ପ୍ରଶାସନ ଶୁଣିଲାନି, ଚାନ୍ଦା ଆଦାୟ କରି କେନାଲ ସଫା କଲେ ଗାଁ ଲୋକେ

ନିଜ ଗାଁ କେନାଲ ନିଜେ ସଫା କଲେ ଗ୍ରମାବାସୀ । ପ୍ରଶାସନକୁ ବାରମ୍ବାର କହିବା ପରେ ମଧ୍ୟ କିଛି ଫଳ ନ ମିଳିବାରୁ ନିଜ ଉଦ୍ୟମରେ କେନାଲ ସଫା କଲେ ଗାଁ ଲୋକେ । ମାଲକାନଗିରି ଜିଲ୍ଲା କାଲିମେଳା ଚିତ୍ରାଙ୍ଗପାଲ୍ଲୀ ଓ ବଦିଲି ଗ୍ରାମ ପଞ୍ଚାୟତକୁ ସଂଯୋଗ କରିଥିବା ପଟେରୁ ମୁଖ୍ୟ କେନାଲ ପୋତି ହୋଇଥିବାରୁ ସେଥିରେ ପାଣି ଆସୁନଥିଲା ।

ଫଳରେ ଶହ ଶହ ଚାଷୀଙ୍କ ବିଲରେ ଚାଷ ନହୋଇ ପଡ଼ିଆ ପଡ଼ୁଥିଲା । ୫ ଶହ ହେକ୍ଟରରୁ ଅଧିକ ଚାଷ ଜମିରେ ପାଣି ମାଡ଼ି ପାରୁନଥିଲା । ଏକଥା ବାରମ୍ବାର ବିଭାଗୀୟ ଅଧିକାରୀଙ୍କୁ ଜଣାଇଥିଲେ ଗାଁ ଲୋକେ । କିନ୍ତୁ ପ୍ରଶାସନ ତରଫରୁ କେନାଲର ପୁନରୁଦ୍ଧାର ପାଇଁ କୌଣସି ପଦକ୍ଷେପ ନିଆଯାଇନଥିଲା । ଚାଷ ଜମି ଥାଇ ଚାଷ ହୋଇ ପାରୁନଥିଲା ।

ତେଣୁ ୩ଟି ପଞ୍ଚାୟତ ୧୦ଟି ଗାଁର ଲୋକେ ଏକାଠି ହୋଇ ନିଜେ ଏହି କାମ କରିବାକୁ ନିଷ୍ପତ୍ତି ନେଇଥିଲେ । ଶେଷରେ ନିଜେ କୋଡ଼ି କୋଦାଲ ଧରି କେନାଲ ସଫା କରିଛନ୍ତି । ତା ସହିତ ପ୍ରତ୍ୟେକ ପରିବାର ୫ ଶହ ଟଙ୍କା ଲେଖାଏଁ ଚାନ୍ଦା କରି କେନାଲ ସଫେଇ କାମରେ ମେସିନ ଲଗାଇଛନ୍ତି ।

ତେବେ ଏନେଇ ମୁକା କବାସୀ ନାମକ ଜଣେ ଚାଷୀ କହିଛନ୍ତି, ଅଫିସର ମାନଙ୍କୁ ବାରମ୍ବାର କହିଲେ ମଧ୍ୟ ଆମ କଥାକୁ ଗୁରୁତ୍ୱ ଦେଲେ ନାହିଁ । ଆମେ କେତେ ଆଉ ତାଙ୍କ ପାଖକୁ ଦୌଡ଼ି ଥାଆନ୍ତୁ ।  ତେଣୁ ଆମେ ନିଜେ ଏଥିପାଇଁ ଏକ ଯୋଜନା କରିଥିଲୁ । ହଜାରେ, ପାଞ୍ଚ ଶହ ଯାହା ପାଖରେ ଯାହା ଥିଲା ତିନି ପଞ୍ଚାୟତର ଲୋକ ଚାନ୍ଦା ଆଦାୟ କଲୁ । ଏବେ ସେହି ଟଙ୍କା ଖର୍ଚ୍ଚ କରି କାମ ଚାଲିଛି । ଆମେ ବି ନିଜେ କାମ କରୁଛୁ ।