ବି-ଟେକ୍ କରି ବି ଚାକିରି ନାହିଁ; ଅନେକ ଦିନ ହେଲା ଭୋକରେ ଅଛନ୍ତି ଯୁବକ

କରୋନା ପରଠାରୁ, ଲୋକମାନେ ଚାକିରି ପାଇବାରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ଯୋଗ୍ୟ ପ୍ରାର୍ଥୀ ବର୍ଷ ବର୍ଷ ଧରି ବେକାର ହୋଇ ବୁଲୁଛନ୍ତି। ଅନେକ ଶିକ୍ଷିତ ଯୁବକ ବାଧ୍ୟ ହୋଇ ଡେଲିଭରୀ ବୟ ଭାବରେ କାମ କରୁଛନ୍ତି। ଏଭଳି ଜଣେ ୩୦ ବର୍ଷର ବେକାର ଯୁବକଙ୍କ କାହାଣୀ ଭାଇରାଲ ହେବାରେ ଲାଗିଛି।

ଜାମ୍ମୁ ନିବାସୀ ୩୦ ବର୍ଷର ସାହିଲ ସିଂହ ଜଣେ ସ୍ୱିଗି ଏଜେଣ୍ଟ। ସେ ଘର ଘର ବୁଲି ଫୁଡ୍ ଡେଲିଭରୀ କରନ୍ତି। ସେ କିନ୍ତୁ ନିଜେ ଅନେକ ଦିନ ହେଲା ଭୋକରେ ଅଛନ୍ତି। ଖାଦ୍ୟ କିଣିବାକୁ ଓ ତାଙ୍କ ୟୁଲୁ ବାଇକ୍ ରିଚାର୍ଜ କରିବାକୁ ମଧ୍ୟ ତାଙ୍କ ପାଖରେ ଟଙ୍କା ନାହିଁ। ସେ ବି.ଟେକ୍ ପାସ୍ କରିଛନ୍ତି ସତ କିନ୍ତୁ ତାଙ୍କର ଏହି ଯୋଗ୍ୟତା ତାଙ୍କୁ କୌଣସି ଚାକିରି ଦେବାରେ ସକ୍ଷମ ହୋଇ ନାହିଁ। କିନ୍ତୁ ତାଙ୍କର ଗୋଟିଏ ଡେଲିଭରୀ ତାଙ୍କ ଭାଗ୍ୟ ବଦଳାଇ ଦେଇଛି।

ସ୍ୱିଗି ଏଜେଣ୍ଟ ସାହିଲ ଜଣେ ମାର୍କେଟିଂ ମ୍ୟାନେଜର ପ୍ରିୟାଂଶୀ ଚାନ୍ଦେଲଙ୍କ ଘରେ ଆଇସକ୍ରିମ ବିତରଣ କରିବାକୁ ଯାଇଥିଲେ। କିନ୍ତୁ ତାଙ୍କ ପାଖରେ ପହଞ୍ଚିବାରେ ୩୦-୪୦ ମିନିଟ୍ ବିଳମ୍ବ ହୋଇଥିଲା। ଯେତେବେଳେ ପ୍ରିୟାଂଶୀ ବିଳମ୍ବ ହେବାର କାରଣ ପଚାରିଥିଲେ, ସାହିଲ କହିଥିଲେ ଯେ ସେ ୩ କିଲୋମିଟର ଚାଲି ଚାଲି ଆସିଛନ୍ତି। ଏହା ପରେ ସେ ନିଜ ଜୀବନର ପ୍ରତ୍ୟେକ ପୃଷ୍ଠାକୁ ଏକ ଖୋଲା ପୁସ୍ତକ ପରି ପ୍ରିୟାଂଶୀଙ୍କ ସାମ୍ନାରେ ରଖିଥିଲେ।

ବି-ଟେକ୍ କରି ବେରୋଜଗାର:

ସାହିଲ ସିଂହ ମେୱାର ବିଶ୍ୱବିଦ୍ୟାଳୟରୁ ଇଲେକ୍ଟ୍ରିକାଲ୍ ଆଣ୍ଡ୍ କମ୍ୟୁନିକେଶନ ଇଞ୍ଜିନିୟରିଂରେ ବି.ଟେକ୍ କରିଛନ୍ତି। ଏଥିରେ ସେ ୬୪ ପ୍ରତିଶତ ମାର୍କ ପାଇଥିଲେ। ସେ କମ୍ପ୍ୟୁଟର ଆକାଉଣ୍ଟିଂ ଏବଂ କମ୍ପ୍ୟୁଟର ସଫ୍ଟୱେୟାରରେ ଡିପ୍ଲୋମା ପାଠ୍ୟକ୍ରମ ମଧ୍ୟ କରିଛନ୍ତି। ସେ Byju’s ଏବଂ ନିଞ୍ଜାକାର୍ଟରେ ମଧ୍ୟ କାମ କରିଛନ୍ତି। କିନ୍ତୁ ୨୦୨୦ରେ କୋଭିଡ୍‌ ସମୟରେ ତାଙ୍କୁ ତାଙ୍କ ଜମ୍ମୁକୁ ଫେରିବାକୁ ପଡିଥିଲା।

ଋଣରେ ବୁଡିଛନ୍ତି ସାହିଲ୍:

ସାହିଲ ଆହୁରି କହିଛନ୍ତି ଯେ ଘରୁ ଫେରିବା ପରେ ତାଙ୍କୁ ଆଉ କୋଉଠି ଚାକିରି ମିଳିଲା ନାହିଁ। ତାଙ୍କର ଫ୍ଲାଟ୍‌ମେଟ୍‌ ମଧ୍ୟ ତାଙ୍କ ଅବଶିଷ୍ଟ ଟଙ୍କା ନେଇଥିଲେ। ଏହି କାରଣରୁ, ସେ ତାଙ୍କର ୟୁଲୁ ବାଇକ୍ ଚାର୍ଜ କରିପାରିନଥିଲେ ଏବଂ କୌଣସି ପ୍ରକାରେ ପାଦରେ ଚାଲି ଚାଲି ବିତରଣ କରୁଛନ୍ତି। ସେ କିଛି ଟଙ୍କା ମଧ୍ୟ ଧାର କରିଛନ୍ତି। ସେ ପ୍ରତ୍ୟେକ ବିତରଣ ପାଇଁ ୨୦-୨୫ ଟଙ୍କା ପାଆନ୍ତି। ସେ ଏକ ସପ୍ତାହ ହେଲା କେବଳ ଚା’ ଏବଂ ପାଣିରେ ବଞ୍ଚି ରହିଛନ୍ତି।

ଦିନେ ୨୫ ହଜାର ଥିଲା ଦରମା:

କୋଭିଡ ପୂର୍ବରୁ ଯେଉଁଠାରେ ସାହିଲ ସିଂହ କାମ କରୁଥିଲେ, ସେଠାରୁ ସେ ୨୫ ହଜାର ଟଙ୍କା ପାଉଥିଲେ। ତାଙ୍କ ବାପାମାଆ ବୃଦ୍ଧ ହୋଇଯାଇଥିବାରୁ ସେ ତାଙ୍କର ବେକାରୀ ସହିତ ସେମାନଙ୍କୁ ବିଚଳିତ କରିବାକୁ ଚାହାଁନ୍ତି ନାହିଁ। ଚାକିରି ଖୋଜିବା ପାଇଁ ସେ ପ୍ରିୟାଂଶୀ ଚାନ୍ଦେଲଙ୍କୁ କହିଥିଲେ। ପ୍ରିୟାଂଶୀ ଲିଙ୍କ୍‌ଡଇନ୍‌ରେ ତାଙ୍କର ସମ୍ପୂର୍ଣ୍ଣ କାହାଣୀ ଏବଂ ମାର୍କସିଟ୍ ଅପଲୋଡ୍ କରିଦେଲେ।

ଇଣ୍ଟରନେଟ୍‌ର ଶକ୍ତି:

ଗୋଟିଏ ପୋଷ୍ଟ୍‌ ତାଙ୍କ ଭାଗ୍ୟକୁ ବଦଳେଇଦେଲା। ମାସ ମାସ ଧରି ଅସୁବିଧାରେ ଥିବା ସାହିଲ ସିଂହଙ୍କୁ ମିଳିଗଲା ଚାକିରି। ଲିଙ୍କ୍‌ଡଇନ୍ ପୋଷ୍ଟ୍‌ ଦେଖି କିଛି ଲୋକ ତାଙ୍କର ୟୁଲୁ ବାଇକ୍‌କୁ ଚାର୍ଜ କରିଦେଲେ, କେହି କେହି ଫୁଡ୍ ଡେଲିଭରୀ ଅର୍ଡର ଦେଲେ ଉ ଆଉ କେହି ଚାକିରି ପ୍ରଦାନ କଲେ।

OTV is now on Whatsapp

Join and get latest news update delivered to you via whatsapp

Join Now