଟ ଚଉଡା ହେବ କି ନାହିଁ ପାଇଖାନା । କିନ୍ତୁ ସେହି ପାଇଖାନା ଭିତରେ ରହୁଛନ୍ତି ଜଣେ ବୃଦ୍ଧା । ହୁଏତ ଆପଣଙ୍କୁ ବିଶ୍ୱାସ ହୋଇନପାରେ ଆଉ ପ୍ରଶ୍ନ ବି କରିପାରନ୍ତି ପାଇଖାନାରେ କେମିତି ରହୁଛନ୍ତି ବୃଦ୍ଧା? ଆଜ୍ଞା ହଁ ସେ ନିଜ ଇଚ୍ଛାରେ ନୁହେଁ ବରଂ ପରିସ୍ଥିତିର ଦାସ ସାଜି ପାଇଖାନା ଭିତରେ କାଟୁଛନ୍ତି ଜୀବନ।
ବୟସ ୭୦ ଟପିଲାଣି । ପୁଅ-ବୋହୂ ସମସ୍ତେ ଅଛନ୍ତି । ହେଲେ ବୁଢୀ ମାଆକୁ କେହି ପଚାରୁନାହାନ୍ତି । ପାଇଟି କରି ଖାଇବାକୁ ଅଂଟାରେ ବି ଆଉ ଜୋର୍ ନାହିଁ। ବର୍ଷାରେ ଓଦା ହୋଇ ରହିବା ପରେ ଘର ଖଣ୍ଡିଏ ପାଇଁ ବଡବାବୁ ଆଉ ନେତାଙ୍କ ପାଖକୁ ଦୌଡି ଦୌଡି ନୟାନ୍ତ ହେଲେଣି । କିନ୍ତୁ ଦୁଃଖ କେହି ଶୁଣୁନାହାନ୍ତି । ମୟୂରଭଂଜ ଉଦଳାରୁ ଆସିଥିବା ଏହି ଦୃଶ୍ୟ ଦେଖିଲେ ଆପଣଙ୍କ ଆଖିରେ ବି ଲୁହ ଜକାଇ ଆସିବ ।
Also Read
ଦୁଇ ପୁଅ ଅଛନ୍ତି ହେଲେ ବୁଢୀ ମାଆକୁ କେହି ପଚାରୁନାହାନ୍ତି । ସେଇଥି ପାଇଁ ଜାକିମାକି ହୋଇ କୁନି ଘରେ ଦୟନୀୟ ଅବସ୍ଥାରେ ରହୁଛନ୍ତି ବୃଦ୍ଧା ବାସୀ ବେବା। ସରକାର ଦେଉଥିବା ଗଣ୍ଡାଏ ଚାଉଳ ଏବେ ତାଙ୍କ ବଞ୍ଚିବାର ରାହା ପାଲଟିଛି । ଭତ୍ତା ବାବଦକୁ ଯେଉଁ ଟଙ୍କା ପାଉଛନ୍ତି ସେଥିରେ ତେଲ ଲୁଣ କିଣି ପେଟ ପାଇଁ ଗଣ୍ଡେ ଦାନା ଯୋଗାଡ କରୁଛନ୍ତି । ଏ ବୟସରେ ଭଲମନ୍ଦ ଖାଇବାକୁ ଇଚ୍ଛା ଥିଲେ ବି ଟଙ୍କା ନଥିବାରୁ ସଜନା ଶାଗ ଖରଡି ଭାତ ଗୁଣ୍ଡାଏ ଖାଉଛନ୍ତି ବାସୀ।
ସେପଟେ ମାଆଙ୍କୁ ଏହି ବୟସରେ କାହିଁକି ହତାଦାର କରୁଛନ୍ତି ପୁଅ? ସେନେଇ ଆମେ ତାଙ୍କୁ ପ୍ରଶ୍ନ କରିବାରୁ ସେ ଏହାକୁ ଏଡାଇ ଦେବା ସହ ତାଙ୍କ କଥା ବୁଝୁଥିବା ସେ କହିଛନ୍ତି। ଏପଟେ ଉଦଳା ବିଧାୟକ କହିଛନ୍ତି, ଖୁବଶୀଘ୍ର ବୁଢୀ ମାଆକୁ ଘର ଦେବା ପାଇଁ ବିଡ଼ିଓଙ୍କୁ ନିର୍ଦ୍ଦେଶ ଦିଆଯାଇଛି । ତେବେ ଦେଖିବାକୁ ବାକି ରହିଲା କେତେ ପ୍ରତିଶ୍ରୁତି ପାଳନ କରୁଛନ୍ତି ବିଧାୟକ ।
ରିପୋର୍ଟର- ଉଦଳାରୁ ମାନସ ପାଣି
