ଚାପରେ ନଇଁଲା ଶ୍ରୀମନ୍ଦିର ପ୍ରଶାସନ; ବହୁ ବିବାଦ ପରେ ଆଜିଠୁ ଖୋଲିଛି ପଶ୍ଚିମ ଦ୍ୱାର

ବହୁ ଦାବି, ଅସନ୍ତୋଷ ଓ ଚାପ ପରେ ଆଜିଠୁ ଖୋଲିଛି ଶ୍ରୀମନ୍ଦିର ପଶ୍ଚିମ ଦ୍ୱାର । ଯେଉଁବାଟ ଦେଇ କେବଳ ପୁରୀ ବାସିନ୍ଦାଙ୍କୁ କାଳିଆ ଦର୍ଶନର ଅନୁମତି ମିଳୁଛି । ହେଲେ ସିଂହଦ୍ୱାର ଆଗରେ ଭିଡ଼ରେ କଲବଲ ହେଉଥିବା ଭକ୍ତ ହୁଅନ୍ତୁ କି ସେବାୟତ, ଶୀଘ୍ର ଚାରିଦ୍ୱାର ଖୋଲିବା ଦାବିରେ ଅଟଳ ଅଛନ୍ତି । ତେଣେ ଜିଲ୍ଲା ପ୍ରଶାସନ କହିଛି- ପରିକ୍ରମା ପ୍ରକଳ୍ପ କାମ ସରିଲେ ସମସ୍ତଙ୍କ ମତାମତ ନିଆଯାଇ କୌଣସି ଠୋସ୍ ନିଷ୍ପତ୍ତି ନିଆଯିବ ।

ପୁରୀ ବାସିନ୍ଦାଙ୍କ ଦୁର୍ବାର ଆନ୍ଦୋଳନର ଚେତାବନୀ ହେଉ କି ଭକ୍ତ, ସେବାୟତ ଓ ପରିଚାଳନା କମିଟି ସଦସ୍ୟଙ୍କ ଅସନ୍ତୋଷର ଚାପ । ଶେଷରେ ଖୋଲିଲା ଶ୍ରୀମନ୍ଦିର ପଶ୍ଚିମ ଦ୍ୱାର ଏମିତି ପରିଚୟପତ୍ର ଦେଖାଇ ଜଗା ଦର୍ଶନ ପାଇଁ ବ୍ୟାଘ୍ର ଦ୍ୱାର ଦେଇ ଯାଉଛନ୍ତି ଭକ୍ତ । ଗତକାଲି ସନ୍ଧ୍ୟାରେ ଜିଲ୍ଲା ପ୍ରଶାସନର ହଠାତ୍ ଘୋଷଣା ମୁତବାକ ଆଜି ସକାଳେ କେବଳ ପୁରୀ ବାସିନ୍ଦାଙ୍କ ପାଇଁ ଖୋଲିଥିଲା ଶ୍ରୀମନ୍ଦିରର ପଶ୍ଚିମ ଦ୍ୱାର । କିଏ ଆଧାର କାର୍ଡ ତ କିଏ ଭୋଟ୍ ପରିଚୟପତ୍ର ସାଙ୍ଗରେ ଆଣିଥିଲେ ।

ପୋଲିସ କର୍ମଚାରୀଙ୍କୁ ଏହାକୁ ଦେଖାଇ ଜଣ ଜଣ କରି ସ୍ପେଶାଲ ବ୍ୟାରିକେଡରେ ମନ୍ଦିରକୁ ପ୍ରବେଶ କରୁଥିଲେ । ବାସେଳି ସାହି, ହରଚଣ୍ଡୀ ସାହି. ବାଲି ସାହି, ମାର୍କଣ୍ଡେଶ୍ୱର ସାହି ଓ ଲୋକନାଥ ରୋଡ୍ ସମେତ ମନ୍ଦିର ଚାରିକଡ଼ର ସମସ୍ତ ସାହି ବାସିନ୍ଦା ଓ ସେବାୟତଙ୍କ ପରିବାର ଏହାକୁ ନେଇ ଖୁସି ହୋଇଛନ୍ତି । ତେବେ ଯେଉଁମାନେ ପୁରୀରେ ଘର ଭଡ଼ା ନେଇ ବର୍ଷ ବର୍ଷ ଧରି ରହୁଛନ୍ତି, ଅବା ମନ୍ଦିର ପାଖରେ ମାସ ମାସ ଧରି ଜଗାଦର୍ଶନ ପାଇଁ ଡେରା ପକାଇଛନ୍ତି, ସେମାନେ କିନ୍ତୁ ପଶ୍ଚିମଦ୍ୱାର ବାଟେ ଯିବାକୁ ଅନୁମତି ପାଇନାହାନ୍ତି ।

ଫଳରେ ବାଧ୍ୟ ହୋଇ ବୁଲି ବୁଲି ସିଂହଦ୍ୱାର ବାଟେ ଲାଇନରେ ଯାଇ ଦର୍ଶନ କରୁଛନ୍ତି । ଯାହାକୁ ନେଇ ସେମାନଙ୍କ କ୍ଷୋଭ ସହ ଅସନ୍ତୋଷ ବଢିଛି । ସେହିପରି ବୟସ୍କ ଓ ଦିବ୍ୟାଙ୍ଗ ଭକ୍ତଙ୍କ ଦର୍ଶନ ପାଇଁ ବିଶେଷ ସୁବିଧା ହେଉନଥିବାରୁ ସେଥିପ୍ରତି ବି ପ୍ରଶାସନ ଗୁରୁତ୍ୱ ଦେବାକୁ ଦାବି କରିଛନ୍ତି ସେବାୟତ ।

ବହୁ ବାଦବିଦାଦ ଓ ଅସନ୍ତୋଷ ପରେ ଶ୍ରୀମନ୍ଦିର ପଶ୍ଚିମ ଦ୍ୱାର ତ ଖୋଲିଲା, ହେଲେ ଉତ୍ତର ଓ ଦକ୍ଷିଣ ଦ୍ୱାର କେବେ ଖୋଲିବ ? କେବେ ଶ୍ରଦ୍ଧାଳୁଙ୍କୁ ମିଳିବ ସିଂହଦ୍ୱାର ବ୍ୟାରିକେଡ୍ ଯନ୍ତ୍ରଣାରୁ ମୁକ୍ତି ? ତାକୁ ନେଇ ଉଠିଲାଣି ପ୍ରଶ୍ନ । ଯେହେତୁ ଶ୍ରୀମନ୍ଦିର ଚାରି ଦ୍ୱାରବାଟେ ପ୍ରବେଶର ସ୍ୱତନ୍ତ୍ର ମାହାତ୍ମ୍ୟ ରହିଛି, ତେଣୁ ଭକ୍ତମାନେ ସେମାନଙ୍କ ମନୋକାମନା ନେଇ ଚାରିଟି ଯାକ ଦ୍ୱାରବାଟେ ଯାଇଥାନ୍ତି ।

ଯେମିତିକି ସିଂହଦ୍ୱାରକୁ ଧର୍ମଦ୍ୱାର ଭାବେ ବିବେଚନା କରାଯାଉଥିବାବେଳେ, ପଶ୍ଚିମ ବା ବ୍ୟାଘ୍ର ଦ୍ୱାରକୁ କାମ ଦ୍ୱାର, ଦକ୍ଷିଣ ବା ଅଶ୍ୱ ଦ୍ୱାରକୁ ଅର୍ଥ ଏବଂ ଉତ୍ତର ବା ହସ୍ତୀ ଦ୍ୱାରକୁ ମୋକ୍ଷ ଦ୍ୱାର ବୋଲି ବିଶ୍ୱାସ କରାଯାଏ । ଏଣେ ବିଭିନ୍ନ ଆଳ ଦେଖାଇ ଏସବୁ ଦ୍ୱାରବାଟେ ପ୍ରବେଶକୁ ପ୍ରଶାସନ ବନ୍ଦ ରଖୁଥିବାରୁ ବଢୁଛି ଅସନ୍ତୋଷ । ଖୋଦ୍ ଶ୍ରୀମନ୍ଦିର ସେବାୟତ ବି କହିଲେଣି, ପରିକ୍ରମା ପ୍ରକଳ୍ପ କାମ ସରିବା ପର୍ଯ୍ୟନ୍ତ ଅପେକ୍ଷା କରିବୁ, ତାପରେ କୌଣସି ନିଷ୍ପତ୍ତି ନହେଲେ ପୁଣି ଚାରିଦ୍ୱାର ଖୋଲିବା ଦାବି ଉଠାଇବୁ ।

ସେପଟେ ପୁରୀ ଉପଜିଲ୍ଲାପାଳ କହିଛନ୍ତି ଉତ୍ତର ଓ ଦକ୍ଷିଣ ଦ୍ୱାର ପାର୍ଶ୍ୱରେ ଶ୍ରୀମନ୍ଦିର ପରିକ୍ରମା ମାର୍ଗର ନିର୍ମାଣ କାର୍ଯ୍ୟ ଚାଲୁ ରହିଛି । କାମ ସରିଲେ ସେ ଦୁଇ ଦ୍ୱାର ଖୋଲାଯିବା ନେଇ ସମସ୍ତଙ୍କ ମତାମତ ନିଆଯାଇନିଷ୍ପତ୍ତି ନିଆଯିବ । ଏବେ ଅପେକ୍ଷା, କେତେଶୀଘ୍ର ଭକ୍ତଙ୍କ ପାଇଁ ଖୋଲୁଛି ଶ୍ରୀମନ୍ଦରିର ଚାରି ଦ୍ୱାର ।ରିପୋର୍ଟ, ଓଟିଭି