LIVE TV
ପୋଲିସ ନାଁ ଶୁଣିଲେ ସାଧାରଣତଃ ଲୋକଙ୍କ ମନରେ ଭୟ ସୃଷ୍ଟି ହୋଇଥାଏ । ଛୋଟ ଛୋଟ ପିଲାଙ୍କୁ ପୋଲିସ ନାଁରେ ହିଁ ଡରାଇ ଥାଆନ୍ତି । କିନ୍ତୁ ପୋଲିସ ଏବେ ଏଭଳି ପଦକ୍ଷେପ ନେଉଛି ଯେଉଁଠି ପିଲାଙ୍କ ମନରେ ସେମାନଙ୍କ ପ୍ରତି ଥିବା ଭୟ ଦୂର ହେବା ସହ ଥାନା କଥା ଶୁଣିବାବେଳେ ଏକ ଆନନ୍ଦଦାୟକ ଚିତ୍ର ମନକୁ ଆସିବ । ନବରଙ୍ଗପୁର ଜିଲ୍ଲା ପ୍ରଶାସନ ଏବେ ଥାନା ପରିସରରରେ ଏମିତି କିଛି ପରିବେଶ ସୃଷ୍ଟି କରିଛନ୍ତି, ଯେଉଁଠିକ ଛୋଟ ପିଲା ବାରମ୍ବାର ଯିବାକୁ ମନ ବଳାଇବେ ।
ଥାନା ଭିତରେ କେଉଁଠି ଛୋଟ ଛୋଟ ପିଲାଙ୍କ ପାଇଁ ଲୁଡୁ ଖେଳିବାର ବ୍ୟବସ୍ଥା ହୋଇଛି । କୁନି କୁନି ଆଙ୍ଗୁଳି ଚେସ ବୋର୍ଡରେ ଗୋଟି ଚାଳନାର କରିବାର ଦୃଶ୍ୟ ମଧ୍ୟ ଦେଖିବାକୁ ମିଳୁଛି । ସେହିପରି ରୁବିକ୍ସ କ୍ୟୁବରେ କିଏ ନିଜ IQ ପରୀକ୍ଷା ଚଳାଇଛି, ପୁଣି ଆଉ କେହି ସାଇକଲିଂର ମଜା ନେଉଛି । ନିଜ ଶିଶୁ ସୁଲଭ ଅନ୍ଦାଜରେ ଛୋଟ ପିଲାଙ୍କ ପାଇଁ ମସ୍ତିର ମାହୋଲ ସତରେ ଖୁବ ନିଆରା ।
ଛୋଟ ପିଲାଙ୍କ ମଧ୍ୟରେ ପୋଲିସ ପ୍ରତି ଭୟ ଦୂର କରିବା ସହ ସେମାନଙ୍କ ପାଇଁ ପୋଲିସ ପ୍ରତି ଏକ ବନ୍ଧୁତ୍ୱର ବାତାବରଣ ଜାଗ୍ରତ କରିବା ଉଦ୍ଦେଶ୍ୟରେ ଆରମ୍ଭ ହୋଇଛି ଏଭଳି ଉଦ୍ୟମ । ଥାନା ପରିସରରେ ତିଆରି କରାଯାଇଛି ଏକ ଶିଶୁ କକ୍ଷ । ସେଠାକୁ ଆସି ଛୋଟ ପିଲାମାନେ ମନୋରଞ୍ଜନର ଭରପୂର ଉପଯୋଗ କରିବା ସହ ପୋଲିସ ପ୍ରତି ସେମାନଙ୍କ ଭୟ ଦୂର ହୋଇଥିବା ମଧ୍ୟ କହିଛନ୍ତି ।
ଥାନା ପରିସରରରେ ଏହି କକ୍ଷ ନିର୍ମାଣ ବେଳେ ଛୋଟ ପିଲାଙ୍କ ପ୍ରତିଟି ଆଗ୍ରହ ଓ ରୁଚିକୁ ନଜରକୁ ଦିଆଯାଇଛି । କୋଠରୀର କାନ୍ଥରେ ରଙ୍ଗ ବେରଙ୍ଗର ଆକର୍ଷଣୀୟ ଚିତ୍ର ଅଙ୍କାଯାଇଥିବାବେଳେ ଆସବାସପତ୍ର ମଧ୍ୟ କେମିତି ଛୋଟ ପିଲାଙ୍କ ମନକୁ ସୁହାଇବ ସେଥିପ୍ରତି ଧ୍ୟାନ ଦିଆଯାଇଛି । ପିଲାମାନେ ବି ସେଠାକୁ ଆସି ଯେ କେବଳ ବିଭିନ୍ନ ପ୍ରକାର ଖେଳର ମଜା ଉଠାଉଛନ୍ତି ତ ନୁହେଁ, ସେମାନଙ୍କ ମନପସନ୍ଦର ବହି ବି ପଢିପାରିବା ଭଳି ସମସ୍ତ ବ୍ୟବସ୍ଥା କରାଯାଇଛି ।
ପୋଲିସ ଓ ଜନସାଧାରଣ ମଧ୍ୟରେ ସୁସମ୍ପର୍କ ସ୍ଥାପନ ଉଦ୍ଦେଶ୍ୟରେ ସରକାରଙ୍କ ପକ୍ଷରୁ ଆରମ୍ଭ ହୋଇଛି ଏଭଳି ଉଦ୍ୟମ । ନବରଙ୍ଗପୁରବାସୀ ମଧ୍ୟ ପୋଲିସ ପ୍ରଶାସନର ଏହି ପଦକ୍ଷେପକୁ ପ୍ରଶଂସା କରିଛନ୍ତି । ଆଗକୁ ଉମରକୋଟ ଓ ଅନ୍ୟ କିଛି ପୋଲିସ ଥାନାରେ ବି ଏଭଳି ସଂସ୍କାର ମୂଳକ ବ୍ୟବସ୍ଥା କରାଯିବ ବୋଲି ପେ୍ାଲିସ ପକ୍ଷରୁ ସୂଚନା ମିଳିଛି ।
ନବରଙ୍ଗପୁରରୁ ନବଘନ ବିଶୋଇଙ୍କ ରିପୋର୍ଟ
