କୋଭିଡ ନିୟମର ଧଜିଆ ଉଡାଇଲେ ସରପଞ୍ଚ : ପୁଅ ବାହାଘରରେ ବାଜିଲା ଡିଜେ, ଚାଲିଲା ରଙ୍ଗୀନ ନୃତ୍ୟ

କରୋନା କଟକଣାର ଧଜିଆ ଉଡ଼ିଲା । ପୁଅ ବାହାଘରରେ ଭାଇରସ୍‌ର ଭୟାବହତାକୁ ଭୁଲିଗଲେ ସରପଞ୍ଚ । ଶହ ଶହ ଲୋକଙ୍କୁ ନେଇ ବାହାରିଲା ପରଯାତ୍ରୀ । ଡିଜେ ବାଦ୍ୟର ତାଳେ ତାଳେ ଚାଲିଲା ରଂଗୀନ ନୃତ୍ୟ । ଡିଜେ ଗାଡି ଉପରେ ଯୁବତୀ ନାଚ ଚାଲି ଥିବାବେଳେ ପଛେ ପଛେ ନାଚୁଥିଲେ ବରଯାତ୍ରୀ । କରୋନା ସମୟରେ ବାହାଘରରେ ଡିଜେ ବଜାଇବା ପାଇଁ ଅନୁମତି ନଥିବାବେଳେ କମ ସଂଖ୍ୟକ ଲୋକଙ୍କୁ ନେଇ ବାହାଘର କରିବାକୁ କୋଭିଡ ନିୟମ ଜାରି କରିଛନ୍ତି ସରକାର । ହେଲେ ଏଠି ଖୋଲାଖୋଲି କୋଭିଡ ନିୟମର ଉଲ୍ଲଂଘନ ହୋଇଛି।

ବୌଦ୍ଧ ଜିଲ୍ଲା କଂଟାମାଳ ବ୍ଲକ ଉମା ପଂଚାୟତରେ ଏପରି ଘଟଣା ଘଟିଛି । ସରପଞ୍ଚ ଯଜ୍ଞେଶ୍ୱରୀ ରଣାଙ୍କ ପୁଅ ବାହାଘରରେ କରୋନା ନିୟମକୁ ଫୁ କରି ଉଡ଼େଇ ଦେଇଛନ୍ତି ପରିବାର ଲୋକେ। ସରପଂଚ ନିଜର ପତିଆରା ଯାହିର କରିବାକୁ ଯାଇ କୋଭିଡ ନିୟମକୁ ଏଭଳି ଖୋଲାଖୋଲି ଉଲଂଘନ କରିଥିବା ଦେଖିବାକୁ ମିଳିଥିଲା । ଗାଁ ଦାଣ୍ଡକୁ ସଂପୁର୍ଣ୍ଣ ଅବରୋଧ କରି ଚାଲିଥିଲା ରଂଗୀନ ନୃତ୍ୟ ଓ ବାହାଘର । ଫଳର ସେହି ଗାଁ ଦେଇ ଯାଉଥିବା ଅନେକ ଲୋକ ଦୀର୍ଘ ସମୟ ଧରି ରାସ୍ତାର ଉଭୟ ପଟରେ ଅଟକି ଯାଇଥିଲେ । ହେଲେ ସେସବୁକୁ ଖାତିର ନକରି ପୁଅ ବାହାଘରରେ ମସଗୁଲ ଥିଲେ ନିଜେ ସରପଂଚ । ଉମା ପଂଚାୟତରେ ଏହା କିଛି ନୁଆଁ ଘଟଣା ନୁହେଁ । ଗତବର୍ଷ ମଧ୍ୟ କୋଭିଡ କଟକଣା ସମୟରେ ଉମା ଗାଁରେ ଶହ ଶହ ଲୋକ ଏକାଠି ହୋଇ ଏକ ପୋଖରୀରୁ ମାଛ ମାରୁଥିବା ଦୃଶ୍ୟ ବେଶ ଭାଇରାଲ ହୋଇଥିଲା ।

ଘଟଣାକୁ ନେଇ ପ୍ରଶାସନିକ ଅଧିକାରୀ ଉମା ଗାଁକୁ ଯାଇ ତଦନ୍ତ ମଧ୍ୟ କରିଥିଲେ । ହେଲେ ଏଠି ନିଜେ ଯଦି ସରପଂଚ କୋଭିଡ ଗାଇଡଲାଇନକୁ ଉଲ୍ଲଂଘନ କରିବେ ତାହେଲେ କହିବା କାହାକୁ । ଏବେ ପ୍ରଶ୍ନଉଠୁଛି କୋଭିଡ ସମୟର ଏହି ବାହାଘର ପୁର୍ବରୁ ସରପଞ୍ଚ କାହା ପାଖରୁ ଅନୁମତି ନେଇଥିଲେ । ଏଭଳି ସମୟରେ ଡିଜେ ବଜାଇବାର ଅନୁମତି ତାଙ୍କୁ କିଏ ପ୍ରଦାନ କରିଥିଲା । ଏସବୁ ଖବର ଜଣାପଡିବା ପରେ ପ୍ରଶାସନ ପକ୍ଷରୁ ସରପଂଚଙ୍କ ବିରୁଦ୍ଧରେ କଣ ନିଆଯାଉଛି କାର୍ଯ୍ୟାନୁଷ୍ଠାନ ତା ଉପରେ ସମସ୍ତଙ୍କ ନଜର ।

ରବିନ୍ଦ୍ର ହୋତାଙ୍କ ରିପୋର୍ଟ