କାହା ପାଇଁ ମହାପ୍ରୟାଣ ସେବା ? ଶବ ନେବାକୁ ମନା କରିଦେଲା ସରକାରୀ ଆମ୍ବୁଲାନ୍ସ, ଶେଷରେ ଟ୍ରଲିରେ ବୁହା ହେଲା...

ଟ୍ରଲିରେ ବୁହା ହେଲା ଶବ। ସରକାରଙ୍କ ପକ୍ଷରୁ ମାଗଣା ସ୍ୱାସ୍ଥ୍ୟସେବାର ଡିଣ୍ଡିମ ପିଟା ଯାଉ ଥିବାବେଳେ ଏହି ଜ୍ୱଳନ୍ତ ଉଦାହରଣ ଏବେ ସାମ୍ନାକୁ ଆସିଛି। ଆମ୍ବୁଲାନ୍ସ ସେବା କିମ୍ବା ମହାପ୍ରୟାଣ ସେବା ସବୁ କିଛି କେବଳ ପ୍ରହସନ ସାଜିଥିବା ମୃତକଙ୍କ ସ୍ୱାମୀ ଅଭିଯୋଗ କରିଛନ୍ତି।

ସୂଚନା ଅନୁସାରେ, ସୋର ବ୍ଲକ ଦହିସଡା ପଞ୍ଚାୟତ ଛପୁଲିଆ ଗାଁର ଗୁରୁବା ସିଂ ଙ୍କ ସ୍ତ୍ରୀ ମମତା ସିଂ ଙ୍କର ଦେହ ଅସୁସ୍ଥ ଥିବାରୁ ପରିବାର ଲୋକେ ସୋର ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ସନ୍ଧ୍ୟାରେ ତାଙ୍କର ମୃତ୍ୟୁ ହୋଇଥିଲା।

ପରେ ପରିବାର ଲୋକେ ସରକାରୀ ଆମ୍ବୁଲାନ୍ସକୁ ଯୋଗାଯୋଗ କରିବାରୁ ସେମାନେ ଶବ ନେବେ ନାହିଁ ବୋଲି ମନା କରିଥିଲେ। ଘରୋଇ ଆମ୍ବୁଲାନ୍ସ ସହ ଯୋଗାଯୋଗ କରିବାରୁ ୧୫୦୦ ଟଙ୍କା ଭଡ଼ା ଲାଗିବ ବୋଲି କହିଥିଲେ।

ମମତାଙ୍କ ପରିବାର ଲୋକେ ଗରିବ ଶ୍ରେଣୀର ହୋଇଥିବାରୁ ଟଙ୍କା ଯୋଗାଡ କରିନପାରି ଶେଷରେ ନିରାଶ ହୋଇ ରାତି ୧୦ଟା ପରେ ନିଜ ଟ୍ରଲିରେ ୫ କିଲୋମିଟର ପର୍ଯ୍ୟନ୍ତ ମମତାଙ୍କ ଶବକୁ ବୋହିଥିଲେ। ଖବର ଲେଖାଯିବା ସୁଦ୍ଧା ଏନେଇ ପ୍ରଶାସନ କିମ୍ବା ସ୍ୱାସ୍ଥ୍ୟ ବିଭାଗ କାହାରି ପ୍ରତିକ୍ରିୟା ମିଳିପାରିନାହିଁ।