ଗର୍ବ କରୁଛି ସାରା ରାଜ୍ୟ; ଚନ୍ଦ୍ରୟାନ୍–ଥ୍ରୀ’ ଅଭିଯାନରେ ଓଡ଼ିଆ ପୁଅ ଶୁଭାଶିଷ

ଚନ୍ଦ୍ରୟାନ୍–ଥ୍ରୀ’ ଅଭିଯାନରେ ଓଡ଼ିଆ ପୁଅ ଶୁଭାଶିଷ । ଯାହାକୁ ନେଇ କେବଳ ଜନ୍ମମାଟି କେନ୍ଦ୍ରାପଡ଼ା ଜିଲ୍ଲାର ମୁକୁନ୍ଦପୁର ଗାଁ ନୁହେଁ, ବରଂ ସାରା ରାଜ୍ୟ ଗର୍ବିତ । ଗାଁ ସ୍କୁଲରେ ପାଠପଢିଲା ବେଳେ ଯେଉଁ ପୁଅ ଅସଜଡା ଯନ୍ତ୍ରପାତିକୁ ସଜାଡିବାରେ ମାତୁଥିଲା ଆଜି ସେ ଚନ୍ଦ୍ରୟାନ-ଥ୍ରୀର ଯନ୍ତ୍ରପାତିରେ ହାତ ମାରିଛି । ନିପଟ ଗାଁରୁ ଯାଇ ଇସ୍ରୋରେ କାମ କରୁଥିବା ଓଡ଼ିଆ ପୁଅକୁ ନେଇ ଶୁଭାଶିଷକୁ ନେଇ ଏବେ ସବୁଠି ଚର୍ଚ୍ଚା ।

ପୁଅ ଯେତେ ବ୍ୟସ୍ତ ଥାଉ, ଦୁନିଆର ଯେ କୌଣସି ଗୁରୁତ୍ୱପୂର୍ଣ୍ଣ କାମରେ ଲାଗିଥାଉ, ମା'ର କିନ୍ତୁ ସଦାବେଳେ ଗୋଟିଏ ଚିନ୍ତା, ତା ପୁଅ ଖାଇଛି ନା ନାହିଁ, ଦେହ ପା ଭଲ ଅଛି ନା ନାହିଁ,

ଘରକୁ ସେ କେବେ ଫେରିବ ? ଏଠି ବି ମାଆଟିଏ ତା ପୁଅକୁ ସମାନ କଥା ପଚାରୁଛି । ଏ ମାଆ ପୁଅ ହେଉଛନ୍ତି କେନ୍ଦ୍ରାପଡା ଡେରାବିଶ ବ୍ଲକ ମୁକୁନ୍ଦପୁର ଗ୍ରାମର ନିର୍ମଳା ନାୟକ ଓ ଶୁଭାଶିଷ ନାୟକ । ନିର୍ମଳା ଗାଁରେ ଥାଇ ପୁଅର ଶୁଭ ମନାସୁଥିବା ବେଳେ, ପୁଅ ଏବେ ଆନ୍ଧ୍ରପ୍ରଦେଶ ଶ୍ରୀହରିକୋଟାସ୍ଥିତ ସତୀଶଧାୱାନ ଇଣ୍ଡିଆନ୍ ସ୍ପେସ୍ ରିସର୍ଚ୍ଚ ସେଣ୍ଟର ଇସ୍ରୋରେ । ଯେଉଁଠୁ ଗତ ଶୁକ୍ରବାର ଭାରତର ତୃତୀୟ ମୁନ୍ ମିଶନ୍ ‘ଚନ୍ଦ୍ରୟାନ୍–୩’ର ସଫଳ ଉତକ୍ଷେପଣ ହୋଇଛି ।

ଇସ୍ରୋରେ ଶୁଭାଶିଷ ଜଣେ ମେକାନିକାଲ୍ ଇଣ୍ଟିଗ୍ରେସନ୍ ଟେକ୍ନିନିସିଆନ୍ ଭାବେ ୨୦୧୮ରୁ ନିଯୁକ୍ତି ପାଇଥିବା ବେଳେ ଗତ ବର୍ଷେ ହେବ ସେ ଚନ୍ଦ୍ରୟାନ-୩ ମିଶନରେ ସାମିଲ୍ ହୋଇଥିଲେ । ଆଉ ଏ ଖବର ଜଣାପଡିବା ପରେ ଏବେ ଶୁଭାଶିଷଙ୍କୁ ନେଇ ସବୁଠି ଚର୍ଚ୍ଚା, ଚନ୍ଦ୍ରୟାନ୍-୩ରେ ଓଡ଼ିଆ ପୁଅ ଶୁଭାଶିଷ । ଏ ହେଉଛି ସେହି ଖୁସିର ମହୂର୍ତ୍ତ । ନିଜ ସହକର୍ମୀଙ୍କ ସହ ଚନ୍ଦ୍ରୟାନ-୩ ଉତକ୍ଷେପଣ ହେବା ପୂର୍ବରୁ ସମସ୍ତେ ଏକାଠି ଫଟୋ ଉଠାଇଥିଲେ ।

କେନ୍ଦ୍ରାପଡ଼ା ଜିଲାର ମୁକୁନ୍ଦପୁର ଗାଁରୁ ଇସ୍ରୋ ପର୍ଯ୍ୟନ୍ତ ପହଞ୍ଚି ସେଠି ଚନ୍ଦ୍ରୟାନ-୩ ମିଶନରେ ସାମିଲ ହେବା ଛୋଟିଆ ସଫଳତା ନୁହେଁ । ଶୁଭାଶିଷଙ୍କ ବାପା ବଡ଼ବାପା ଚାନ୍ଦୋଳ ବଜାରରେ ରାସନ ଦୋକାନ କରି ପରିବାର ଚଳାଉଥିବା ବେଳେ ସେ ସ୍ଥାନୀୟ ବନମାଳୀ ବ୍ରହ୍ମଚାରୀ ମଡେଲ ହାଇସ୍କୁଲରୁ ମାଟ୍ରିକ୍ ପାସ୍ କରିଥିଲେ । ପିଲାଟି ଦିନରୁ ମେଶିନ୍, ଇଲେଟ୍ରୋନିକ୍ ଆଇଟମ୍ ଆଦି ସଜାସଜି କାମରେ ମାତୁଥିବା ଶୁଭାଶିଷ ପରେ କଟକରୁ ଆଇଟିଆଇ ଏବଂ ଭୁବନେଶ୍ୱର ସିଟିଟିସିରୁ ଉଚ୍ଚଶିକ୍ଷା ଲାଭ କରି ୨୦୧୮ରେ ଇସ୍ରୋରେ ନିଯୁକ୍ତି ପାଇଥିଲେ ।

ଚନ୍ଦ୍ରୟାନ-୩ରେ ଲାଗିଥିବା କେତେକ ଜଟିଳ ଯନ୍ତ୍ରାଶଂ ଭୁବନେଶ୍ୱରସ୍ଥିତ ସିଟିଟିସିରୁ ତିଆରି ହୋଇଥିବା ବେଳେ ଶୁଭାଶିଷ ମଧ୍ୟ ସେଇ ସିଟିଟିସିର ପୂର୍ବତନ ଛାତ୍ର । ଚନ୍ଦ୍ରୟାନ-ଥ୍ରୀ ପୂର୍ଣ୍ଣ ସଫଳତା ମନାସି ମୁକୁନ୍ଦପୁର ଗାଁ ମନ୍ଦିରରେ ଶୁକ୍ରବାରଠାରୁ ଜଳୁଛି ଅଖଣ୍ଡ ଦୀପ । ଶୁଭାଶିଷଙ୍କ ସାଙ୍ଗସାଥୀ, ଶିକ୍ଷକ ସମସ୍ତେ ଏବେ ତାଙ୍କ ପାଇଁ ଗର୍ବିତ ।