LIVE TV
ଭୁବନେଶ୍ୱର ସ୍ଥିତ ଝାରପଡ଼ାରେ ଥିବା ଗଣେଶ ମଣ୍ଡପ ହାଟ ଭଙ୍ଗାକୁ ନେଇ ଉତ୍ତେଜନା ପ୍ରକାଶ ପାଇଛି। ବିନା ନୋଟିସରେ ଉଚ୍ଛେଦ କରାଯାଉଥିବାରୁ ବ୍ୟବସାୟୀମାନେ ଏହାକୁ ବିରୋଧ କରିଛନ୍ତି। କାଲି ରାତି ୯ଟାରେ ସୂଚନା ଦେଇ ସକାଳୁ ଉଚ୍ଛେଦ ହେଉଥିବାରୁ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସ୍ଥାନୀୟ ଅଞ୍ଚଳରେ ବିଜେପି କର୍ପୋରେଟର ଜିତିଥିବାରୁ ବିଜେଡି ଆକ୍ରୋଶ ମୂଳକ ଭାବେ ଏପରି କରୁଥିବା ଅଭିଯୋଗ ହୋଇଛି।
ଘଟଣା ସଂପର୍କରେ ଖବର ପାଇ ଗତ ପୌର ନିର୍ବାଚନରେ ବିଜେପିର ମେୟର ପ୍ରାର୍ଥୀ ହୋଇଥିବା ଡକ୍ଟର ସୁନୀତି ମୁଣ୍ଡ, ବରିଷ୍ଠ ବିଜେପି ନେତା ବାବୁ ସିଂହ ଓ ଜଗନ୍ନାଥ ପ୍ରଧାନ ପ୍ରମୁଖ ପହଞ୍ଚିଥିଲେ । ସେମାନେ ଏହାକୁ ରାଜନୈତିକ ଆକ୍ରୋଶ ବୋଲି ଅଭିଯୋଗ କରିଛନ୍ତି । ଯେହେତୁ ସେହି ୱାର୍ଡରେ ବିଜେପିର କର୍ପୋରେଟର୍ ପ୍ରାର୍ଥୀ ବିଜୟୀ ହୋଇଛନ୍ତି, ତେଣୁ ବିଜେଡି ଜାଣିଶୁଣି ଝାରପଡ଼ା ଗଣେଶ ମଣ୍ଡପ ହାଟ ଉଚ୍ଛେଦ କରାଉଛି ବୋଲି କହିଛନ୍ତି ।
Also Read
ଏନେଇ ଭୁବନେଶ୍ୱର ବିଜେପି ମେୟର ପ୍ରାର୍ଥୀ ସୁନୀତି ମୁଣ୍ତ୍ ମଧ୍ୟ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ‘ଏହା ଏକ ରାଜନୈତିକ ଆକ୍ରୋଷ। କାଲି ରାତି ୮ ଟାରେ ମାଇକ୍ରେ ଉଚ୍ଛେଦ ନେଇ କୁହାଯାଇଥିଲା, କିନ୍ତୁ ଏନେଇ କୌଣସି ନୋଟିସ ଜାରି କରାଯାଇନାହିଁ । ଲୋକମାନେ ନିଜ ଦୋକାନର ଜିନିଷ ମଧ୍ୟ ଖାଲି କରିନାହାନ୍ତି । ସକାଳ ୪ଟାରୁ ପୋଲିସ ଆସି ଭଙ୍ଗାରୁଜା ଜାରି ରଖିଛନ୍ତି’ ।
ସେ ବିଏମ୍ସିକୁ ପ୍ରଶ୍ନ କରିବା ସହ ମେୟର ସୁଲୋଚନାଙ୍କୁ ମଧ୍ୟ ପ୍ରଶ୍ନ କରିଛନ୍ତି କି, ‘ଆପଣ ମେୟର ହେବା ପରେ ଏ କି କାଣ୍ତ ଘଟାଉଛନ୍ତି । ଆପଣ କଣ ଲୋକଙ୍କ ସୁରକ୍ଷା ଏହିପରି ଭାବେ କରୁଛନ୍ତି । ଲୋକଙ୍କ ଥଇଥାନ କଣ ଏପରି କରୁଛନ୍ତି । ଲୋକଙ୍କୁ ରୋଜଗାର ଦେବା ବଦଳରେ ଲୋକଙ୍କ ପେଟକୁ ଗୋଇଠା ମାରୁଛନ୍ତି’ ।
ଏହାରି ମଧ୍ୟରେ ଜଣେ ମହିଳା ବ୍ୟବସାୟୀ କହିଛନ୍ତି ଯେ, ‘ଆମର ଆଉ କିଛି ନାହିଁ, ସବୁ ମାଟିରେ ମିଶି ଯାଇଛି। କ’ଣ କରିବୁ, କେମିତି ପରିବାର ଚଳାଇବୁ କିଛି ବୁଝି ପାରୁନୁ। ମୋର ଗୋଟେ ଛୋଟ କଅଁଳା ଛୁଆ, ମୁଁ ତାକୁ ନେଇ କଣ କରିବି’ ।
ସେ ଆହୁରି କହିଛନ୍ତି ଯେ, ‘ଏ ହାଟ କାହାର କଣ ଅସୁବିଧା କରୁଥିଲା ଯେ ତାକୁ ଭାଙ୍ଗି ଦେଲେ। ଏଠି ୫ ବର୍ଷ ପୂର୍ବେ ଗୋଟେ ପୋଖରୀ ଥିଲା, ଯାହାକୁ ପୋତି ଦୋକାନ କରି ପେଟପୋଷଣା କରୁଥିଲେ । ଆମେ ସ୍ୱାମୀ ସ୍ତ୍ରୀ ଚୁଡ଼ି ଦୋକାନ କରି ସେଥିରେ ଯାହା ରୋଜଗାର କରୁଥିଲୁ, ସେଥିରେ ଚଳୁଥିଲୁ । ଏବେ ଆମେ କଣ କରିବୁ। କାଲି ଆସି ମାଇକ୍ରେ କଣ କହିଦେଇ ଗଲେ, ଆମେ ଜିନିଷ କାଢିନୁ ଆସି ଭାଙ୍ଗି ଦେଲେ । ଦୋକାନରେ ୫ ଲକ୍ଷ ଟଙ୍କାର ଜିନିଷ ଥିଲା, ଏବେ ମୁଁ କଣ କରିବି’ ।
