ଖେଳ ପଡ଼ିଆରୁ ମଶାଣି ଭୂଇଁ ! ବୋଲିଂ କରି ମ୍ୟାଚ୍ ଜିତାଇବା ପରେ ଟଳି ପଡ଼ିଲେ କାହ୍ନା

ପଟ୍ଟାମୁଣ୍ଡାଇ(ପ୍ରବୀର କୁମାର ନାୟକ) : ‘ଏବେ ବି ମୁଁ ବଞ୍ଚିଛି, କଥା ହେବାର ଅଛି ହେଲେ କଥା ହୋଇଯାଅ । ମରିଗଲା ପରେ ଖୋଜିଲେ ବି ପାଇବନି । ’ ସତ ହୋଇଗଲା କାହ୍ନୁର ଭିଡିଓରେ କୁହାଯାଇଥିବା ଗୋଟି ଗୋଟି କଥା । ବାପାମା’ , ସାଙ୍ଗସାଥୀକୁ ବହୁ ଦୂରକୁ ଚାଲିଗଲା । ଖେଳ ପଡ଼ିଆରେ ଛକି ବସିଥିଲା ମୃତ୍ୟୁ । କିଏ ଜାଣିଥିଲା ଯେଉଁ ଖେଳ ପଡ଼ିଆକୁ ସେ ଏତେ ଭଲ ପାଉଥିଲା, ସେଇଠି ତା’ର ଜୀବନ ଚାଲିଯିବ ? ବୋଲିଂ କରିଥିବାରୁ ସାଙ୍ଗ ପାଖକୁ ଯାଇ ଖୁସି ଜାହିର କରିବା ସମୟରେ ଅଧାରେ ଟଳିପଡ଼ିଲା । ଆଉ ତା’ର ଏହି ଶେଷ ଭିଡିଓ ଦେଖି କାନ୍ଦୁଛନ୍ତି ପରିବାର ଲୋକ ଆଉ କାନ୍ଦୁଛନ୍ତି ସାଙ୍ଗସାଥୀ । ପୁଅକୁ ହରାଇ ମା’ବାପାଙ୍କ ଚେତା ଫେରୁନି ।

ଯାଜପୁର ବରି ବ୍ଲକର କାହ୍ନୁ ଚରଣ ପରିଡା । ବୟସ ୧୮ ବର୍ଷ । ଛୋଟ ବେଳରୁ କ୍ରିକେଟ ପ୍ରତି ବେଶ ଆଗ୍ରହ । ଯିଏ ଯେତେ ବାରଣ କଲେ କାହ୍ନୁଙ୍କୁ କ୍ରିକେଟରୁ କେହି ବି ଦୂରେଇ ପାରୁନଥିଲେ । ଭଲ ବ୍ୟାଟିଂ ସାଙ୍ଗକୁ ବୋଲିଂରେ ମଧ୍ୟ କିଛି ପାରଙ୍ଗମ ଥିଲେ କାହ୍ନୁ । କିଏ ଜାଣିଥିଲା ଦିନେ ଏହି ଖେଳ ହିଁ ତାଙ୍କ ପାଇଁ କାଳ ହେବ ଆଉ କ୍ରିକେଟ ମୈଦାନରେ ଚାଲିଯିବ ତାଙ୍କ ଜୀବନ । ବୋଲିଂ କରୁ କରୁ ଟଳି ପଡ଼ିଥିଲେ କାହ୍ନୁ ।

ଭଲ ଖେଳାଳି ହୋଇଥିବାରୁ କାହ୍ନୁ କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ତରଡିପାଳ ଗାଁକୁ ଟି ୨୦ ଟୁର୍ଣ୍ଣାମେଣ୍ଟ ଖେଳିବାକୁ ଆସିଥିଲେ । ମ୍ୟାଚ ଟାଇ ହୋଇଯିବାରୁ ସୁପର ଓଭର ଖେଳାଯାଉଥିଲା । ଚାରି ଓଭର ବିଶିଷ୍ଟ ଶେଷ ଓଭର ପକାଉଥିଲେ କାହ୍ନୁ । ୫ ଟି ବଲ ପକାଇ ଶେଷ ବଲରେ ବ୍ୟାଟ୍ସ ମ୍ୟା କୁ ବିଟ କରାଇ ଖୁସିରେ ଆତ୍ମବିଭୋର ହୋଇ ଅଚାନକ ପଡିଆ ମଝିରେ ଟଳି ପଡ଼ିଥିଲେ । ଖେଳୁ ଖେଳୁ ଖେଳ ପଡ଼ିଆରେ ଜୀବନ ଚାଲିଗଲା ।

ଏପରି ଦୁଃଖଦ ଘଟଣା ସାରା ଅଞ୍ଚଳକୁ ସ୍ତବ୍ଧ କରିଦେଇଛି । ଏକ ମାତ୍ର ପୁଅକୁ ହରାଇ ଭାଙ୍ଗି ପଡିଛନ୍ତି ବାପାମା । କାନ୍ଦ ବୋବାଳିରେ ଫାଟି ପଡୁଛି ପରିବାର । କିଛି କହିପାରୁ ନାହାନ୍ତି ସାଥି ଖେଳାଳି । କିଛି କଥା କହିବା ଅବସ୍ଥାରେ ନାହାନ୍ତି । ଏବେ ତାଙ୍କର ପୁର୍ବରୁ ସୋସିଆଲ ମିଡ଼ିଆରେ ଥିବା ଭିଡ଼ିଓ ବେଶ ଭାଇରଲ ହେବାରେ ଲାଗିଛି ।