LIVE TV
ଫୁଟୁଛି ତୋପ, ଗର୍ଜୁଛି ଟ୍ୟାଙ୍କ୍ । କ୍ଷେପଣାସ୍ତ୍ର ଓ ବିମାନ ଆକ୍ରମଣରେ ଥରହର ୟୁକ୍ରେନ । ତଥାପି ତୁଟିନି ଦମ୍ଭ, ଭାଙ୍ଗିନି ସାହସ । ଋଷ ସୈନ୍ୟଙ୍କ ମୁକାବିଲା ଲାଗି ଅସ୍ତ୍ର ଉଠାଇଛନ୍ତି ୟୁକ୍ରେନର ସାଧାରଣ ଜନତା । ରାଷ୍ଟ୍ରପତି ଜଲେନ୍ସିକଙ୍କ ଆହ୍ୱାନକ୍ରମେ ଦେଶକୁ ବାହ୍ୟ ଶତ୍ରୁ ଆକ୍ରମଣରୁ ରକ୍ଷା ଲାଗି ପଣ କରିଛନ୍ତି ଆବାଳ ବୁଦ୍ଧବନିତା । ସେମାନଙ୍କ ବୀରତ୍ୱର ଗାଥାକୁ ନେଇ ଏବେ ସାରା ବିଶ୍ୱରେ ଚର୍ଚ୍ଚା ।
ମହାଶକ୍ତି ଋଷିଆର ସାମ୍ନା କରିବାକୁ ୟୁକ୍ରେନ ପାଖରେ ସାମର୍ଥ୍ୟ ନାହିଁ, ତେବେ ଦେଶକୁ ବାହ୍ୟଶତ୍ରୁ କବଳରୁ ରକ୍ଷା ଲାଗି ଅସ୍ତ୍ର ଉଠାଇବାକୁ ଦେଶବାସୀଙ୍କୁ ଆହ୍ୱାନ ଦେଇଛନ୍ତି ରାଷ୍ଟ୍ରପତି ଜେଲେନ୍ସିକ । ହାତରେ ଅଟୋମେଟିକ୍ ରାଇଫଲ ଧରି ଋଷ ସୈନ୍ୟଙ୍କ ମୁକିବାଲ ଲାଗି ପ୍ରସ୍ତୁତ ରହିଛନ୍ତି ଶହ ଶହ ୟୁକ୍ରେନ୍ ନାଗରିକ । ସେମାନଙ୍କ ଦୃଢୋକ୍ତି ମରିବୁ ପଛେ ନଇଁବୁ ନାହିଁ ।
Also Read
ଇଏ ଦେଶପ୍ରେମର ଅନ୍ୟ ଏକ ନମୁନା । ସାଇକେଲରେ ବନ୍ଧୁକ ବୋହି ଋଷ ସୈନ୍ୟଙ୍କ ସହ ଲଢିବାକୁ ଯାଉଛନ୍ତି ଏହି ନବ ଯୁବକ । ତେବେ ସବୁକୁ ବଳିଯାଇଛି ଏଇ ମର୍ମସ୍ପର୍ଶୀ ଦୃଶ୍ୟ । ନିଜ ନାତିନାତୁଣୀଙ୍କ ସୁରକ୍ଷା ଲାଗି ସେନା ବାହିନୀରେ ସାମିଲ ହେବାକୁ ଆସିଛନ୍ତି ଏହି ୮୦ ବର୍ଷୀୟ ବୃଦ୍ଧ ।
ୟୁକ୍ରେନବାସୀଙ୍କ ଅସୀମ ସାହସକୁ ନେଇ ସାରା ବିଶ୍ୱରେ ଚର୍ଚ୍ଚା । ସାଧାରଣଜନତା ହାତରେ ଅସ୍ତ୍ର ନାହିଁ ସିନା, ଛାତିରେ ରହିଛି ଦମ୍ଭ । କର୍ଡନ କରି ଟ୍ୟାଙ୍କ ଚାରିପଟେ ଘେରିଯାଇଛନ୍ତି ଶହ ଶହ ଲୋକ । ଯାହାକି ଋଷ ସୈନ୍ୟଙ୍କୁ ଟ୍ୟାଙ୍କ ଛାଡି ଦେବାକୁ ବାଧ୍ୟ କରିଛି । ଅନେକ ସ୍ଥାନରେ ସାଧାରଣ ଲୋକ ଖାଲି ହାତରେ ଯୁଦ୍ଧ ପୋଷାକରେ ସଜ୍ଜିତ ଋଷୀ ସୈନ୍ୟଙ୍କୁ କାବୁ କରିନେବାର ଦୃଶ୍ୟ ବି ନଜରକୁ ଆସୁଛି ।
ତେଣେ ମହିଳା ସାଂସଦ କିରା ରୁଦିକ ପରେ ଅସ୍ତ୍ର ଉଠାଇଛନ୍ତି ୟୁକ୍ରେନର ବ୍ୟୁଟି କୁଇନ୍ ଆନାଷ୍ଟେସିଆ ଲେନ । ଲେନା ରୁଦିଡକୁ ଭଳି ଯୁଦ୍ଧ ପୋଷାକ ପିନ୍ଧି, ହାତରେ ଏକେ-୪୭ ଧରି ଋଷ ବିରୋଧୀ ଯୁଦ୍ଧରେ ସାମିଲ ହୋଇଛନ୍ତି ଆନାଷ୍ଟେସିଆ । କଂବାଟ ଗିୟରରେ ଥିବା ଆନାଷ୍ଟେସିଆନଙ୍କ ଫଟୋ ସୋସିଆଲ ମିଡିଆରେ ଭାଇରାଲରେ ହେବାରେ ଲାଗିଛି । ତେବେ କେବଳ ଆନାଷ୍ଟେସିଆ ନୁହନ୍ତି ୟୁକ୍ରେନ ସେନାରେ ସାମିଲ ହଜାର ହଜାର ମହିଳା ସୈନ୍ୟ । ଫ୍ରଣ୍ଟ ଲାଇନ୍ରେ ରହି ଋଷ ସୈନ୍ୟଙ୍କ ମୁକାବିଲା ବି କରୁଛନ୍ତି । ସେମାନଙ୍କ ଦେଶପ୍ରେମର ଗାଥା ସାରା ବିଶ୍ୱକୁ ବିସ୍ମିତ କରିଛି ।
ଏପଟେ ୟୁକ୍ରେନ ବିରୁଦ୍ଧରେ ପୁଟିନଙ୍କ ସେନା କାର୍ଯ୍ୟାନୁଷ୍ଠାନ ବିରୋଧ କରି ବିକ୍ଷୋଭ ଜାରି ରହିଛି । ବିଭିନ୍ନ ଦେଶରେ ଲୋକେ ରାସ୍ତାକୁ ଓହ୍ଲାଇବା ସହ ତୁରନ୍ତ ଯୁଦ୍ଧ ବନ୍ଦ ଲାଗି ଦାବି ଜଣାଉଛନ୍ତି । ଋଷିଆରେ ବି ଯୁଦ୍ଧ ବିରୁଦ୍ଧରେ ବିରାଟ ଶୋଭାଯାତ୍ରା ଦେଖିବାକୁ ମିଳିଛି । ତେଣେ ୟୁକ୍ରେନକୁ ସମର୍ଥନ ଜଣାଇ ପ୍ୟାରିସ୍ରେ ଥିବା ପ୍ରସିଦ୍ଧ ଇଫେଲ ଟାୱାରକୁ ୟୁକ୍ରେନ ଜାତୀୟ ପତାକା ରଙ୍ଗରେ ଆଲୋକିତ କରାଯାଇଛି ।
