ପରିବାର କେମିତି ଚଳିବ, ସେହି ଚିନ୍ତାରେ ହାଟରେ ଶାଗ ବିକୁଛନ୍ତି ବିସିଏ ଛାତ୍ର

ହାଟରେ ବସିଛି ଛନଛନିଆ ଶାଗ । ଯିଏ ଆସୁଛି ସିଏ ଘଡିଏ ଚାହୁଁଛି । ଆଉ ଶାଗ ବିଡାଏ ବେଗ୍‌ରେ ପୂରେଇ ନେଉଛି । କୋଶଳା, ପାଳଙ୍ଗ, ସୋରିଷ ଓ ମେଥି ପରି ବିଭିନ୍ନ ପ୍ରକାର ଶାଗର ମେଲିଛି ପସରା । ଆଉ ଯିଏ ଶାଗ ବିକୁଛନ୍ତି ତାଙ୍କ ବିଷୟରେ ଜାଣିଲେ ଆପଣ ବି ଚମକି ପଡିବେ । କାରଣ ଶାଗ ବେପାରୀ ଜଣକ ହେଉଛନ୍ତି ଜଣେ ବିସିଏ ଛାତ୍ର । ଯିଏ କି କଲେଜ୍‌ରେ ପାଠ ପଢିବା ସହିତ ହାଟରେ ବିକ୍ରି କରୁଛନ୍ତି ଶାଗ । ଆଉ ସେଥିରୁ ଯେଉଁ ଦୁଇ ପଇସା ରୋଜଗାର ହେଉଛି ସେଥିରେ ନିଜେ ପାଠ ପଢିବା ସହିତ ପରିବାର ଚଳାଉଛନ୍ତି ବିସିଏ ଛାତ୍ର ଡମ୍ବୁରଧର ମାଳି ।

ବାଡିରେ ଫଳିଛି ମେଞ୍ଚା ମେଞ୍ଚା ଶାଗ । ଆଉ ତାହାକୁ ହାଟରେ ବିକ୍ରି କରୁଛନ୍ତି ଡମ୍ବୁରୁ । ଶାଗ ବିକ୍ରିକରି ସେ ନିଜେ ସ୍ୱାବଲମ୍ବୀ ହେବା ସହିତ ପରିବାରକୁ ବଢାଇଛନ୍ତି ସହାୟତାର ହାତ । ନବରଙ୍ଗପୁର କୋଷାଗୁମୁଡା ଆସଙ୍ଗା ଗାଁରେ ଡମ୍ବରୁଧରଙ୍କ ଘର । ଡମ୍ବୁରୁ ଜୟପୁର ବିକ୍ରମ ଦେବ କଲେଜରେ ସେ ବିସିଏ କରୁଛନ୍ତି । ଏବେ କଲେଜ୍‌ରେ ଆଉ ଗୋଟିଏ ସେମିଷ୍ଟାର ବାକି ଥିବା ବେଳେ କେମିତି ଚାକିରି କରି ଦୁଇ ପଇସା ରୋଜଗାର କରିବେ ସେଇ ଚିନ୍ତାରେ ଥିଲେ ଡମ୍ବୁରୁ ।

ଅଧିକ ପଢ଼ନ୍ତୁ: ଚାକିରିରୁ ପାଉଥିଲେ ୧୬ ହଜାର, ଏବେ ଚାଷରୁ ମାସିକ ରୋଜଗାର ୭୦ ହଜାର

ଟଙ୍କା ରୋଜଗାର କରିବା କଥା ଚିନ୍ତା କରୁ କରୁ ବାଡିରେ ଯେତିକି ଶାଗ ରହିଛି, ସେତିକିରୁ କେମିତି ରୋଜଗାର କରିହେବ ସେଇ ଚିନ୍ତା କଲେ ଡମ୍ବୁରୁ । ଆଉ ଉପାୟ ଖଟାଇ ଶାଗକୁ ନେଇ ବଜାରରେ କଲେ ବିକ୍ରି ଆଉ ରୋଜଗାର କଲେ ଟଙ୍କା । ନିଇତି ସକାଳ ହେଲେ ଘରଠୁ ୨୩ କିମି ଦୂରରେ ଚାଲୁଥିବା ହାଟରେ ପହଞ୍ଚି ଶାଗ ବେପାର କରନ୍ତି ଡମ୍ବୁରୁ । ଆଉ ଦିନକୁ ରୋଜଗାର କରୁଛନ୍ତି ୫ରୁ ୭ ଟଙ୍କା ।

ଗୁରୁତ୍ୱପୂର୍ଣ୍ଣ କଥା ହେଲା, ରାତି ୩ଟାରୁ ଉଠି ଘଣ୍ଟେ ପାଠ ପଢନ୍ତି । ଏହାପରେ ୨୩ କିମି ରାସ୍ତା ଯାଇ ଶାଗ ବିକୁଛନ୍ତି । ଅପରାହ୍ନ ୧୨ଟା ସୁଦ୍ଧା ବେପାର ସରିବା ପରେ ଘରକୁ ଫେରନ୍ତି ଡମ୍ବୁରୁ । ପାଠ ପଢିବା ସହିତ ଶାଗ ବେପାର କରି ନିଜେ ଖାଲି ପାଠ ପଢୁଛନ୍ତି ତାହା ନୁହେଁ ବରଂ ଘର ପାଖରେ ଥିବା ପିଲାଙ୍କୁ ସଂଧ୍ୟାରେ ପଢାନ୍ତି ପାଠ ।

ତେବେ ଯେଉଁ ବୟସରେ ପିଲାମାନେ ମଉଜ ମଜଲିସ୍‌ କରିବାର କଥା, ସେହି ବୟସରେ ଶାଗ ବିକ୍ରି କରି ପରିବାର ଚଲାଉଛନ୍ତି ଡମ୍ବୁରୁ । ହେଲେ ପାଠପଢା ସରିବା ପରେ ଯଦି ସରକାରୀ ଚାକିରି ଖଣ୍ଡିଏ ତାଙ୍କୁ ମିଳନ୍ତା, ତେବେ ଦୁଃଖ ଦୂର ହୁଅନ୍ତି ବୋଲି କହିଛନ୍ତି ଡମ୍ବୁରୁ । ସତରେ ଜଣେ ବିସିଏ ଛାତ୍ର ପାଠ ପଢିବା ସହିତ ବଜାରରେ ଶାଗ ବିକ୍ରି କରି ପରିବାର ଚଳାଇବା ଘଟଣା ଜଣାପଡିବା ପରେ ସ୍ଥାନୀୟ ଅଂଚଳରେ ବେଶ୍‌ ଚର୍ଚ୍ଚା ଚାଲିଛି ।

(ରିପୋର୍ଟର- ନବରଙ୍ଗପୁରରୁ ନବଘନ ବିଷୋୟୀ)