ବିଶ୍ୱରେ ଏକଘରିଆ ହେବେ ପୁଟିନ୍‌ ! ପ୍ୟାରିସ୍‌ରୁ ହଟିଲା ପ୍ରତିମୂର୍ତ୍ତି

ପ୍ୟାରିସ୍ ମ୍ୟୁଜିୟମ୍‌ରୁ ହଟିଲା ରଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍‌ଙ୍କ ମହମ ପ୍ରତିମୂର୍ତ୍ତି । ୟୁକ୍ରେନ୍ ଉପରେ ରଷିଆର ଆକ୍ରମଣ ଘଟଣାକୁ ନିନ୍ଦା କରିବା ସହ ଏହାର ପ୍ରତିବାଦ ସ୍ୱରୁପ ଏଭଳି କରାଯାଇଛି ବୋଲି କୁହାଯାଉଛି । ଆଜି ସକାଳୁ ମ୍ୟୁଜିୟମ୍‌ରେ ଆନୁଷ୍ଠାନିକ ଭାବେ ଏହି କାର୍ଯ୍ୟକୁ କରାଯାଇଛି । ସର୍ବସାଧାରଣ ଏଣିକି ପ୍ୟାରିସ୍ ମ୍ୟୁଜିୟମରେ ପୁଟିନ୍‌ଙ୍କ ମହମ ପ୍ରତିମୂର୍ତ୍ତିକୁ ଦେଖି ପାରିବେନି । ପ୍ୟାରିସ୍ ମ୍ୟୁଜିୟମ୍‌ରେ ବିଶ୍ୱର ସମସ୍ତ ପ୍ରତିଷ୍ଠିତ ବ୍ୟକ୍ତି ବିଶେଷଙ୍କ ମହମ ପ୍ରତିମୂର୍ତ୍ତି ରହିଛି ।

ରୁଷର ଏହି ଯୁଦ୍ଧ ନୀତିକୁ ଅନେକ ଦେଶ ବିରୋଧ କରିଛନ୍ତି। ଏପରିକି ପୁଟିନଙ୍କୁ ବିରୋଧ କରି ରୁଷ ଉପରେ ବିଭିନ୍ନ ପ୍ରକାରର କଡା ପ୍ରତିବନ୍ଧକ ଲଗାଇବା ପାଇଁ ନିଷ୍ପତ୍ତି ନେଇଛନ୍ତି। ଏହାରି ଭିତରେ ଏବେ ପ୍ୟାରିସ ମଧ୍ୟ କିଛି ଏଭଳି ଢ଼ଙ୍ଗରେ ରୁଷକୁ କରିଛି ବିରୋଧ। ୟୁକ୍ରେନ୍‌ ଉପରେ ରୁଷର ଆକ୍ରମଣକୁ ବିରୋଧ କରି ପ୍ୟାରିସ ତା’ର ଏକ ମ୍ୟୁଜିଅମରୁ ପୁଟିନଙ୍କ ପ୍ରତିମୂର୍ତ୍ତିକୁ ହଟାଇ ଦେଇଛି।

ପ୍ୟାରିସ ସ୍ଥିତି ଗ୍ରେଭିନ୍‌ ମ୍ୟୁଜିଅମରେ ଥିବା ପୁଟିନଙ୍କ ମହମ ପ୍ରତିମୂର୍ତ୍ତିକୁ ମଙ୍ଗଳବାର ଦିନ ହଟାଇ ଦିଆଯାଇଛି। ଏଥିସହ ପୁଟିନଙ୍କୁ ହିଟଲର ସହ ତୁଳନା କରାଯାଇଛି। ହିଟଲର ଭଳି ଲୋକଙ୍କ ପାଇଁ ଏହି ମ୍ୟୁଜିଅମରେ କୌଣସି ସ୍ଥାନ ନାହିଁ ବୋଲି କହିଛି ଗ୍ରେଭିନ ମ୍ୟୁଜିଅମ। ଫ୍ରାନ୍ସ ଏଭଳି ନିଆରା ପ୍ରତିବାଦ କରି ରୁଷକୁ କଡା ଜବାବ ଦେବାକୁ ଚେଷ୍ଟା କରିଛି।

ଚାରିଆଡୁ ବିଭିନ୍ନ ପ୍ରତିବନ୍ଧକ ଲଗାଇବା ଓ କଡା ବିରୋଧ ସତ୍ତ୍ୱେ ବି ରୁଷ ରାଷ୍ଟ୍ରପତିଙ୍କୁ ଏହାର କିଛି ପ୍ରଭାବ ପଡୁନି। ୟୁକ୍ରେନ୍‌ ଉପରେ ସେ ତାଙ୍କ ଆକ୍ରମଣ ଜାରି ରଖିଛନ୍ତି। ଦୀର୍ଘ ୮ ଦିନ ହେବ ଜାରି ରହିଛି ଯୁଦ୍ଧ। ଗୋଟିଏ ଜିଦ୍‌ ୟୁକ୍ରେନ୍‌କୁ ଦଖଲ କରିବେ। ତେବେ ଦୁଇ ଦେଶ ଭିତରେ ଜାରି ରହିଥିବା ଏହି ଯୁଦ୍ଧ ଭିତରେ ପେଶି ହୋଇଛନ୍ତି ସାଧାରଣ ଲୋକ। ଅନେକ ଲୋକ ପ୍ରାଣ ହରାଇଥିବା ବେଳେ ଆହୁରି ଅନେକ ଲୋକ ବଙ୍କର ଭିତରେ ଲୁଚି ରହିଛନ୍ତି।

ସେପଟେ ଆଜି ପର୍ଯ୍ୟନ୍ତ ରୁଷର ବାୟୁସେନାକୁ ମସ୍କୋ ବ୍ୟବହାର କରିନଥିବା ବେଳେ ଆଜି କିଭ୍‌ ସହରରେ ବାୟୁସେନା ଆକ୍ରମଣ ନେଇ ସାଇରନ ବାଜୁଥିବା ଶୁଣିବାକୁ ମିଳିଛି । ଏହାସହ କିଭ୍‌ର ଅନେକ ସ୍ଥାନରେ ଭିଷଣ ବିସ୍ଫୋରଣ ଶବ୍ଦ ଶୁଭୁଥିବାରୁ ଏହାକୁ ନେଇ ଲୋକ ଭୟଭିତ ହୋଇପଡିଛନ୍ତି ।