LIVE TV
ପରିବେଶ ମଞ୍ଜୁରୀ ନାହିଁ କି ଜମି ଲିଜ୍ ପାଇଁ ଏଗ୍ରିମେଣ୍ଟ ହୋଇନି । ଅଥଚ ଜେଏସଡବ୍ଲୁ ପାଇଁ ଅହେତୁକ ଦରଦ ଦେଖାଇ ଚାଲିଛିନ୍ତି ରାଜ୍ୟ ସରକାର । ପ୍ରସ୍ତାବିତ ଶିଳ୍ପ ପାଇଁ ନିରୀହ ଜନତାଙ୍କ ଉପରେ ଚଳାଇଛନ୍ତି ଜୁଲମ୍ । ଏଭଳି ଅଭିଯୋଗ ଆଣି ରାଜ୍ୟ ସରକାରଙ୍କ ବିରୋଧରେ ବର୍ଷିଛନ୍ତି ଉଭୟ କଂଗ୍ରେସ ଓ ବିଜେପି । ରାଜ୍ୟ କଂଗ୍ରେସ ପ୍ରଭାରୀ ଚେଲ୍ଲା କୁମାର କହିଛନ୍ତି, କେବଳ ହାଇଲେବଲ୍ କ୍ଲିଅରିଂ ଅଥରିଟିର ଅନୁମୋଦନ ଆଧାରରେ ପ୍ରସ୍ତାବିତ ଶିଳ୍ପ ପାଇଁ ବେଆଇନ ଭାବେ ଚାଲିଛି ଅଧିଗ୍ରହଣ ପ୍ରକ୍ରିୟା । ବିଜେପି ବି ସମାନ ଅଭିଯୋଗ ଆଣି ରାଜ୍ୟ ସରକାରଙ୍କୁ ଘେରିଛି । ଏଭଳି ସ୍ଥିତିରେ ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ଅତ୍ୟାବଶ୍ୟକ ସାମଗ୍ରୀ ଦିଆଯାଉନଥିବା ଅଭିଯୋଗ ଆଣି କ୍ଷୋଭ ପ୍ରକାଶ କରିଛନ୍ତି ପୋଲିସ ମାଡ଼ରେ ପୀଡ଼ିତ ବ୍ୟକ୍ତି ।
ରାଜ୍ୟ ସରକାରଙ୍କୁ ଘାରିଛି କି JSW ପ୍ରୀତି ? କାରଣ ଯେଉଁ କମ୍ପାନୀ ପ୍ରତି ଏତେ ଦରଦ, ସେହି କମ୍ପାନୀର ବିଧିଗତ ପ୍ରକ୍ରିୟାକୁ ନେଇ ଉଠିଛି ପ୍ରଶ୍ନ । ଓଡ଼ିଶା କଂଗ୍ରେସ ପ୍ରଭାରୀ ଚେଲ୍ଲା କୁମାରଙ୍କ ଅଭିଯୋଗ, ନା ଜମି ଲିଜ୍ ପାଇଁ ଚୁକ୍ତି ହୋଇଛି, ନା ପରିବେଶ ମଞ୍ଜୁରୀ ମିଳିଛି ଏହି କମ୍ପାନୀକୁ । ଏପରିକି ମହାନଦୀରୁ ପାଣି ଉଠାଣ ପାଇଁ ଚୁଡ଼ାନ୍ତ ଅନୁମତି ବି ମିଳିନି । ଅଥଚ JSWର ପ୍ରସ୍ତାବିତ ଶିଳ୍ପ ପାଇଁ କାହା ପାନବରଜ ଭାଙ୍ଗି ଦିଆଗଲାଣି ତ ଆଉ କାହା ପିଠିରେ ଲାଠିମାଡ଼ କଲାଣି ପୋଲିସ ।
୨୦୧୭, ଜୁନ୍ ୦୨ରେ ହାଇଲେବ୍ଲ କ୍ଲିଅରିଂ ଅଥରିଟିର ୧୭ ତମ ବୈଠକରେ ଜେଏସଡବ୍ଲ୍ୟୁର ୧୦ ନିୟୁତ ମେଟ୍ରିକ ଟନ୍ ଇସ୍ପାତ ପ୍ରକଳ୍ପ ଏବଂ ୯ଶହ ମେଗାଓ୍ୱାଟ ପାଓ୍ୱାର ପ୍ଲାଣ୍ଟ ପାଇଁ ମିଳିଥିଲା ଅନୁମୋଦନ । ଆଉ ସେହି ଅନୁମୋଦନ ବଳରେ କମ୍ପାନୀ ପ୍ରତିଷ୍ଠା ପାଇଁ ଝାଳ ବୁହାଉଛନ୍ତି ରାଜ୍ୟ ସରକାର । ସେହିପରି ଆରଟି୍ରାଇ ତଥ୍ୟରୁ ମିଳିଥିବା ସୂନା ଅନୁଯାୟୀ, ଗତ ୧୩ ତାରିଖରେ ପରିବେଶ ଓ ଜଙ୍ଗଲ ମନ୍ତ୍ରାଳୟର ଚିଠିରେ ସ୍ପଷ୍ଟ ଭାବେ ଲେଖାଯାଇଛି, ଆସନ୍ତା ୨୮ରେ ଜେଏସଡବ୍ଲ୍ୟୁକୁ ପରିବେଶ ମଞ୍ଜୁରୀ ସଂକ୍ରାନ୍ତୀୟ ନିଷ୍ପତ୍ତି ନେଇ ବୈଠକ ବସିବ । ଅର୍ଥାତ ଏଯାଏଁ ମିଳିନି ପରିବେଶ ମଞ୍ଜୁରୀ ।
ଏପରିକି ଜଗତସିଂପୁର ଜିଲ୍ଲା ରାଜସ୍ୱ ବିଭାଗକୁ ଜମିଜମା ସଂକ୍ରାନ୍ତରେ ଇଡକୋ ଅନୁମତି ବି ମାଗିଛି । ନିର୍ଦ୍ଧାରିତ ଫି ଦାଖଲ ନକରିବାରୁ ମହାନଦୀରୁ ଦୈନିକ ୯୯.୮୦ କ୍ୟୁସେକ୍ ଜଳ ଉଠାଣ ପାଇଁ ରାଜ୍ୟ ଜଳ ସମ୍ପଦ ବିଭାଗ ଜେଏସଡବ୍ଲ୍ୟୁକୁ ଚୁଡ଼ାନ୍ତ ଅନୁମତି ବି ଦେଇନି । ଏଭଳି ସ୍ଥିତିରେ କେଉଁ ଉଦ୍ଦେଶ୍ୟରେ ରାଜ୍ୟ ସରକାର ନିରୀହଙ୍କ ଉପରେ ଜୁଲମ୍ କରୁଛନ୍ତି ବୋଲି ପ୍ରଶ୍ନ ଉଠାଇଛନ୍ତି ଚେଲ୍ଲା କୁମାର । ଏତେସବୁ ସତ୍ତ୍ୱେ କାହିଁକି ଜେଏସଡବ୍ଲ୍ୟୁ ସ୍ୱାର୍ଥରେ ରାଜ୍ୟ ସରକାର ? ଏକ ଅଣଓଡ଼ି୍ରା କମ୍ପାନୀ ପ୍ରେମରେ ପଡ଼ି ନିଜ ରାଜ୍ୟବାସୀଙ୍କୁ ନିଜେ କାହିଁକି ଦାଉ ସାଧୁଛନ୍ତି ? ଏଭଳି ନାନା ପ୍ରଶ୍ନ ଉଠାଇ ବିଜେପି ଘେରିଥିବାବେଳେ ଜଳ ସମ୍ପଦ ମନ୍ତ୍ରୀ ଏହାର ଉତ୍ତର ରଖିଛନ୍ତି ।
ସେପଟେ ପୋଲିସ ମାଡ଼ରେ ପୀଡ଼ିତଙ୍କୁ ଔଷଧ ସହ ଖାଦ୍ୟ ସାମଗ୍ରୀ ଯୋଗାଣ ପାଇଁ ହାଇକୋର୍ଟ ଦେଇଥିବା ନିର୍ଦ୍ଦେଶ ବି ପାଳନ ହୋଇନଥିବା ଅଭିଯୋଗ ଉଠିଛି । ଗତ ୬ ଦିନ ତଳେ ଢିଙ୍କିଆବାସୀଙ୍କୁ ଅତ୍ୟାବଶ୍ୟକୀୟ ସାମଗ୍ରୀ ଯୋଗାଇବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ଅଥଚ ଏଯାଏଁ କୌଣସି ଅଧିକାରୀ ପାଖ ମାଡ଼ିନଥିବା ଲୋକେ ଅଭିଯୋଗ କରିଛନ୍ତି । ତେବେ ଏନେଇ ଜଗତସିଂହପୁର ଜିଲ୍ଲାପାଳ କ୍ୟାମେରାସାମ୍ନାରେ କିଛି କହିନଥିଲେ ସରକାରୀ ବ୍ୟବସ୍ଥା ଅନୁଯାୟୀ, ଲୋକଙ୍କୁ ରାସନ ସାମଗ୍ରୀ ଦିଆଯାଉଥିବା ସୂଚନା ଦେଇଛନ୍ତି ।
ଜଗତସିଂପୁରରୁ ଶଶାଙ୍କ ଶେଖର ପଣ୍ଡାଙ୍କ ସହ ପାରାଦୀପରୁ ରମାକାନ୍ତ ନାୟକଙ୍କ ରିପୋର୍ଟ
