ହସହସ ଚେହେରା ଭିତରେ ଦିନେ ଗୋଟେ ସ୍ୱପ୍ନ ଥିଲା । BSC ପାସ୍ କରି ସାରିଲା ପରେ ୟୁପିଏସସି ପରୀକ୍ଷା ଦେବେ । ଆଉ ଆଇଏଏସ୍ ଅଫିସର ହୋଇ ବାପା ମାଆଙ୍କ ନାଁ ରଖିବେ । ଏମିତି ସ୍ୱପ୍ନ ଦେଖିଥିବା ଏଇ ଉଚ୍ଚଶିକ୍ଷିତା ଯୁବତୀ ଜଣକ ହେଉଛନ୍ତି ରାୟଗଡ଼ା ଜିଲ୍ଲା ଗୁଣୁପୁରର ରଶ୍ମିତା ପାଣିଗ୍ରାହୀ । ସୁଖ ସଂସାରର ସ୍ୱପ୍ନ ନେଇ ସାତ ଜନମର ସାଥୀ ହେବାକୁ ଯାହା ହାତ ଧରିଥିଲେ ସାମାନ୍ୟ କେଇଟା ଟଙ୍କା ପାଇଁ ସିଏ ଜହ୍ଲାଦ ପାଲଟିଯିବା ପରର ରଶ୍ମିତା ଏବେ ହସପିଟାଲରେ ।
ଯୌତୁକ ଜୁଇରେ ଜଳିବା ପରଠୁ, ଗତ ଅକ୍ଟୋବର ୨୮ରୁ କଟକ ଏସସିବି ମେଡିକାଲ ପ୍ଲାଷ୍ଟିକ ସର୍ଜରି ୱାର୍ଡରେ ଦରପୋଡ଼ା ଦେହ ସହ ରଶ୍ମିତା ଜିଉଁଛନ୍ତି ଏମିତି ଯନ୍ତ୍ରଣା ଜର୍ଜରିତ ଜୀବନ । ତେବେ ଯୌତୁକ ଦାନବମାନେ ତାଙ୍କ ଦେହରେ ନିଆଁ ଲଗାଇ ଶରୀରର ୬୦ରୁ ୭୦ ଭାଗ ପୋଡ଼ି ଦେଲେ ସିନା ମନୋବଳକୁ କିନ୍ତୁ ମାରି ପାଲିଲାନେ । ଶରୀରକୁ ବିକୃତ କରିଦେଲେ ସିନା, ରଶ୍ମିତାଙ୍କ ମନକୁ ଅସୁନ୍ଦର କରିପାରିଲେନି... ସ୍ୱପ୍ନକୁ ମାରି ପାରିଲେନି ।
Also Read
ତେଣୁ ଟିକେ ସୁସ୍ଥ ହେଉ ହେଉ ଆଇଏସ ସ୍ୱପ୍ନ ପୂରା ପାଇଁ ସେଇ ହସ୍ପିଟାଲ୍ ବେଡରୁ ଅହରହ ପଢାରେ ବ୍ୟସ୍ତ ଅଛନ୍ତି ରଶ୍ମିତା । ନିଜେ ଲେଖି ପାରୁ ନଥିଲେ ବି ଗତ ମେ ମାସରେ ହୋଇଥିବା UPSC ପ୍ରିଲମ୍ ପରୀକ୍ଷା ଦେଇଛନ୍ତି । ଅଳ୍ପ କେଇଟା ମାର୍କ ସକାଶେ ପ୍ରିଲିମ୍ କ୍ଲିୟର କରି ପାରି ନାହାନ୍ତି ସିନା ଆଶା ରଖିଛନ୍ତି ଆରଥରକୁ ସେ ପୁଣି ପରୀକ୍ଷା ଦେବେ, ସେତେବେଳେ ନିଜ ହାତରେ ନିଜେ ଲେଖିବେ ।
ରଶ୍ମିତାଙ୍କ ବାପାଙ୍କ ଅଭିଯୋଗ ଅନୁସାରେ ଶ୍ୱଶୁର ଘର ଲୋକେ ଗତବର୍ଷ ଅକ୍ଟୋବର ୨୮ରେ କିରୋସିନ୍ ପକାଇ ତାଙ୍କ ଝିଅକୁ ପୋଡି ମାରିଦେବାକୁ ଉଦ୍ୟମ କରିଥିଲେ । ଯେଉଁଥି ପାଇଁ ଆଜି ରଶ୍ମିତାଙ୍କ ଜୀବନ, ଯନ୍ତ୍ରଣାରେ ପରିଣତ ହୋଇଯାଇଛି । ତଥାପି ରଶ୍ମିତାଙ୍କ ଜିଦ୍, ଯେଉଁ ଯୌତୁକ ପାଇଁ ତାଙ୍କୁ ଏତେ ଦଶା ଭୋଗିବାକୁ ପଡ଼ିଛି, ଆଇଏଏସ୍ ହେଲା ପରେ ସମାଜରୁ ଏ କୁତ୍ସିତ ପ୍ରଥା ପଦଳାଇବାକୁ ସେ ପ୍ରୟାସ ଜାରି ରଖିବେ । ସେପଟେ ଯୌତୁକ ଜୁଇରେ ରଶ୍ମିତାଙ୍କୁ ପୋଡ଼ି ମାରିବା ଉଦ୍ୟମ ଅଭିଯୋଗରେ ଏବେ ବି ସ୍ୱାମୀ ରାମଚନ୍ଦ୍ର ପାଢ଼ୀ ଜେଲରେ ଥିବା ବେଲେ, ଦେଢଶୁର ଗିରିଧାରୀ ଏବେ ବେଲରେ ଅଛନ୍ତି ।