LIVE TV
ସେବା, ଦାୟିତ୍ୱବୋଧ, କର୍ତ୍ତବ୍ୟ ପରାୟଣତା, ସର୍ବୋପରି ସୂଚନା ଭଳି ଶକ୍ତିଶାଳୀ ଉପାଦାନକୁ ସମାଜର ସବୁ ବର୍ଗର ଲୋକଙ୍କ ନିକଟରେ ପହଞ୍ଚାଇବାର ପ୍ରକ୍ରିୟାକୁ ୟା ଭିତରେ ପୂରଣ ହୋଇଛି ଦୀର୍ଘ ୨୫ ବର୍ଷ ଯାତ୍ରା । ଯେତେ କଣ୍ଟକିତ ହେଉ କି ପଥରୋଧ ପାଇଁ ଯେତେ ବାଧାବିଘ୍ନ ଆସୁ, ସେ ସବୁକୁ ଅଣଦଖା କରି ଓଡ଼ିଆ ଓ ଓଡ଼ିଶାର ସ୍ୱାର୍ଥରକ୍ଷା ଲାଗି ଅହରହ ସଂଗ୍ରାମ ଜାରି ରଖିଛି ଓଟିଭି । ଓଡ଼ିଶାର ପ୍ରଥମ ଘରୋଇ ସାଟେଲାଇଟ୍ ୨୪ ଘଣ୍ଟିଆ ନ୍ୟୁଜ୍ ଚ୍ୟାନେଲ ଭାବେ ଅପ୍ରତିଦ୍ୱନ୍ଦ୍ୱୀ ଭାବେ ଛିଡ଼ା ହୋଇଥିବା ଏ ଅନୁଷ୍ଠାନ ଆଜି ପାଳନ କରୁଛି ଏହାର ରୌପ୍ୟ ଜୟନ୍ତୀ ଉତ୍ସବ ।
ଏପ୍ରିଲ ୧୮, ୧୯୯୭ ଆଜିର ଦିନରେ ଓଡିଶା ମାଟିରେ ଆରମ୍ଭ ହୋଇଥିଲା ଖବର ପ୍ରସାରଣର ଏକ ନୂଆ ଅଧ୍ୟାୟ । ଜନ୍ମ ନେଇଥିଲା ଓଡ଼ିଶା ଟେଲିଭିଜନ୍-ଓଟିଭି । ସ୍ୱଳ୍ପ ଭିତ୍ତିଭୂମି, ସୀମିତ ସମ୍ବଳ ଆଉ ସମସ୍ୟାର ସୁଅ ଭିତରେ ବାଟ କାଟି ଧିରେ ଧିରେ ଆଗକୁ ଯାଇଥିଲା । ସ୍ୱଛ, ନିରପେକ୍ଷ, ନିର୍ଭିକତାର ଖବର ପ୍ରସାରଣର ଧାରାକୁ ବ୍ରତ କରି ବର୍ଷ ପରେ ବର୍ଷ ଅତିକ୍ରମ କରିଥିଲା ଓଟିଭି । ଓଡ଼ିଶବାସୀଙ୍କ ସମସ୍ୟା ଓ ଓଡ଼ିଶାର ସ୍ୱାର୍ଥକୁ ମୂଳମନ୍ତ୍ର କରି ଦାୟିତ୍ୱବାନ ଗଣମାଧ୍ୟମ ହିସାବରେ ଯେତିକି ଆଗକୁ ଯାଉଥିଲା, କୋଟି କୋଟି ଓଡ଼ିଆଙ୍କ ସେତିକି ବିଶ୍ୱାସଭାଜନ ହେବାରେ ଲାଗିଥିଲା ।
Also Read
ଏ ଭିତରେ ରାଜ୍ୟବାସୀଙ୍କ ସୁଖଦୁଃଖରେ ଭାଗି ହେବାର ଧାରା ଭିତରେ ପାଲଟି ଯାଇଛି । ଓଡ଼ିଶାବାସୀଙ୍କ ସ୍ୱର, ସାହାରା ଓ ସାହସ ପରେ ନ୍ୟୁଜ୍ ଚ୍ୟାନେଲର ଭିଡ଼ ଓ ପ୍ରତିଯୋଗିତା ଭିତରେ ନିଜ ମୂଳ ମନ୍ତ୍ରକୁ ନଭୁଲି ଉଚ୍ଚ ମାନର ମୂଲ୍ୟବୋଧ ଭିତ୍ତିକ ଖବର ପ୍ରସାରଣ କରି ଓଡ଼ିଶା ଗଣମାଧ୍ୟମ ଦୁନିଆରେ ଅାଣିଛି ବୈପ୍ଳବିକ ପରିବର୍ତ୍ତନ । ଆଜି ୨୫ ବର୍ଷ ପୂରଣ ଅବସରରେ ଶିଶୁରୁ କିଶୋର ପାଲଟି ଏବେ ରୌପ୍ୟ ଜୟନ୍ତୀ ପାଳନ କରିଛି ଓଡ଼ିଶାର ୧ ନମ୍ବର ନ୍ୟୁଜ୍ ଚ୍ୟାନେଲ ଓଟିଭି ।
ସମୟର ସଂଯୋଗ କ୍ରମେ ଓଡ଼ିଶାର ମହାନ ଜନନାୟକ ବିଜୁ ବାବୁଙ୍କ ମହାପ୍ରୟାଣରୁ ହିଁ ଖବର ପ୍ରସାରଣର ମହାର୍ଘ୍ୟ ସୁଯୋଗ ପାଇଥିଲା ଓଟିଭି । ସେଇଠୁ ଆରମ୍ଭ ହୋଇଥିଲା ନିରବଚ୍ଛିନ୍ନ ଯାତ୍ରା । ୧୯୯୮ରୁ ପ୍ରସାରଣ ଆରମ୍ଭ ହୋଇଥିବା ସେଦିନର ପ୍ରଥମ ନ୍ୟୁଜ୍ ବୁଲେଟିନ୍ ‘ପ୍ରତିଦିନ’ ଆଜି ବି ପ୍ରତିଟି ଓଡ଼ିଆଙ୍କ ହୃଦସ୍ପନ୍ଦନ ସହ ଜଡିତ । ରାଜନୀତି, ଶିକ୍ଷା, ସ୍ୱାସ୍ଥ୍ୟ, ସାହିତ୍ୟ, ଅର୍ଥନୀତି, କ୍ରୀଡ଼ା, ମନୋରଞ୍ଜନ ଆଦି ସମାଜର ପ୍ରତିଟି କ୍ଷେତ୍ରକୁ ଖବର ସମତୁଲ କରି ସ୍ଥାନ ଦେଇ ଓଟିଭି ପାଲଟି ଯାଇଛି ଓଡ଼ିଶାବାସୀଙ୍କ ପ୍ରିୟ ଚ୍ୟାନେଲ୍ । ତାସହ ବାତ୍ୟା, ବନ୍ୟା, ମରୁଡ଼ି ଓ ମହାମାରୀ ସମୟରେ ଲୋକଙ୍କ ସାଥୀ ହୋଇ ବାଟ ଚାଲିବା ସହ ସୁଖ ସମୟରେ ସହଭାଗୀ ବି ହୋଇଛି ।
୨୫ ବର୍ଷ ପୂର୍ତ୍ତି ଅବସରରେ ଓଟିଭିର ସମସ୍ତ ୧୦ଟି ବ୍ୟୁରୋ ସହ ଭୁବନେଶ୍ୱର ମୁଖ୍ୟ କାର୍ଯ୍ୟାଳୟରେ ଆୟୋଜିତ ହୋଇଥିଲା ରୌପ୍ୟ ଜୟନ୍ତୀ ଉତ୍ସବ । ଯେଉଁଥିରେ ଯୋଡ଼ି ହୋଇଥିଲେ ତମାମ ଓଡ଼ିଶାର ପ୍ରତିଟି ବର୍ଗର ଲୋକେ । ଏପଟେ ମୁଖ୍ୟ କାର୍ୟ୍ୟାଳୟ ପରିସରରେ ଆୟୋଜିତ ଉତ୍ସବରେ ପୁରୁଣା ଅନୁଭୁତି ବଖାଣିଥିଲେ ଓଟିଭି ସହ ଦୀର୍ଘ ଓ ନିରବଚ୍ଛିନ୍ନ ଯାତ୍ରାର ପଥିକ ସାଜିଥିବା ଅନେକ ପୁରୁଣା ସହକର୍ମୀ ।
ଦୀର୍ଘ ୨୫ ବର୍ଷର ଯାତ୍ରା ଭିତରେ କେବୁଲରୁ ସାଟେଲାଇଟ୍, ସାଟେଲାଇଟ୍ରୁ ଡିଜିଟାଲ ଭଳି ବହୁ ପରିବର୍ତ୍ତିତ ରୂପରେ ଦର୍ଶକଙ୍କ ନିକଟରେ ପହଞ୍ଚିଥିଲେ ମଧ୍ୟ ସବୁବେଳେ ବଜାୟ ରଖିଛି ସେହି ପୁରୁଣା ଛାପ । ଦର୍ଶକଙ୍କ ବିଶ୍ୱାସ ଓ ଭରସାକୁ ସାଥି କରି ବାଟ ଚାଲୁଛି ଓଟିଭି ।
