'ରେଞ୍ଜର ବାବୁ ହାତୀ ଆମ ଘର ଭାଙ୍ଗିଦେଲା, ମୁଁ ତୁମ ଅଫିସ୍‌ରେ ରହିବି'

ହାତୀ ଘର ଭାଙ୍ଗିଲା । ରେଞ୍ଜରଙ୍କ ଅଫିସ୍‌ରେ ବସି କ୍ଷତିଗ୍ରସ୍ତ କହିଲେ, 'ଘର ଦିଅ ନହେଲେ ଆମେ ଏଇଠି ରହିବୁ' । ଅଫିସ୍‌ ସାମ୍ନାରେ କାଟିଲେ ୧୨ ଘଂଟା । ହାତୀ ଘର ଭାଙ୍ଗି ସବୁ ଜିନିଷପତ୍ରକୁ ପୂରା ଖିନଭିନ କରିଦେଇଛି । କାନ୍ଥ ଭାଙ୍ଗି ମାଟିରେ ମିଶିଛି ଆଉ ଆଜବେଷ୍ଟସ୍‌ ତଳେ ପଡ଼ିଛି । ଖାଲି ଏତିକି ନୁହେଁ ବରଂ ଚୁଲି ଭାଙ୍ଗିଛି ଆଉ ଚାଉଳ ବିଛାଡ଼ି ହୋଇ ପଡ଼ିଛି । ଆଉ ଘର ଭାଙ୍ଗିଯିବା ପରେ ବର୍ଷାରେ କୋଉଠି ରହିବେ, ସେଇ ଚିନ୍ତାରେ ବାହାରେ ମୁଣ୍ଡରେ ହାତ ଦେଇ ବସିଛନ୍ତି ପୂରା ପରିବାର ।

ରାତି ପ୍ରାୟ ୧ଟା ବେଳେ ଖାଇପିଇ ସମସ୍ତେ ଅଚିନ୍ତା ନିଦରେ ଶୋଇଥିଲେ । ହେଲେ ହଠାତ୍‌ ଗାଁ ଭିତରକୁ ପଶିଆସିଥିଲା ଦନ୍ତା ହାତୀ । ଆଉ ରବିପାତ୍ରଙ୍କ ଘରକୁ ଭାଙ୍ଗି ମାଟିରେ ମିଶାଇ ଦେଇଥିଲା ଦନ୍ତା । ଅଧ ରାତିରେ ରବି କଣ କରିବେ, ସେନେଇ କିଛି ମୁଣ୍ଡରେ ପଶିନଥିଲା । ଆର୍ଥିକ ଅବସ୍ଥା ଭଲ ନଥିବାରୁ ନୂଆ ଘର କରିବା ତାଙ୍କ ପକ୍ଷରେ ସମ୍ଭବ ବି ନଥିଲା । ସେଥିପାଇଁ ବନାଞ୍ଚଳ କାର୍ଯ୍ୟାଳୟ ସାମ୍ନାରେ ପୂରା ପରିବାର ସହ ବସିରହିଲେ ରବି ।

କେବଳ ରବି ନୁହେଁ ବରଂ ଦୁଇ ବର୍ଷର ଶିଶୁ ଓ ବୁଢା ବାପା ମାଙ୍କ ସହ ସ୍ଵାମୀ ସ୍ତ୍ରୀ ଏମିତି ବନାଚଂଳ କାର୍ଯ୍ୟାଳୟ ସାମ୍ନାରେ ବସିଥିଲେ । ହାତୀ ଘର ଭାଙ୍ଗିଦେଲା ବୋଲି ସହାୟତା ଆଶାରେ ସରକାରୀ ଦପ୍ତର ସାମ୍ନାରେ ବସିଥିଲେ ରବିଙ୍କ ପରିବାର । ହେଲେ ସରକାରୀ ବାବୁ ରବିଙ୍କୁ ସାହାଯ୍ୟ କଣ କରିବେ, ଓଲଟି ତାଙ୍କୁ ଦେଖି ଅଫିସ୍‌ରେ ତାଲା ମାରି ଚମ୍ପଟ ମାରିଥିଲେ ।

ବର୍ଷା ପାଗରେ ପୂରା ରାତି ଅଫିସ ସାମ୍ନାରେ ରବି କଟାଇ ଦେଲେ ସତ କିନ୍ତୁ କିଛି ଲାଭ ମିଳିଲାନି । ଯାହାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ରବି । ତେବେ ହାତୀ ଘର ଭାଙ୍ଗିଲେ କ୍ଷତିଗ୍ରସ୍ତଙ୍କୁ ଅନେକ ପ୍ରକାର ସରକାରୀ ସହାୟତା ମିଳୁଛି । ହେଲେ ରବି କାହିଁକି ଏହାଠାରୁ ବାଦ୍‌ ପଡ଼ିଲେ ତାହାକୁ ନେଇ ଏବେ ଉଠିଛି ପ୍ରଶ୍ନ।

ରିପୋର୍ଟର- ସୁନିଲ କୁମାର ପଣ୍ଡା