ବାରିପଦା ମେଡିକାଲ କଲେଜ କୋଠାରେ କେମିତି ଲାଗିଲା ନିଆଁ ? କାରଣ ଜାଣିବାକୁ ତଦନ୍ତ ନିଶ୍ଚିତ କହିଲେ ସୁପରିଟେଣ୍ଡେଣ୍ଟ

ଶୁକ୍ରବାର ବାରିପଦା ମେଡିକାଲ କଲେଜ ବିଲିଡିଂରେ ଆକସ୍ମିକ ଅଗ୍ନିକାଣ୍ଡ ଘଟଣା । ପୁଣି ରାଜ୍ୟର ମେଡିକାଲ ଗୁଡ଼ିକରେ ଅଗ୍ନି ନିରାପତ୍ତା ବ୍ୟବସ୍ଥାକୁ ନେଇ ପ୍ରଶ୍ନ ଉଠାଇଛି । କାହା ଭୁଲରୁ ନିଆଁ ଲାଗିଲା ତାର ତଦନ୍ତ ହେବ ବୋଲି ସୁପରିଟେଣ୍ଡେଣ୍ଟ । ଆଶ୍ୱାସନା ଦେଇଥିବାବେଳେ ବାରିପଦା ଭଳି ଅନ୍ୟଠି ଯେ ଏଭଳି ଘଟଣାର ପୁନରାବୃତ୍ତି ନଘଟିବ ତାହା କହିବା ମୁସ୍କିଲ । କାରଣ ସବୁଠି ଅଗ୍ନି ସୁରକ୍ଷା ବ୍ୟବସ୍ଥା କେବଳ ଧର୍ମକୁ ଆଖିଠାର ସଦୃଶ ହୋଇଛି ।

ବାରିପଦା ମେଡିକାଲ କଲେଜ ବିଲଡିଂରେ କେମିତି ଲାଗିଲା ନିଆଁ ? ସର୍ଟସର୍କିଟ୍ ନା ମେଣ୍ଟେନାନ୍ସ ବିଭାଗର ବେପରୁଆ ପଣ ? ନା ବିଭାଗ ବିଭାଗ ମଧ୍ୟରେ ସମନ୍ୱୟ ଅଭାବ ? ଶୁକ୍ରବାର ଅପରାହ୍ନରେ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜରେ ଲାଗିଥିବା ନିଆଁକୁ ପ୍ରାୟ ୩ ଘଣ୍ଟାର କସରତ ପରେ ଲିଭାଯିବା ପରଠୁ ସମସ୍ତଙ୍କ ମନକୁ ଆନ୍ଦୋଳିତ କରିଛି ଏଭଳି କିଛି ପ୍ରଶ୍ନ ।

ଗୋଟିଏ ପଟେ ତୃତୀୟ ମହଲାରେ ଥିବା ପ୍ରସୂତି ବିଭାଗ ଓଟିର ଯନ୍ତ୍ରାଂଶରୁ ନିଆଁ ବାହାରି ତତ୍‌କ୍ଷଣାତ୍‌ ବ୍ୟାପି ବା ପଛର କାରଣ ବିଦ୍ୟୁତ ସଟ୍ ସର୍କିଟ ବୋଲି ଅଗ୍ନିଶମ ବିଭାଗ କହୁଛି, ତ ଅନ୍ୟପଟେ ବିଭାଗ ବିଭାଗ ମଧ୍ୟରେ ସମନ୍ୱୟର ଅଭାବ ଓ ବିଦ୍ୟୁତ୍ ମଣ୍ଟେନାନ୍ସ ଦାୟିତ୍ୱରେ ଥିବା କର୍ମଚାରୀଙ୍କ ଅବହେଳାକୁ ସିଧସସଖଳ ରୋଗୀଙ୍କ ସମ୍ପର୍କୀୟ ଓ ସ୍ଥାନୀୟ ବୁଦ୍ଧିଜୀବୀ ଦାୟୀ କରିଛନ୍ତି । ଏମିତିକି ଅଗ୍ନିକାଣ୍ଡ ସମୟରେ ବିଦ୍ୟୁତ୍ କି ୱାଟର ସପ୍ଲାଇ ଦାୟିତ୍ୱରେ ଥିବା କର୍ମଚାରୀ କାହାକୁ ବି ଦେଖିବାକୁ ମିଳିନଥିବାବେଳେ ଅଗ୍ନି ପ୍ରସ୍ଥାନ ଦ୍ୱାର ଖୋଲିବାକୁ କେହି ନଆସିବାରୁ ଏମିତି ଢଙ୍ଗରେ ତାଲା ଭଙ୍ଗା ଯାଇଥିଲା।

ସେପଟେ ମେଡିକାଲ ସୁପରିଟେଣ୍ଡେଣ୍ଟଙ୍କ ସୂଚନା ଅନୁସାରେ- ଅଗ୍ନିକାଣ୍ଡରେ ପ୍ରସୂତି ବିଭାଗ ଓଟିରେ କୋଟିଏରୁ ଅଧିକ ଟଙ୍କାର ଯନ୍ତ୍ରପାତି ଜଳିଯାଇଛି। ନିଆଁ କେମିତି ଲାଗିଲା, ସେନେଇ ଇନକ୍ୱାରି ଆରମ୍ଭ ହୋଇଛି ।

ବାରିପଦା ମେଡିକାଲ କଲେଜ ଅଗ୍ନିକାଣ୍ଡ ଘଟଣା ପରେ କେମିତି ଅଛି ଅନ୍ୟଠି ଅଗ୍ନି ପ୍ରତିରୋଧକ ବ୍ୟବସ୍ଥା । ଜାଣିବାକୁ ପହଞ୍ଚିଥିଲୁ କୋରାପୁଟର ସହିଦ ଲକ୍ଷ୍ମଣ ନାୟକ ମେଡିକାଲ କଲେଜର ମାତୃ-ଶିଶୁ ବିଭାଗରେ । ଏଠି ୱାଟର ସ୍ପେୟର ପାଇପ ଲାଗିଛି, ଫାୟାର ଏକ୍ସଟିଗ୍ୟୁଂଇସର ବି ବସିଛି । ହେଲେ ସିଲିଣ୍ଡର କେବେ ଲାଗିଛି ? ଏହାର ରିଫିଲିଂ ଡେଟ୍ କେତେ ତାରିଖ ? ସେ ନେଇ କିନ୍ତୁ କିଛି ତଥ୍ୟ ନାହିଁ । ସେହିପରି ଆଉ ଏକ ସିଲିଣ୍ଡରରେ ୨୦୧୯ ମସିହାରୁ ଗ୍ୟାସ୍ ରିଫିଲିଂ ଡେଟ୍ ଗଲାଣି, ହେଲେ କାହାରିକୁ ଦେଖା ଯାଉନି ।

ସେମିତି ମେଡିକାଲର କୌଣସି କର୍ମଚାରୀଙ୍କୁ ନ୍ୟୁନତମ ନିଆଁ ଲିଭା କୌଶଳ ଶିକ୍ଷା ବି ଦିଆଯାଇନି । ତେଣୁ ଏଭଳି ସ୍ଥିତିରେ ରୋଗୀଙ୍କ ଜୀବନ ସହ ଖେଳାଯିବାଠୁ କୌଣସି ଗୁଣରେ କମ୍ ବ୍ୟବସ୍ଥା ହୋଇନି ବୋଲି ରୋଗୀଙ୍କ ସଂପର୍କୀୟ ଓ ସାମାଜିକ କର୍ମୀ ଅକ୍ଷେପ କରୁଥିବାବେଳେ ମେଡିକାଲ ସୁପରିଟେଣ୍ଡେଣ୍ଟ କହିଛନ୍ତି ମେଡିକାଲର ଅଗ୍ନି ନିରାପତ୍ତା ସଂପର୍କିତ ଫାଇଲ୍ ସେ ମଗାଇଛନ୍ତି ଓ ଏ ନେଇ ଯାହା କିଛି ତ୍ରୁଟି ବିଚ୍ୟୁତି ରହିଥିବ ତାର ଶୀଘ୍ର ସମାଧାନ କରିବାକୁ ଚେଷ୍ଟା କରିବେ ।

ମେଡିକାଲ ଗୁଡ଼ିକରେ ଅଗ୍ନି ନିରାପତ୍ତା ପାଇଁ ମୁଖ୍ୟତଃ ଫାୟାର ସେଫଟି ଷ୍ଟାଣ୍ଡାର୍ଡ ଚେକିଂ, ମନିଟରିଂ ଓ ସୁପରିଭିଜନ ନିହାତି ଦରକାର । ତାସହ ଏନେଇ କର୍ମଚାରୀଙ୍କୁ ସଠିକ୍ ଟ୍ରେନିଂ, ଫାୟାର ଏଷ୍ଟିଗ୍ୟୁଇଜର ଗୁଡ଼ିକର ଉପଯୁକ୍ତ ରକ୍ଷଣାବେକ୍ଷଣ ଓ ନିୟମିତ ରିଫିଲିଂ କରାଯିବା ଉଚିତ୍ । ଏଥିପ୍ରତି ଗୁରୁତ୍ୱ ଦିଆଯିବା ସହ ରାଜ୍ୟର ଯେଉଁ ସବୁ ସରକାରୀ ଓ ବେସରକାରୀ ହସ୍ପିଟାଲ ଫାୟାର ସେଫଟି ଲାଇସେନ୍ସ ନେଇ ନାହାନ୍ତି, ସେମାନେ ତୁରନ୍ତ ଆବେଦନ କରିବାକୁ ପରାମର୍ଶ ଦେଇଛନ୍ତି ଅଗ୍ନିଶମ ବିଭାଗ ଡିଆଇଜି ।