ଜଟିଳ ହେଉଛି ୟୁକ୍ରେନ ଯୁଦ୍ଧ ସ୍ଥିତି : ଉଗ୍ର ରୂପ ଦେଖାଉଛନ୍ତି ପୁଟିନ,ଆକ୍ରମଣକୁ ନିନ୍ଦା କଲା ଜାତିସଂଘ

ଜଟିଳ ହେଉଛି ୟୁକ୍ରେନ ଯୁଦ୍ଧ ସ୍ଥିତି । ଗଲା ଫେବ୍ରୁଆରୀରେ ଯୁଦ୍ଧ ଆରମ୍ଭ ପରଠାରୁ ପୁଟିନ ଦେଖାଇଛନ୍ତି ତାଙ୍କର ଉଗ୍ର ରୂପ । ଖାସ୍ କରି ଖାରକିଭ୍ ଓ ଖେରସନରେ ଋଷ ସେନାର ବିପର୍ଯ୍ୟୟ ପରେ ବିକଳ୍ପ ରାସ୍ତା ଆପଣେଇଛନ୍ତି ପୁଟିନ୍ । ଆକାଶ ମାର୍ଗରୁ ୟୁକ୍ରେନ ରାଜଧାନୀ କିଭ୍ ଉପରେ ଘନ ଘନ ଆକ୍ରମଣ କରିଛି ଋଷ ସେନା । ୟୁରୋପୀୟ ଅସ୍ତ୍ରଶସ୍ତ୍ରରେ ସଜ୍ଜିତ ୟୁକ୍ରେନ ସେନା ସ୍ଥଳ ଯୁଦ୍ଧରେ ଋଷ ସୈନ୍ୟଙ୍କ ଉପରେ ଭରି ପଡିବା ପରେ ପୁଟିନ୍ କ୍ଷେପଣାସ୍ତ୍ର ଓ ଡ୍ରୋନ୍ ଆକ୍ରମଣର ସହାୟତା ନେଇଛନ୍ତି । ସେହିପରି ଆକ୍ରମଣ ଏତେ ପ୍ରଚଣ୍ଡ ଯେ, ତାହା ସାରା ବିଶ୍ୱକୁ ସ୍ତବ୍ଧ କରିଛି । ଏହା ଆରମ୍ଭ ମାତ୍ର, ଏହାକୁ ଆହୁରି ଜୋରଦାର ଆକ୍ରମଣ କରାଯିବ ବୋଲି ରାଷ୍ଟ୍ରପତି ପୁଟିନ୍ ଧମକ ଦେବା ପରେ ସ୍ଥିତି ଆହୁରି ସଂଗୀନ ହୋଇପଡିଛି ।

ୟୁକ୍ରେନ ରାଜଧାନୀ କିଭ୍ ଉପରେ କରାଯାଇଥିବା ପ୍ରଚଣ୍ଡ କ୍ଷେପଣାସ୍ତ୍ର ଆକ୍ରମଣକୁ ଯଥାର୍ଥ କହିଛନ୍ତି ରାଷ୍ଟ୍ରପତି ପୁଟିନ୍ । ୟୁକ୍ରେନ ସେନା ଋଷର ଭିତ୍ତିଭୂମି ଓ ପାଇପ୍ଲାଇନକୁ ଟାର୍ଗେଟ କରିଥିବା ସୁରକ୍ଷା ପରିଷଦ ବୈଠକରେ ସେ ଅଭିଯୋଗ କରିଛନ୍ତି । କର୍ଚ୍ଚ ବ୍ରିଜ୍ ଆକ୍ରମଣ ଆତଙ୍କବାଦୀ କାର୍ଯ୍ୟ ବୋଲି ପୁଟିନ୍ ଦୋହରାଇଛନ୍ତି । ତେବେ ଆଗକୁ ଏଭଳି ଆକ୍ରମଣ ହେଲେ ତାହାର ସାଂଘାତିକ ଦୁସ୍ପରିଣାମ ଭୋଗିବାକୁ ପଡିବ ବୋଲି ସେ ଚେତାଇ ଦେଇଛନ୍ତି ।

ଅଧିକ ପଢ଼ନ୍ତୁ: ୟୁକ୍ରେନ୍‌ ପାଇଁ ଢାଲ ସାଜିବ ଆମେରିକା

କ୍ରିମିଆକୁ ସଂଯୋଗ କରୁଥିବା ବ୍ରିଜକୁ ଟ୍ରକ୍ ବୋମା ବିସ୍ଫୋରଣରେ ଉଡାଇ ଦିଆଯିବା ପରେ ଦେଖିବାକୁ ମିଳିଥିଲା ପୁଟିନଙ୍କ ଆକ୍ରୋଶ । କିଭ୍ ସମେତ ୟୁକ୍ରେନର ବିଭିନ୍ନ ସହରକୁ ଟାର୍ଗେଟ କରି ଋଷ ସେନା ୮୪ଟି କ୍ଷେପଣାସ୍ତ୍ର ମାଡ଼ କରିଥିଲା । କିଗରେ ବ୍ୟାପକ କ୍ଷତି ହେବା ସହ ୧୭ ଜଣଙ୍କ ଜୀବନ ଯାଇଛି ଶତାଧିକ ଆହତ ହୋଇଛନ୍ତି ।

ଜାତିସଂଘ ସାଧାରଣ ପରିଷଦ ଜରୁରୀ ବୈଠକରେ ଋଷିଆକୁ ଆତଙ୍କବାଦୀ ଦେଶ ଭାବେ ବର୍ଣ୍ଣନା କରିଛି ୟୁକ୍ରେନ୍ । ଋଷିଆର ବର୍ବର ଆକ୍ରମଣ ରୋକିବାକୁ ତୁରନ୍ତ ପଦକ୍ଷେପ ନିଆଯିବା ଦରକାର ବୋଲି କହିଥିଲେ ୟୁକ୍ରେନ ପ୍ରତିନିଧି । ସେହିପରି ଋଷିଆର ପଦକ୍ଷେପ ଆଦୌ ଗ୍ରହଣୀୟ ନୁହେଁ ବୋଲି କହିଛନ୍ତି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ ।

ଋଷିଆ ଅଯଥାରେ ପରିସ୍ଥିତିକୁ ଜଟିଳ କରୁଛି ବୋଲି ସେ କହିଛନ୍ତି । ଏପଟେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ପୁତିନଙ୍କ କ୍ଷେପଣାସ୍ତ୍ର ଆକ୍ରମଣକୁ କଡ଼ା ଭାଷାରେ ନିନ୍ଦା କରିଛନ୍ତି । ପୁଟିନଙ୍କ ବେଆଇନ ଯୁଦ୍ଧର ଏହା ଚରମ ବର୍ବରତା ବୋଲି କହିଛନ୍ତି ବାଇଡେନ୍ ।