• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Manoranjan Behera

ସ୍ୱାମୀ ଅସୁସ୍ଥ, ସ୍ତ୍ରୀ ବି ଅସୁସ୍ଥ । ଏତେ ରୋଗୀଣା ଥାଇ ବି ସାତ ଜନ୍ମର ସାଥୀକୁ ଦଣ୍ଡେ ଛାଡ଼ିପାରୁନି ହତଭାଗା ପତ୍ନୀ । ନିଜର କଷ୍ଟ ଏତେ ଯେ ଘଣ୍ଟାଏ ବସିବା ତାଙ୍କ ପକ୍ଷରେ ସମ୍ଭବ ନୁହେଁ । ହେଲେ ସ୍ୱାମୀର ସେବା କରିବା ପାଇଁ କିଛି ଟିକିଏ ବି ପଛଘୁଂଚା ଦେଉନାହାନ୍ତି । ବରଂ ଖଟ ଉପରେ ବସାଇ ଭାତ ଖୁଆଇ ଦେଉଛନ୍ତି, ପାଣି ପିଆଇ ଦେଉଛନ୍ତି । ପୁଣି ହାତଗୋଡ ଦରଜ ହେଉଥିବ ଭାବି ଘସି ବି ଦେଉଛନ୍ତି । ଆଉ ଆଖିରୁ ତାଙ୍କର ଗଡ଼ି ଯାଉଛି ଦୁଃଖର ଅଶ୍ରୁ ।

ଦିନେ ସେମାନେ ବୁଲି ବୁଲି ସମାଜର ସେବା କରୁଥିଲେ, ଅନେକ ଲୋକଙ୍କୁ ସାହାଯ୍ୟ ବି କରୁଥିଲେ । ହେଲେ ଏବେ ସମୟ ବଦଳିଯାଇଛି । ସେମାନଙ୍କ ଜୀବନରେ ଏବେ ଖେଳିଯାଇଛି ଦୁଃଖର କଳାବାଦଲ । କାରଣ ସ୍ୱାମୀ କିଡନୀ ରୋଗରେ ଆଉ ସ୍ତ୍ରୀ ଗ୍ଲାଣ୍ଡ କ୍ୟାନସର ରୋଗରେ ଶିକାର ହୋଇଛନ୍ତି । ସ୍ଥିତି ଏମିତି ଯେ ସ୍ୱାମୀ-ସ୍ତ୍ରୀ ଏବେ ଭିନ୍ନ ଭିନ୍ନ ମେଡିକାଲରେ ରହି ଚିକିତ୍ସା ବି ହେଉଛନ୍ତି । ଆଉ ବାପା-ମାଆଙ୍କ ଚିକିତ୍ସା ପାଇଁ ପ୍ରଶାସନ ପାଖରେ ପହଞ୍ଚି ସାହାଯ୍ୟ ମାଗୁଛି କୁନି ପୁଅ ମାତୃପ୍ରସାଦ ।

ଯାଜପୁର ଦାନଗଦୀ ବ୍ଲକ୍‌ ଖରଡାବନ୍ଦୀ ଗାଁର ଦେବୀପ୍ରସାଦ ସାମଲ ଓ ଇତିଶ୍ରୀ ସାମଲ । ଦୁହେଁ ଏବେ ରୋଗରେ ପଡ଼ିଛନ୍ତି । ଦେବୀପ୍ରସାଦଙ୍କର ଦୁଇଟି ଯାକ କିଡନୀ ଅର୍ଦ୍ଧାଧିକ ନଷ୍ଟ ହୋଇଗଲାଣି । ଯନ୍ତ୍ରଣା ଏତେ ପରିମାଣରେ ହେଉଛି ଯେ, କହିବା କଷ୍ଟକର । ସେହି ଦମ୍ପତ୍ତି ସମାଜସେବୀ ଭାବରେ ସ୍ଥାନୀୟ ଅଂଚଳରେ ବେଶ୍‌ ଜଣାଶୁଣା ଥିଲେ । ହେଲେ ଏବେ ନିଜେ ସାହାଯ୍ୟ ଅପେକ୍ଷାରେ ପଡ଼ିରହିଛନ୍ତି ।

 

ସ୍ଥିତି ଏମିତି ହେଲାଣି ଯେ, ଦୁହିଁଙ୍କର ଚିକିତ୍ସା ପାଇଁ ଘରଦ୍ୱାର ଜମିବାଡ଼ି ସବୁ ବିକ୍ରି କରିସାରିଲେଣି । ହେଲେ ଦୁହିଁଙ୍କର ଚିକିତ୍ସା ପାଇଁ ଯେତିକି ଟଙ୍କା ଦରକାର ସେତିକି ଯୋଗାଡ ହୋଇପାରିନି । ଯିଏ ଦିନେ ପୂରା ଅଂଚଳ ସାରା ବୁଲି ବୁଲି ସେବା କରୁଥିଲେ ଆଜି ସିଏ ନିଜେ ସେବା ଅପେକ୍ଷାରେ । ସେପଟେ ବାପାମାଆଙ୍କର ଏ ଅବସ୍ଥା ଦେଖି ସହିପାରୁନି କୁନି ପୁଅ । ସେଥିପାଇଁ ତ ଯେଉଁ ବୟସରେ ପାଠ ପଢିବା କଥା ସେଇ ବୟସରେ ପ୍ରଶାସନ ପାଖରେ ହାତଯୋଡି ମାଗୁଛି ସହାୟତା।

ସେପଟେ ସ୍ୱାମୀଙ୍କୁ କିଡନୀ ଦେବା ପାଇଁ ସ୍ତ୍ରୀ ଇତିଶ୍ରୀଙ୍କର ଇଚ୍ଛା ଥିଲେ ବି ନିଜ ରୋଗ ପାଇଁ ଦେଇପାରୁନାହାନ୍ତି କି ସ୍ୱାମୀଙ୍କ ଏ କଷ୍ଟ ବି ଦେଖିପାରୁନାହାନ୍ତି । ମୋଟ୍‌ ଉପରେ ଏବେ ସରକାରୀ ସହାୟତା ନମିଳିଲେ ଦୁହିଁଙ୍କ ଜୀବନ ପ୍ରତି ଘୋର ବିପଦ ମାଡ଼ି ଆସିବ ବୋଲି କୁହାଯାଉଛି । ଆଉ ବାପ-ମାଆଙ୍କ ପାଇଁ କୁନି ପୁଅର ଗୁହାରି ପ୍ରଶାସନ ପାଖରେ ପହଂଚିବା ପରେ ସହାୟତା ମିଳିବ ବୋଲି ପ୍ରତିଶ୍ରୁତି ଦେଇଛନ୍ତି ଅତିରିକ୍ତ ଜିଲ୍ଲାପାଳ ଅକ୍ଷୟ ମଲ୍ଲିକ ।

ସେପଟେ ନିଜର ଚିକିତ୍ସା ପାଇଁ ସାହାଯ୍ୟ କରିବାକୁ ଏହି ଦମ୍ପତ୍ତି ମୁଖ୍ୟମନ୍ତ୍ରୀଙ୍କ ପାଖରେ ନିବେଦନ ବି କରିଛନ୍ତି । ତେବେ ଆପଣମାନେ ବି ଯଦି ସାହାଯ୍ୟ କରିବାକୁ ଇଚ୍ଛା କରନ୍ତି ତେବେ ଏହି ଠିକଣାରେ ସାହାଯ୍ୟ କରନ୍ତୁ।

ମାର୍ଫତ୍-ଇତିଶ୍ରୀ ସାମଲ, ସା-ଖରଡାବନ୍ଦୀ, ପୋ-ନଛିପୁରା, ଥାନା-ଟମକା, ମୋବାଇଲ ନଂ-9938507394, ଓଡିଶା ଗ୍ରାମ୍ୟବ୍ୟାଙ୍କ ଏକାଉଣ୍ଟ ନଂ-406334006003273, IFSC code-IOBA0ROGB01

ରିପୋର୍ଟର- ଜନ୍ମେଜୟ ଦାସ