ଯୁଦ୍ଧ ଆଶଙ୍କା ! ଜାତିସଂଘ ସୁରକ୍ଷା ପରିଷଦର ଘନ ଘନ ବୈଠକ, ଶାନ୍ତି ଚାହୁଁଛି କହିଲା ୟୁକ୍ରେନ୍‌

ରୁଷ-ୟୁକ୍ରେନ୍ ମଧ୍ୟରେ ଯୁଦ୍ଧ ଆଶଙ୍କା ତୀବ୍ର ହେଉଛି । ଆଉ ଏହାକୁ ନେଇ ଜାତିସଂଘ ସାଧାରଣ ପରିଷଦରେ ଜୋରଦାର ଆଲୋଚନା ହୋଇଛି । ହେଲେ ଏହି ଆଲୋଚନାରେ ଶାନ୍ତି ସପକ୍ଷରେ ମତ ରଖିଛନ୍ତି ୟୁକ୍ରେନ୍‌ର ବୈଦେଶିକ ମନ୍ତ୍ରୀ । ୟୁକ୍ରେନ୍ ବୈଦେଶିକ ମନ୍ତ୍ରୀ ମିଟ୍ରୋ କୁଲେବା ଜାତିସଂଘ ସାଧାରଣ ପରିଷଦରେ ତାଙ୍କ ବ୍ୟକ୍ତବ୍ୟ ରଖି କହିଛନ୍ତି ଯେ, ବିଶ୍ୱ ସମୁଦାୟ ଅତୀତର ଭୁଲକୁ ଆଉ ଥରେ ପୁନରାବୃତ୍ତି ନକରିବା ଉଚିତ୍‌ । ୟୁରୋପରେ ହେବାକୁ ଥିବା ବିଭୀଷିକାକୁ ବର୍ତ୍ତମାନର ମୁକ୍ତ ବିଶ୍ୱ ମିଳିମିଶି ଦୂରେଇ ଦେବା ଦରକାର ।

ତେବେ ସବୁଠାରୁ ବଡ଼ କଥା ହେଲା ୟୁକ୍ରେନ ସଙ୍କଟ ନେଇ ମିଳିତ ଜାତିସଂଘର ପୁଣି ଜରୁରୀ ବୈଠକ ବସିଛି । ୩ ଦିନ ଭିତରେ ଦ୍ୱିତୀୟ ଥର ପାଇଁ ସୁରକ୍ଷା ପରିଷଦର ବୈଠକ ଅନୁଷ୍ଠିତ ହୋଇଛି । ରୁଷିଆର ମିଲିଟାରୀ ଅପରେସନ ଘୋଷଣା ପରେ ଏହି ବୈଠକ ହୋଇଛି ।

ସେପଟେ ୪୦ ନିୟୁତ ୟୁକ୍ରେନ୍‌ବାସୀ ଶାନ୍ତି ଓ ମୈତ୍ରୀ ଚାହୁଁଥିବା ୟୁକ୍ରେନ୍ ବୈଦେଶିକ ମନ୍ତ୍ରୀ ମିଟ୍ରୋ କୁଲେବା କହିଛନ୍ତି । ଦ୍ୱିତୀୟ ବିଶ୍ୱଯୁଦ୍ଧ ପରଠୁ ୟୁରୋପରେ ସେମାନେ ହିଁ ସବୁଠୁ ନିରାପତ୍ତା ସଙ୍କଟ ମଧ୍ୟରେ ଥିବା କହିଛନ୍ତି ୟୁକ୍ରେନ୍ ବୈଦେଶିକ ମନ୍ତ୍ରୀ । ରୁଷର ମନମାନି ପାଇଁ ଏବେ ଏଭଳି ସମସ୍ୟା ସୃଷ୍ଟି ହୋଇଛି । ୟୁକ୍ରେନ ଉପରେ ରୁଷିଆ କରୁଥିବା ଦାବି ଭିତ୍ତିହୀନ ବୋଲି ସେ କହିଛନ୍ତି । ୟୁକ୍ରେନ୍ କେବେ ବି କାହା ଉପରେ ଆକ୍ରମଣ କରିବା କଥା କହିନାହିଁ । କିମ୍ବା ସାମରିକ ପଦକ୍ଷେପ ନେବାକୁ କୌଣସି ଯୋଜନା ମଧ୍ୟ କରିନି । ସେହିଭଳି ଉସୁକାଇବା କିମ୍ବା ଷଡ଼ଯନ୍ତ୍ର ଭଳି କୌଣସି କାର୍ଯ୍ୟ ୟୁକ୍ରେନ୍ କରି ନାହିଁ ବୋଲି ଜାତିସଂଘ ସାଧାରଣ ପରିଷଦରେ ନିଜ ପକ୍ଷ ରଖିଛିି ୟୁକ୍ରେନ୍ ।

ସେପଟେ ୟୁକ୍ରେନ ବିବାଦ ଥମିବାର ନା ଧରୁନି । ଦିନକୁ ଦିନ ଉଗ୍ରରୂପ ନେଉଛି । ଆମେରିକା ଓ ଏହାର ସହଯୋଗୀଙ୍କୁ ଚେକ୍‌ମେଟ୍ ଦେବା ଲାଗି ଋଷ୍ ରାଷ୍ଟ୍ରପତି ଭ୍ଲାଦିମିର ପୁତିନଙ୍କ ନୂଆ ଷ୍ଟ୍ରାଟେଜି ୟୁକ୍ରେନର ଦୁଇ ବିଦ୍ରୋହୀ ପ୍ରଦେଶକୁ ସ୍ୱାଧୀନ ରାଷ୍ଟ୍ରର ମାନ୍ୟତା ଦେଇଛନ୍ତି । ପୁତିନ ଏଥିସହିତ ଏହି ଅଞ୍ଚଳକୁ ସେନା ପଠାଇଛନ୍ତି। ଆମେରିକା ପୁତିନଙ୍କ ଏହି ପଦକ୍ଷେପକୁ ଜୋରଦାର ବିରୋଧ କରିବା ସହ ଋଷିଆ ଓ ଦୁଇ ପ୍ରଦେଶ ବିରୁଦ୍ଧରେ ଆର୍ଥିକ କଟକଣା ଘୋଷଣା କରିଛି। ଅନ୍ୟପକ୍ଷରେ ଯୁଦ୍ଧ ଆଶଙ୍କା ଭିତରେ ୟୁକ୍ରେନ୍‌ରେ ରହୁଥିବା ଭାରତୀୟଙ୍କୁ ଫେରାଇ ଆଣିବା ଲାଗି ଏୟାର ଇଣ୍ଡିଆ ସ୍ୱତନ୍ତ୍ର ବିମାନସେବା ଆରମ୍ଭ କରିଦେଇଛି।