‘କବି ବସନ୍ତ ମୁଦୁଲି କବିତା’ ପୁରସ୍କାର ଘୋଷଣା: ପୁରସ୍କୃତ ହେବେ କବି ନରେନ୍ଦ୍ର ଭୋଇ, କବି ଚିତ୍ତରଞ୍ଜନ ନାୟକ

କବି ବସନ୍ତ ମୁଦୁଲି ସ୍ମୃତି ସଂସଦର ସଭାପତି ପବିତ୍ର ପାଣିଗ୍ରାହୀଙ୍କ ଅଧ୍ୟକ୍ଷତାରେ ଭଦ୍ରକ ଠାରେ ଏକ ବୈଠକ ଅନୁଷ୍ଠିତ ହୋଇଛି । ବୈଠକରେ ବସନ୍ତ ମୁଦୁଲି ସ୍ମୃତି ସଂସଦ ପକ୍ଷରୁ ପ୍ରଦାନ କରାଯାଉଥ‌ିବା ମର୍ଯ୍ୟାଦାଜନକ ତଥା ଯୁବପିଢ଼ିଙ୍କ ବହୁ ଆକାଂକ୍ଷିତ 'କବି ବସନ୍ତ ମୁଦୁଲି କବିତା ପୁରସ୍କାର’ର ଫଳାଫଳ ଘୋଷଣା କରାଯାଇଛି । ଦୁଇ ବର୍ଷ ପାଇଁ ଏହି ପୁରସ୍କାର ଦିଆଯିବ ।

୨୦୨୨ ପାଇଁ କବି ନରେନ୍ଦ୍ର ଭୋଇ(୧୯୭୯) ଯୋଗ୍ୟ ବିବେଚିତ ହୋଇଥିବା ବେଳେ ୨୦୨୩ ପାଇଁ କବି ଚିତ୍ତରଞ୍ଜନ ନାୟକ(୧୯୭୮) ଏହି ପୁରସ୍କାର ପାଇବେ । ୨୦୨୨ରେ ଉତ୍ସବ ହୋଇ ପାରିନଥିବାରୁ ଚଳିତ ବର୍ଷକୁ ମିଶାଇ ୨ ବର୍ଷ ପାଇଁ ଏହି ପୁରସ୍କାର ଦିଆଯିବ ବୋଲି ସଂସଦ ପକ୍ଷରୁ ଏକ ପ୍ରେସ୍ ବିଜ୍ଞପ୍ତି ଜରିଆରେ ସମ୍ପାଦକ କୃଷ୍ଣ କୁମାର ମହାନ୍ତି ଘୋଷଣା କରିଛନ୍ତି ।

ଭଦ୍ରକ ଠାରେ ଅନୁଷ୍ଠିତ ବୈଠକରେ ଗାଳ୍ପିକ ରଜନୀକାନ୍ତ ମହାନ୍ତି, କବି କିଶୋର ପାଣିଗ୍ରାହୀ ଓ ଅରୁଣ ଖିଲାର ପ୍ରମୁଖ ଉପସ୍ଥିତ ଥାଇ ବିଚାରକ ମାନଙ୍କ ଠାରୁ ପ୍ରାପ୍ତ ମତ ଭିତ୍ତିରେ ଅଧିକ ମତ ଆସିଥିବା କବିଙ୍କୁ ଯୋଗ୍ୟ ଘୋଷଣା କରାଯାଇଥିଲା । ଏଥିରେ ଅନୁଷ୍ଠାନର କୌଣସି ଭୂମିକା ନଥାଏ ଏବଂ ବିଚାରକଙ୍କ ମତାମତକୁ ଗ୍ରହଣ କରାଯାଇ ଫଳାଫଳ ଘୋଷଣା କରାଯାଏ ବୋଲି ସଂସଦ ପକ୍ଷରୁ ସଂଯୋଜକ ଅରୁଣ ଖିଲାର ସ୍ପଷ୍ଟ କରିଛନ୍ତି । ୟ

ସୂଚନାଥାଉ କି, ନଭେମ୍ବର ୫ରେ ଭଦ୍ରକ ସଂସ୍କୃତି ଭବନ ଠାରେ ଅନୁଷ୍ଠିତ ହେବାକୁ ଥ‌ିବା ୩୭ତମ କବି ବସନ୍ତ ମୁଦୁଲି ସ୍ମୃତି ସମାରୋହ ପାଳନ ଅବସରରେ ଉପରୋକ୍ତ ବିଜେତାଙ୍କୁ ପୁରସ୍କାର ସ୍ୱରୂପ ନଗଦ ଅର୍ଥରାଶି ଓ ମାନପତ୍ର ପ୍ରଦାନ କରାଯାଇ ସମ୍ମାନିତ କରାଯିବ । ପୁରସ୍କାର ପାଇବାକୁ ଯୋଗ୍ୟ ବିବେଚିତ ହୋଇଥ‌ିବା ଏହି ୨ ଜଣ ଓଡ଼ିଆ ଯୁବକବି ଓଡ଼ିଆ କବିତା କ୍ଷେତ୍ରରେ ବେଶ ପରିଚିତ ନାମ । ସେମାନେ ଓଡ଼ିଆ କବିତାରେ ନିଜସ୍ୱ ସ୍ଵର ଓ ସ୍ଵାକ୍ଷର ଛାଡିଛନ୍ତି ।

ବୌଦ୍ଧ ଜିଲ୍ଲାରେ ଜନ୍ମିତ ନରେନ୍ଦ୍ରଙ୍କ ୩ଟି କବିତା ପୁସ୍ତକ ଥିବା ବେଳେ କେନ୍ଦୁଝର ଜିଲ୍ଲାରେ ଜନ୍ମିଥିବା ଚିତ୍ତରଞ୍ଜନ ୪ଟି କବିତା ପୁସ୍ତକର ସ୍ରଷ୍ଟା । ପ୍ରତିବର୍ଷ ୫୦ ବର୍ଷ ବୟସ ସୀମା ମଧ୍ୟରେ ଜଣେ ଯୁବ କବିଙ୍କୁ ବିଚାରକ ମଣ୍ଡଳୀଙ୍କ ମନୋନୟନ ପ୍ରକ୍ରିୟା ଅନୁସାରେ ଏହି ପୁରସ୍କାର ଗତ ୩୦ ବର୍ଷ ଧରି ପ୍ରଦାନ କରାଯାଇ ଆସୁଛି ।